Tuesday, January 10, 2006


حد يقولى راح فين العيد؟؟؟

الله اكبر
الله اكبر
الله اكبر
الله اكبر ولله الحمد
الله اكبر كبيرا
و الحمد لله كثيرا
و سبحان الله بكره و اصيلا
صدق وعده ونصر عبده
و اعز جنده و اذل الاحزاب وحده
اللهم صل على سيدنا محمد
و على اصحاب سيدنا محمد
و على ال سيدنا محمد
و سلم تسليما كثيرا

يااه
مقدرش اقول قد ايه
باحب اسمع الصوت ده
من بلكونه تيتى و الشمس لسه بتتطلع
و ريحه عيش الفرن البلدى القريب
معبقه الجو
و الناس كلها بتستعد للصلاه ف الجامع
نازليين من بيوتهم كبار و صغيريين
و انا و قرايبى بنعد العده
و ننزل نمشى فى الشوارع
رايحيين صلاح الدين
شايليين مصلياتنا
و فرحه جوانا


وحشنى الاحساس ده والايام دى
احنا كبرنا و الا ايه
فيين فرحه زماان بالعيد و وقفته؟؟

زى دلوقتى و من كام سنه
كل عيد اضحى كنت بابقى فى السخنه
مع كل العيال قرايبى
هناك الوقفه و العيد كان ليهم طعم مختلف..
نصحى الصبح على عمرو خالد
تلاقى البطاريه اتملت
نصلى الضهر جماعه
و بعديين كل واحد ياخد مصحفه
و يقعد فى حته
تلاقى نفسك
قرب المغربيه
قاعد شايف البحر
و الشمس و السما
فى جنينه الشاليه
و حاسس بهدوء و سكينه غير عاديه
لحد ما تسمع صوت الادان
تانى يوم بيهلوا الناس
و بتمثل القريه العيد
و يتحول الهدوء لزحمه
حتى السوبر ماركت اللى
كنت بتتفسح فيه لوحدك (".)
مليياان و طوابيير وحركات
ننتشر ع البحر
ممكن نتجنن و ناخد السنانيير
و مفيش مانع اسرح و اصطاد نفسى
نشوى اللحمه ع العصريه"مش انا"
مش باكل لحمه تقريبا
بس بيبقى يوم حلو
وحشنى طول الوقت النهارده

كمان ايام مصطفى محمود
مع انتيمه الكليه هوزا
اروحلها
تالاقى افواج الناس رايحه
ننزل من عندها بنجرى فى الشارع
الناس كلها بتجرى
بتجرى بجد
متقوليش بتجرى ازاى
هو فيه جرى بجد و جرى بتهريج؟؟
لا فيه جرى بجد بضحك
بنكون مبسوطين
و بنحاول نلحق مكان
قريب من الجامع
و كالعاده منلحش
بس كفايه انك حواليك كل الناس دول
و الكل بيكبر
بتصلى مع انسان قريب اوى لقلبك
احساس حلو اوى
و البلالين فى كل حته
واطفال و ابهات و امهات
زحمه الاف من الناس
بجد و حشيتنى الايام ديه
و بجد وحشتنى اوى اوى هوزا

1 Comments:

At 6:09 PM, Blogger السـيد شبـل said...

احنا بنكبر فعلا


احنا بنكبر ولا إيه
" سهر الليالى"

 

Post a Comment

<< Home