Wednesday, September 13, 2006

البلد دى اسمها مصر ياهبلة !


البلد دى اسمها مصر ياهبلة !

الوحيدة اللى ملهاش وصف ، والوحيدة اللى فيها كل حاجة ، والوحيدة اللى مظلومة ، والوحيدة اللى مش لاقية عشيق ، والوحيدة اللى ولادها مش بيخدموها ، والوحيدة اللى بتندبح وبتتسرق وبتتحلب من غير ماتقول لا .. هى دى مصر ياهبلة!
من فوق من عند السد العالى والناس اللى زى الشيكولاتة لتحت عند المصب عند الناس بتوع الشبكة والصنارة ورزقنا عليك يارب ، والمصب فى مصر بالضبط عامل زى السرير مصر بتعشق نفسها عليه حالة حب وعلاقة شرعية تشاهدها بلا خجل وأنت واقف أمامه، أما الشيكولاته فحالة فرح وضحكة مستحيل متحركش القلب حالة تزاوج يمكن بين الأرض والإنسان ، حالة توحد يمكن بين البلج الأبريمى اللى مرمى على جسور الغيطان ومية النيل ..مش مهم المهم ان النتيجة كانت شيكولاته .
الناس أغرب مما تتخيل صعب تحليلهم ، تشريحهم، أو حتى دراستهم ، فى مصر "ياهبلة" صعب جدا تفرق بين الضحكة والتكشيرة بين الصراخ والصهللة بين الطيب والشرير .. هى كده ناسها عايشين بالبركة وراضيين بالبركة ممكن يلعنوا خوفهم وهم قاعدين على المصطبة وفى نفس الوقت يتكلموا بشويش علشان الحيطان ليها ودان !
ممكن يعيط الواحد فيهم علشان أبوه مات وفى نفس الوقت بيضحك من جواه علشان الورث ! ممكن تلاقى الواحد زعلان وهو بينضرب على قفاه من رئيسه فى الشغل وفى نفس الوقت فرحان علشان هياخد اخر الشهر كام ملطوش ... هى دى مصر ياهبلة .. الناس فيها تنام..و تنام على الظلم على أكل قوت عيالهم على زلهم وفجأة ممكن يثوروا على قزازة قازوزة أو غشاء بكارة هتكه مسطول فى ليل ضلمه مع أنه قبل كده هتك ياما أعراض فى النور ..
هى دى مصر يا"هبلة" .. الجوامع فيها مش لأهل الدين أبدا، الجوامع فيها للمنافقين يخرج منها بزبيبة الصلاة والسبحة فى إيده وإيده التانية فى جيب غيره بتقلب فى محفظته.. العمة فى مصر متبقاش أبدا على رأس الراجل الشيخ بتاع ربنا ، لا تلاقيها على رأس الرجل الشيخ بتاع الحكومة ..
هى دى مصر ياهبلة والله طيبة وحنينة و بنت ناس أوى تقدر تبقى زى اللليد ى أرسطقراطيك وبرضه تبقى فلاحة شايلة البلاص وبتتدلع تملاه ميه ،هى دى مصر ياهبلة تقدر تاكل فول وبصل وعدس وبرضه تقدر تتعامل مع الشوكة والسكينة والسيمون فيمييه والكافيار..
تقدر تعيش فى عشة على الترعة أو تنام على الرصيف وفى نفس الوقت ممكن تنام على سرير حرير فى قصر فيه 100 أوضة وطقم خدامين .. تقدر تبقى فرحانه وهى بتبلبط فى الترعة وبرضه فرحانه وهى بتسترخى فى البسين !
هى دى مصر ياهبلة تولد من نفس البطن سعد زغلول ومصطفى كامل وناس تحلب فى نفسها علشان خاطر هى تشرب، ومن نفس البطن برضه تجيب أشكال تلزق على الكراسى وتحلب فيها علشان يشربوا ..
هى دى مصر ياهبلة فيها ناس يموتوا على الجبهة وولادهم يتتموا ويتاجروا بيهم فى التلفزيونات وناس كانت قاعدة فى التكييف بتشاور بعصاية طويلة على خريطة يكتبوا إسمهم بمية الدهب ويغنوا لهم فى كل ساعة أغنية "واخترناه اخترناه علشان هبش وفلوسنا معاه"
هى دى مصر ياهبلة .. فيها ناس ركعت علشان يقصوا رؤسهم علشان هم فى الأصل رفضوا يركعوا وناس تانية ركعوا علشان يحفاظوا على روؤسهم وفوقها أثار الجزم ..
مصر ياهبلة حلوة بجد ووحشه أوى ، نفسك تهرب منها، وتبكى لو فكرت انك تبات بعيد عن حضنها ، حنينة وجميلة ، قاسية ، وصعبة ، كريمة أوى وبخيلة ، كبيرة أوى وصغيره فى بعض الأحيان ، عظيمه لدرجة تزهلك وقليلية أوى ساعات ، متحضرة جدا وفى نفس الوقت قمة فى التخلف .. هى دى مصر .. أجمل حاجة فيها إنها مش بتنكسف من نفسها وأوحش حاجة فيها إن ولادها "مش كل ولادها" بيتكسفوا منها ...هى دى مصر كل الحاجات الحلوة أصل أصيل فيها وكل الحاجات الوحشة عمرها ما كان ليها ذنب فيها .. عرفتى ياهبلة الذنب ذنب مين ولا لسه محتاج نرجع نعيد الرحلة من أول منابع النيل ؟
محمد الدسوقى رشدى"صحفى بالدستور"

8 Comments:

At 1:27 AM, Blogger foxamr said...

بجد هي دي مصر و مافيش وصف احسن من اللي انت قولته انا مش هازايد عليك يا عبقري عشان انت جبت من الاخر
عاشت بلادنا عاشت حرة لولادنا و اللهم اعلم ولاد ولادنا هايعملوا ايه

 
At 5:17 AM, Blogger Яαgιи Яαvєи said...

thank you for posting this

 
At 10:48 AM, Blogger أُكتب بالرصاص said...

للأسف
هي د يمصر

بس

كلمتى المأسورة

الماثورة

سحابة وتعدي

وبرضه انت غالية علينا

 
At 8:59 AM, Anonymous abd-elmlk said...

بجد هى دى وصف مصر اللى احنا مش عارفينها

بس فعلا بلوج ممتاز وكلمات معبرة بجد انا عيطت وانا باقرا الكلمات دى مأثرة فعلا

وتصميم البلوج ككل فعلا شاعرى ، مش قادر اقفل الصفحة والله من شاعرية الموقع

 
At 3:38 PM, Blogger Dananeer said...

شكرا يا عبد الملك
دى مش كلاماتى بس بجد اللى كاتبها كان حاسس بكل كلمه فيها و بيعشقها و يخاف عليها

 
At 5:48 PM, Anonymous Anonymous said...

مصر مصر وتعيشى يا مصر وبس خلااااااص

 
At 1:32 AM, Blogger Dananeer said...

ياااه يا انونيموس انت ايه اللى جابك هنا
دى من شهرين ياراجل

 
At 4:46 AM, Blogger sa7afia_rwsha said...

لو دخلتى فى بلوجى هتلاقينى بردة بقول نفس الكلام عن مصر لكن باسلوب تانى
بس حلوة حته بتندبح وتتحلب من غير لا دى
ابقى زورينى بقة
يلا سلام

 

Post a Comment

<< Home