كان نفسى احضر الامسيه لولا العاصفه

ليه يا حبيبى كل ما ادخل أوضه ألقاك فى نتظارى
و أجى المسك تبقى بخار من ضى؟
و كل ما أمشى ف حى
ألقاك على سطوح البيوت
ريحان منبت فى القصارى
و طير معشش فى شق
و اجى اندهك..تطير..
ترفرف من سطوح لسطوح
أنا صوتى ليه طالع كده مبحوح؟
نفسى أضم حبيبى و أخد منه تارى
طال المطال على حبنا المجروح
على حضن مش مسموح
.................................
جلابيتك فى الشمس ..لا بتنشف
و لا حبل الغسيل بيبوح
فين انت..يا صاحبى الوحيد
فين حضنها الدفيان ..عينيك
و انا باحبى ع الأشعار ..و باتسند عليك
مش كنت فوله و انت حطيتها بإيديك؟
حطيتها ع الشباك
و دبت ف ميه النيل فى العصارى
ليه يا حبيبى كل ما ادخل بيت اقول
دا سجن أشواقى إليك؟
أنا ضلمه و انت بعيد
و اجى اعتذر للنور ما يقبلش اعتذارى
ليه يا حبيبى قبل ما الحق اقول بحبك
خلص الغرام فى أول التنهيد
و باقول باحبك للكراسى الفاضيه
للمكتب البردان و ضلَك مش عليه
لكن..تصدق بإيه؟
انت الوحيد المالى دارى
براح غيطان أخضر
و باقى الكون ..برارى

"بهاء جاهين"