Friday, March 30, 2007

ربنا يشفيك يا كريمه يا حاجه


Koko

ملقيتش غير كلام معت يوصف اللى جوايا

ياريت تفتكروها فى الدعا

Thursday, March 29, 2007

باب

Photo Sharing and Video Hosting at Photobucket

كل السكه دى لوحدى؟


دى السكه اللى ضرورى تمشيها لوحدك يا ليلى


طيب افرض ان البحر هايج و الموج عالى


عشان نوصل للبر ، ضرورى نواجه الموج و البحر


و على البر ألاقى ايه؟ ألاقى ايه يا حسين؟

...........................................................
...........................................................


عارفه يا ليلى حاتلاقى على البر ايه؟

.....

حاتلاقى حاجه أهم منى ، و أهم من أى انسان تانى . عارفه ايه هى يا ليلى؟

.....

حاتلاقى الحاجه اللى ضاعت منك ، حاتلاقى نفسك ،حاتلاقى ليلى الحقيقيه

..
آآآ

Labels:

Monday, March 26, 2007

بكره جاى بإيه

Photo Sharing and Video Hosting at Photobucket

جوه خاف و مرحتش!!

ما بين احساس بالعجز و الخوف فى نفس الوقت

مقدرتش اروح لوحدى
و مفيش حد مهتم اصلا فى عيلتنا الموقره

منولتش غير التريقه
عشان عايزه حد يروح معايا

زى محمود باخاف من العساكر جدا و باكرهم
باكره منظرهم و هما مالين الشوارع امبارح
و مستخبين بترقب جو عمارات وسط البلد ساعه فض اعتصام امبارح

غربان فى كل مكان ماليه الشوارع
ما بين بلطجيه منتشرين
و مخبرين
و عساكر و ناس برتبه لواء

و احساس انك متراقب و محاصر و مخنوق
بيضيقوا عليك مساحه النور

اول مره احاول اقرب و اشوف اللى بيحصل
حتى لو مشاركتش
و أول مره أحس بالرعب
و اكتشف خوفى و رعبى الشديد من العساكر

العساكر مابين غلبانين و مغلوبين على امرهم
و فرحانين بشكل عجيب
ببهدله الناس و البنات
و حتى التحرش بيهم و معاكستهم و تعريتهم بعنيهم
مش مهم بقى كبير صغير
ماشين لوحدهم او معاهم ناس
حرمان و تلذذ غريب بلحظه سلطه

الكبار بكروش منفوخه و نظرات ناريه و عيون مهدده
ولا كأننا تحت حصار و حظر تجول اسرائيلى

للدرجه دى بيضيق البلد بينا

Sunday, March 25, 2007

تمام كثقب أسود

Photo Sharing and Video Hosting at Photobucket

زى اى كائن مريخى محترم

مبحبش الأفراح

والمناسبات الاجتماعيه عامه حتى العزاء


باقف فاتحه بقى قدام طقوس الأفراح العجيبه

زى طفل صغير شاف سيد قشطه قدامه لاول مره

و معجبوش


عشان كده قليله اوى الأفراح اللى باحضرها

لازم يبقى حد قريب اوى

متقدرش متكونش جنبه

تسجل فرحته بعنيك


مجرد عروسه حلاوه

واخدالها زاويه

فى لحظه بتتحول لعدسه كاميرا اول ما تدوس عليها

بتقرب اكتر و تفتح عدسه سودا تجمع اللحظات و تسجلها


و لما يكون الفرح زى بتاع امبارح

فيه عروسه صاحبتك زى القمر

و عريس عسول بيحبها و حاضنها بعنيه

و معازيم حلوين اوى و عارف كتير منهم

و حاسس بالالفه وسطيهم

مينفعش متنبسطتش و تطير كمان م الفرح


كفايه اصحاب العريس المسخره

اللى غلبوا بجداره اصحاب العروسه

و قلبوا الفرح فيديو كليب صوت و صوره مش ممكن

الناس دى لازم يتحجزوا فى اى فرح

بشرط

ميسوقوش اى حاجه بعجل بعده


فيه حد يأمرك مع العروسه و العريس و المعازيم كده

و كمان يتوهوهم


و بما ان دى ديدى مش اى حد

و عشان خاطرها لقيتنى اطلقت تلات زغاريط و واحده اوف سايد بحالهم


دى ديدى

محدش عارف يعنى ايه ديدى



يعنى اعدادى مدرسه و الفصل والفسحه و بعد جرس المرواح

يعنى خروج و لف مع بفيه العصابه و تمشيه

يعنى وسط البلد و فطار رمضان مره كل سنه

يعنى ماك و ايس كريم فى عز الشتا

يعنى ثانوى و دروسه كلها

و معاد الساعه اربعه كل يوم

بالظبط باروح على الغدا

و ياسلام لو عمو جايبلنا طاجن الكاليمارى


يعنى تيتيتها الطيبه و طنط و عمو و دوللى

و بقيه عيلتها الطيبين


يعنى اطيب و اعسل صاحبه عندى

يعنى النونو بتاعتى

دايما كنت باعتبرها النونو فينا

كريستالايه رقيقه شفافه و بتضوى دفا


يعنى الكتكوته اللى اى حد بيشوفها بيحبها

و محدش بيستحمل زعلها او دموع عينيها


معنديش غير ديدى واحده

ديدى اللى كنت شايفاها امبارح بفستان فرح

و لسه شايفه النونو بتاعه المدرسه

حتى و هى بتلعب عروسه و عريس


ديدى اللى اول ما جت عنيا فى عنيها

و احنا بنسلم على بعض فى الاخر حبسنا دموعنا سوا


انتوا مش حتيجوا معايا توصلونى

حنيجى متخافيش


ساعتها بس حسيت ان ديدى كبرت

و بقت عروسه ليها بيت و مروحه

مطلعتش لعبه


قليله اوى الاوقات اللى بتتكلم تقول فيها

للناس القريبين انت بتحبهم اد ايه

و هم قريبين اد ايه مهما اتغيرنا و بعدنا وبعدتنا طرق

حتوحشينى و بحبك اوى بجد

Labels: ,

Saturday, March 24, 2007

قلم فى حفله!!

Photo Sharing and Video Hosting at Photobucket

بمنتهى البراءه

سألتنى بنتى نور

ف أربع خمس أمور

مش ف كتاب القراءه

قالتلى بابا يا بابا

مش إنت يا بابا

بتكتب أغانى

و تقول أشعار

أنا سمعت الشيخ يا بابا

بيقول إنك يا بابا

هاتروح النار

زى الناس الوحشين

الحراميين الكفار


قولى يا بابا

يعنى إيه استعمار

يعنى إيه نيل

يعنى إيه هرم

و مين اللى حط النسر ده

فوق العلم

يعنى إيه يا بابا

استفتاء

و يعنى إيه انتخاب

و يعنى إيه حر

و يعنى إيه نصاب

و يعنى إيه اغتصاب

يعنى إيه اختلاس

و يعنى إيه هجاص

و يعنى إيه خصخه


يعنى إيه يا بابا دستور

يعنى إيه معارضه

و يعنى إيه مظاهره

و ليه النهارده

خدنا اجازه من المدرسه

قوللى يا بابا

يعنى إيه قهر

و أين يقع خط الفقر

و يعنى إيه حظ

و يعنى إيه زهر


يعنى إيه يا بابا حريه

يعنى إيه إنسان

و يعنى إيه سرطان

يعنى إيه يا بابا خربوها

و مين دول يا بابا

ولاد القطوطه

و مين دى سماره يا بابا

و إزاى ضاعت من قلبك

و كنت فين لما خربوها يا بابا


بابا

إنت معايا

فيه يا بابا ناس

بتقول كفايه

و فيه عساكر

ماسكين عصايا

و بنات متعورين

و تانين ماشين بيضحكوا

يا بابا هما دول إسرائليين


قولتلها

نور

ممكن أسألك سؤال

قالتلى

إتفضل يا بابا

قلتلها

هيه قناه سبيس تون

رقم كام

و خدتها

عشان تنام!

...............

كتاب القراءه-على سلامه


Friday, March 23, 2007

مُعَلْقَه !

Photo Sharing and Video Hosting at Photobucket

أنا لا أحيط نفسى بها..أنا احملها داخلى
هناك أناس ولدوا هكذا على جسر معلَق
جاؤوا إلى الدنيا بين رصيفينْ و طريقينْ و قارتيْن
ولدوا وسط مجرى الرياح المضاده
وكبروا و هم يحاولون أن يصالحوا بين الأضداد داخلهم
ربما كنت من هؤلاء
...................
ذاكره للجسد-أحلام مستغانمى


Monday, March 19, 2007

جنينه الحيناوات


Photo Sharing and Video Hosting at Photobucket

ينفع كده يعنى

يويو يروح جنينه الحيوانات لأول مره من غير ما يشوف الزرافه؟!!

و من غير ما تاكل بلسانها الجزر من على راسه

ازاى اصلا جنينه الحيوانات من غير زرافه

و ازاى اصلا مكنش عندنا غير زرافه يتيمه بس

المهم الفقيده قرفت من عيشتها و قررت تسيبنا و تطلع لنا لسانها

و هى بتقول سايبهالكم و عندها حق


بس ماليش دعوه انا كنت عايزه اشوف بجد الزرافه

دى صاحبتى و انا اشبهلها جدا

انا حصانه بتستزرف الله


قبل اى حاجه تبرعوا تبرعوا عشان يجيبوا زرافه نعذبها

أداره الجنينه خلت التذكره جنيه بحاله نظرا للظروف الماديه الصعبه

عشان يجيبوا الزرافه!!


ما علينا

خلينا ندخل من الباب


اول مره اشوف كم السعاده دى على وش يوسف

كانه عارف اننا رايحين فى رحله

و سيادته عاملى فيها واحد كبير و مش راضى يقعد فى العربيه

و ماشى ماسك بكل ايد بنوته

و بيتمرجح فووق


قطعنا التذاكر و دخلنا

فاكرين كانوا بيعدونا ازاى ولا قطيع المعيز يا خواتى

و انطلقنا


خريطه؟؟

بتهرجوا ياجدعان احنا خبره جدا

الجنينه دى شافتنا زمان و شفناها لما زهقت


الولاد بيهرجوا و قال ايه عايزين يقعدوا يأكلوا

مش كفايه مأخرينا و نايمين لحد الضهر

مروه هددت الكل

يلا على جوه

ناكل دلوقتى قال


حضراتنا ماشين بنسمع حنمشى ازاى و نشوف ايه

و كله بيجيب فى سيره الفقيده اللى كنا عايزين نشوفها

و مش عارفين اللى حصلها


يوسف بقى ولا ملك سيام كان راكب فوق زاحمد

يا مجننا و بيجرى بهستيريه فرح مش معقوله

و كل ما يشوف حاجه يقول

ايه داا؟سوووو

و يشهق اوبااا


اول حاجه شافها الحمار المخطط افندى

و كان فرحان بيه جدا

و النعامه اللى كانت نافشالنا ريشها

و كان فاتح بقه

اول مره اشوف نعامه بديل!


و الجمل

اللى دخلناه جوه عنده

و ساعتها اترعب و انفجر فى العياط

الجمل فعلا يخوف

محتاج حلاق و دش محترم

و ده حال معظم الحيوانات الغلابه اللى جوه


تخيلوا انهم نايمين زى الغلابه

شوفوا الدبه عامله ازاى

و معرفش ودوا الدبدوبه البيضه فين

و الدش بتاعهم اتحول لحنفيه معدن صغيره!


الطاوس مسروق ريشه


الاسد مسَلْوع و عايز فومين غسيل


الشامبنذى عنده اكتئاب و زعلان

و ليه حق

خلال عشر دقايق

كان فيه كم محترم من الاطفال العساسيل جدا و اهاليهم الواعيين جدا

و عليه تم تغريق الشامبنذى

اشى ميه و اشى زباله

و اى حاجه فى الرجلين


سيد قشطه و المدام زى ما هما بسنانهم اللى محتاجه طب اسنان بحالها


النسر قلنا ليوسف عليه كوكو!


و على سيره المسميات

الحيوانات اتبهدلت خالص على ايدينا

عشان نسهل على يويو افندى

قطقط "اسد بقى قطه اى حاجه باربع رجلين و ديل"

كوكو و فوره "اى حاجه بشويه ريش"

قشطه

بوبو و بوبى "كلب البحر او اللمبى زى ما الحارس مسميه"

الولد حيطلع كل حاجه بايظه عنده


بس بصراحه

انا حاسه اننا كنا فرحانين اكتر من يوسف بكونا هناك

و بذكرياتنا هناك

واضح ان ده السر اللى بيخلى كل اب و ام

ياخدوا نوناتهم قال ايه عشان يفرجوهم على الحيوانات

و كمان يعذبوهم و يحطوهم عليهم


بابا و مامت يوسف بيقولوا انهم حاقدين عليه

و اشمعنا هم محدش عمل معاهم كده و هم صغيرين

و دخلهم جوه عند الحيوانات اللى اصلا هما خايفين منها دلوقتى!

الابهات و الامهات دول مش ممكن!!


احنا لزقنا فى الجبلايه و لا العيال

و هاتك يا فرجه على القرود و هيه بتتشمس و اللذى منه ;)


و انا كان فاضل اتطنطط لما لقيت كريمه الفيله لسه موجوده

و كلنا وقعنا من الضحك لما اكتشفنا ان الحارس هوهو بتاع زمان لسه موجود معاها


هيه عربيه السيسى صغرت كده ليه؟؟ دى كانت بتكفينا

قال يعنى احنا لسه اقزام

انا اتبسطت جدا


كان فاضلى الست زرافه و اطير م الفرح

صحيح

منفذتش المخطط بتاع زمان

:)

Labels:

Tuesday, March 13, 2007

أليس من الملعب..


Photo Sharing and Video Hosting at Photobucket


انتى مش شايفه يا بنتى بيتدربوا ازاى

مش شايفه دول عاملين بحطوا اهداف

و دول بوطئا جدا ازاى!!

طبعا مش حشجع نادى الشمس

الاهلى هو اللى حيفوز


همسات مسمعتهاش


انتى حره بس انا مش حاشجعهم

انتى اتجننتى يا حبيبه!!

مش شايفه!!


ده كان حوار حماسى و عصبى جدا بيدور جنبى

بين بنوتين زى القمر و معدوش باى حال 8 سنين!!

حبيبه و صاحبتها المجنونه ام ضفاير و شنطه نونو

و طبله كبيييره مش عارفه شايلاها ازاى

و بشجعوا بقوه الطبله و الترومبيت و الصريخ فى الاستاد


مقدرتش امنع نفسى و اتابع الحوار باستمتاع

لولا انهم اول ما الماتش ابتدى طلعوا قدام يشجعوا

البنوتين خبره جدا و واضح انهم مشجعين قدام

لدرجه حسستنى ان انا اللى عندى 8 سنين!


اول مره اروح استاد

و اول مره فى حياتى اقعد فى مواجهه الملعب الاخضر بتقاسيمه

و الكراسى الهرميه الملونه

اللى اخرى ممكن اشوفه عابرا فى ال art و افلام تلفزيون بيتنا


و انا داخله

اكتشفت ان الماتش اللى انا معزومه عليه

ماتش مينى باسكت لبنات عندهم 16 سنه

و ده زود فضولى انى اتفرج

لانى مشفتش ماتش لبنات قبل كده


دوشه و صريخ و صفير و تشجيع

و زماره التحكيم

على صوت رجلين اللى بيلعبوا اخر دقايق فى الماتش بتاعهم

بنات و اصغر من 16 سنه!!


الحمد لله المكان اللى كنت قاعده فيه كويس

لمبتدئه زى حضرتى بتستكشف الملعب لاول مره


قدامى الاهلى و المدرب اللى طول الماتش بيصرخ

و حمسنى اصرخ معاه

بس افهم الراجل ده عايز ايه

و ايه رموز الشفره السريه اللى بيستخدمها دى فى صريخه

و اموت و افهم ايه الرسومات المنعكشه اللى بيرسمها على البورد لللاعبينه

الملمومين حواليه و بيهزوا دماغهم فى صمت قبل كل شوط

كانك فى حضره ساحر هندى بيرش تعاويذه


و ليه الناس كلها بتستخدم شفرات النهارده


من اول سياده الحكم اللى عازمنى

و مديها اشارات صامته بتسبقها صوت صفارته

كانه هو كمان جزء من الطقوس و التعاويذ السحريه


لحد الزماره امو صوت وحش اللى ساعات مكونتش بابقى فاهمه عايزين ايه بيها

ايه اللى حصل يا جدعان؟؟


و ملاقيش قدامى غير الشاشه اللى ممكن تقولى فى ايه

و ارجع اشوف تعاويذ الحكم السحريه من تانى


و بعدين انت بقيت حكم كده ازاى بجد؟؟

مش ممكن

و ايه الدماغ الغريبه اللى صاحبها بيعشق التحكيم ديه

اللى عرفته بعد الماتش ان فيه اكتر من 150 دماغ غريبه فى القاهره بس

اختاروا يكونوا الجندى المجهول و ضمير الماتش

و فوق البيعه اللى بيشيل غضب اللاعبين و المدربين

و اؤلياء الامور المتحمسين جدا


و على سيره اولياء الامور

انا بجد كنت حاموت و تكون معايا الكاميرا

عشان اصور الناس اللى قدامى


3 امهات تعدوا التلاتينات

واحده بتطلع صفافير و لا اجدع مشجع كوره

و واحده بتطبل

و واحده بتصقف

و كلوا بيصرخ


و ابص جنبى الااقى اب

واقف بيتطنطط و بيصرخ


و بعدين ايه التهريج ده مفيش تعليق؟؟!

انا ماليش دعوه عايزه معلق

و شاشه تلفزيون بيتنا مش الملعب الكبير ده

اللى باسرح فيه مليون مره


بس بجد كان حلو

واستحاله كنت حاحس بالكوره اللى بتطنطط قدامى لفوق

و بعدين بتتجه للباسكت و تنزل و عنينا متشعلقه عليها

و كل واحد عايزها تاخد اتجاه فى تليفزيون بيتنا


و الكور الكتير اللى بتترمى فى التدريب فى نفس الوقت

من كذا واحده و كذا ناحيه

طايره فوق شبكه واحده

و تنزل كانها بترقص

و ياتعدى يا متعديش من الشبكه

بجد كان شكلها حلو اوى

بتحس ان الزمن بيقف و هيه طايره فوق


و كم الصريخ و التشجيع و التنطيط فى كل حته

و هم بياخدوا ميدالياتهم و الكاس قدام اهاليهم و لجنه التحكيم

لحد ما بيخرجوا بره و يبقوا ولاد 16 من تانى بيهرجوا و بيلعبوا بيه


صحيح

هى الدنيا لعبه باسكت؟؟

Labels: