عمو محمد و طنط منى و احلى قصه حب
عمرها 25 سنه

المره دى الأغراب مش أغراب علىَ أنا
هو اللى الأغراب مش غراب عليه
مكناش حاسيين بغير كده
بعد ما جمعتنا طربيزه واحده فى الفندق وقت البوفيه
راجل كبير و مراته ست ملامحها كلها طيبه
قالنا ما تخافوش تعالوا اقعدوا
أنا عندى ولاد قدكم و اكبر
انا اللى مربى ... و....
مش فاكره مجرى الكلام
بس حاسه انو حيفضل جوا بشكل ما
كل اللى اقدر عليه
اقول جمل عمو محمد و تعليقات طنط منى
اللى و هما بيوداعونا حسيت انى حاودع حد عزيز علىَ اوى اوى

" مفيش اهم من الست لما تيجى تنام تدى ظهرها لجوزها و هى نايمه و مطمنه
مفيش اهم من انها تبقى عارفه انه حيراعى ربنا فيها و حيحافظ عليها و يحميها"

" متفكريش بعقلك و لا تحسى بقلبك
اركنى كل دول و استخيريه
و الجئى له هو اللى يقدر يدلك و مش حيضيعك"

" أنا امى بتحبها اكتر من اخواتى
و كل يوم الصبح تقولها
ما تيجى يا منى تفطرى معايا"

" اوعى تخافى على حاجه
غير اللى بينك و بينه
طول ما انت بقربى و بتصلحى اللى بينك و بينه
متخافيش على حاجه
و حتتصلح احوال حاجات كتير و ناس كمان حواليكى
حتصلحى انت كمان"

" انا عمرى ما شلت هم لفلوس
وسبحان الله عمر ما حد من ولادى طلب منى حاجه الا و امد ايدى و اقوله خد"

" أوعى يا بنتى تنامى و انت ظالمه
الظلم وحش اوى حيقف و مش حتبلعيه ابدا
نامى مظلومه بس اوعى تنامى ظالمه
الظلم فى الآخره حيبقى ظلمات"

" حتعيشى قد ايه فى الدنيا و تاخدى ايه منها؟؟
ستين تمانين ميت سنه!
طب و الآخره؟؟
مخلدين فيها..."

" عمرى ما زعلتها و لا نيمتها و هى زعلانه
انا راعيت ربنا فيها عشان كده هيه بتراعى ربنا فيا"

و تقول طنط منى
"عمره ما زعلنى و لا خلافاتنا خرجت بينا"

" انتو جيل مظلوم اوى
جيل متعلمش حتى يشيل مسئوليه
و مطالب بحاجات كتير "

" الفلوس اللى بيديها الابهات
ف ايد ولادهم بقت هى البديل"

لازم نمشى مستانينا على العشا ..
محدش فينا يرضى ياكل من غير التانى
كلنا مع بعض مهما اتاخر الوقت