Thursday, September 21, 2006

تخاريف فاطر



ياااه بجد محتاجاه يجيي اوى اكتر من اى وقت
كل مره باقع بوصل لحاله الانهيار و معرفش الملم نفسى غير فيه
المره دى محتاجه الملم حاجات كتيير اوى
عشان كده محتاجاك
محتاجه سكينتك
محتاجه التراويح و شكل الناس فيه فى الشوارع وقت الصلاه و بعدها
و ريحه العود و البخور و احنا رايحيين نصلى
و لمه العيله
و حاجات كتيير اوى

اوحش حاجه لما تحس انك مهزوم
مهزوم اوى و مكسور من جواك
و مش قادر تلملم الحتت المنتوره منك فى كل حته

صحيح وقعت كتير و انهزمت او استسلمت قبل كده
بس كل مره بتلم فيها الحتت المكسره بتلاقى حته ناقصه
المره دى مش عارف تلاقى حاجه

بعتتلى مره قالتلى شارلى شابلن بيقول
"اسوأ ما يكون فيه الانسان ان يكون بلا عمل او حب"
لقيتنى بافكر
اسوأ ما يكون فيه الانسان لما يبنى حاجات و تتهد و ميبقاش فاهم ليه
لما يفقد سند او بوصله و الاوحش مرسى
و لما فى وقت يجيي عليه ميبقاش عارف بيعمل ايه

اسوا حاجه لما تفقدهم يا شارلى
باختيارك
و الاسوأ لو غصب عنك
..........................................................
محستش يوم بحنين مش طبيعى لايام زمان
طول الوقت عندى حاجات لحنين ورا
صحيح مبنعرفش طعم الحاجات و نحس بيها غير لما تروح و تتسرب
وحشانى نفسى اوى مش بس ايام الكليه و المدرسه
و حشانى نفسى و وحشنى و حشانى كل حاجه زمان
خصوصا باليل فى رمضان
و بالذات عند تيتى بالليل بعد الفطار ايام ماكانت بصحتها
وحشنى اكلها و الشاى و اللبن اللى فكرنى بيه عمرو من ايديها
و البطاطس البوريه و الطماطم المخلله و حاجات كتير اوى
محدش بيعملها زيها
............................................................
مبقاش عندى حاجه اخسرها
قدمت استقالتى زى الافلام
قلتلها لنفسى و ضحكت
بما انها اول مره اشتغل و اول مره استقيل
فكان ليها طعم غريب

خصوصا الفراغ التام
و التليفزيون المستفز
و الاخبار اللى ملهاش طعم
و الاعلانات المستفزه

اكتر حاجه حتوحشنى الناس و طيبيتهم
و حبهم
و مكتبى الصغير و المنظر اللى كنت بابص عليه
................................................
بصتلها اوى و هى بتعافر و شايله فوقيها جبل
مصره تسحبه للبيت قبل الشتا ما يجيى
و لقيتنى باحسدها
باحسد نمله!

1 Comments:

At 11:03 AM, Anonymous Anonymous said...

بصراحه كلامك اثر فيا بطريقه فظيعه مع اختلاف الاحساس برمضان الا ان الاحساس ساعه المغرب في رمضان مبيغيرش

كلنا وحشنا رمضان ووحشنا دفئه وهدوءه وسكينته

هانت كلها بكره بس وبعده

 

Post a Comment

<< Home