اريد حلا!!

بجد حرام اللى بيحصل ده ياربى

انا خلاص تعبت

مين اللى قال ان كل البنات بتحب اللف و شراء الحاجات

بقالى اسبوع بالف لحد ما اتهديت

و مبقاش فيا قطعه سليمه

و ياريتنى رجعت باى حاجه

ياربى اى قطعه حتى

شطنه طيب

اى حاجه

و المهم ترجع البيت خالى الوفاض وخالى من الفلوس

متسالونيش ازاى

نحكى من الاول

اولا ممكن حد يقولى ليه الناس كلها بتتجوز فى الصيف؟؟

واشمعنى سبعه و تمانيه و تسعه!!!

اول مره الاقى كم الخطوبات و الجوازات ده السنه دى

ربنا يكرمهم جميعا

بس لقيتنى باشد فى شعرى

يعنى انا عارفه اشترى هدوم عاديه عشان اشترى سواريه

ياربى القيها منين ولا منين

بقيت شبه سواق التاكسى

بهدومى اللى زهقت منى

السنه دى

و لا عارفه اجيب اى حاجه

منحوس منحوس يا ولدى

طب بلاها عاديه

خش على السواريه

نفسى اعرف مين اللى اخترع موضوع السواريه

و الانتكه ده

مين اللى بيعمل الحاجات الغريبه الى فى المحلات

اللى المفروض يحطوها تحت يافطه

"ما قل و دل"

مش اى حاجه تانيه

و بعدين انا بكره الانتكه

الله يمسيكى بالخير يا بلو

افتكرتك و انا عامله زيك فى بلوج ما

و عماله ابص على ابو ترتر و ام خرز!!

والاسعار اللى كلها تلات اصفار

و يمر الوقت و تقرب المناسبات

و يزيد اللف على اتيلهات و مولات البلد

فى الحر ده

و ارجع خاليه الوفاض تقريبا

و افكر مع نفسى

طب المدعويين عاملين كده

اصحاب الفرح اكيد مساكين

خطوبه و كتب كتاب و فرح

و كل حاجه ليها لبسها

و لف و دور بقى انت و شطارتك

فيك نفس و لال زى حالاتى

و اقول لنفسى اكيد مش حاعمل فى نفسى كده فى يوم م الايام

ياربى يعنى انا مككن فى يوم

الف و الف و الف

و بعدين البس حاجات مش عارفه عامله ايه

و الناس تتفرج عليا

و مين يقول ده عامل ازاى

و دى عامله ايه

قلبى

صبرنى ساعتها يارب

عارفه انى مجنونه وو حتهاجم

بس انا باتكلم على نفسى

و كل اللى عايزه اقوله

لو بصيت على اى حاجه

حتلاقينا بنملاها بكم تعقيدات و تفاصيل مش طبيعى

من اول الكوشه اللى شكلها عامل ازاى

و البوفيه اللى المفروض يكون فيه ايه

و شكل الكراسى و الفيونكات

لفساتين و ورد

و عربيه

و لو دخلت اكتر تلاقى العفش عامل ايه و الستاير على مين

و البقيه تأتى

و لسه السكه طويييله

و انت و نفسك بقى

عشان كده قلبى معاكم

يا كل داخلين القفص

و الاقيش عندك اى حاجه سواريه من غير ترتر و خرز؟!!