(تقليب ف اوراق قديمه(1

bluelue عندك حق يا
انا كمان مبحبش الشتا و لا البرد
مبحبش اصحى الصبح الاقى الدنيا عتمه
اتحايل على نفسى اقوم من تحت الدفا و البطانيه
قبل ما يفوتنى اتوبيس الشغل اللى مبيستناش حد ("،)
ملحقش اشرب مجى السخن
انزل الاقى الدنيا مغيمه مفيهاش شمس
و الجو كئيب
ارتعش م البرد
و ف الشغل اتنفض
و نفسى اقولهم زى العيال
انا عايزه اروح بيتنا
و اقوم ادفى ايديا
!يمكنdryer تحت ال
غريبه اوى ان فيه ناس بتموت ف جو الشتا
و بتنتعش ف الشتا
بس برضه عشان مظلموش
انا باعشق امشى ف المطر
و استقبله ف ايدايا
و ادعى تحت المطر
و اتفرج على النيل و الشوارع و الشجر
بعد ما بيغسلهم المطر
شوارع فاااضيه
و شجر خضاره حلو
و نيل هادى و حزين
و باعشق حمص الشام
و الكاكاو السخن ف الشتا
و البطاطا المشويه
و لمه العيله عند تيتى اوقات
ياكلوا ابو فروه اللى مش بحبه
و رجوع الواحد بيت تيتى يلاقى
طبق شوربه عدس اللى باموت فيها
و دفا
و شويه شمس ف البلكونه
اطير م الفرحه
اما اتدفى فيهم
و اطلع لسانى للبرد
و حضن كوكو
لما اجرى على سريرها
و ادخل تحت بطانيتها
تدفينى ف حضنها
كمان مش حانسى انى
طلعت احلى رحلات ف عز الشتا
الاقصر و اسوان
و السخنه والغردقه