ايها الساده اقترحواو قولولى رايكم
بلوج رحاب فتح نفسى على اقتراح
تبديل الكتب ممكن
اقتراح مكاتب فيها حاجات حديثه
تجمع بلوجاوى ثقافى ممكن نتكلم فيه عن كاتب او كتاب
معرفش يعنى تنظيم بلوجاوى ثقافى
و و النبى محدش يقولى مكتبه مبارك
و مكتبه مما سوزان و بلا بلا بلا
انا لسه مكتشفه من بلوج كتب خان
و ان شاء الله ناويه استكشفها
فيه حد كان قالى ان فيه مكتبه حلوه فى الزمالك
لو حد عنده معلومات
مجربتش استكشف كتب الساقيه بس ناويه
اللى خلانى افكر فى كده حد ملوش دعوه بالشبكه و عالم البلوجات
قلتله مبقدرش اقاوم ادومان النت و البلوجات و انى عايزه ابقى عارفه
قالى بس انتى مش بتعملى حاجه باللى انتى بتعرفيه
مبتغيريش حاجه بالبلوج بتاعك
مبتوصليش اللى عجبك فى حته
تفتكروا ايه يابلوجاويه؟؟
اقترحواااااااااا افيدونا
posted by Dananeer @ 4:15 PM
7 comments
7 Comments:
اعتقد قصدك مكتبة "الديوان" يا بيبو اللى فى الزمالك.. اسمع انها حلوة قوى قوى
بس غالية قوى قوى
:D
يعنى غير اقتصادية بالنسبة لى
اما بخصوص تجمع بلوجوى،، فا بصى يا بنتى اللى ح يحصل ان اول كام تجمع الناس ح تقعد تتعرف على بعض و محدش ح يناقش حاجة
خديها منى حكمة..لول
بس،، لو نظموا مثلا جمعية للكتاب، ومثلا قرروا كتاب الشهر و معرفش كدة،، زى نوادى الكتب المنتشرة سواء فى مصر او برة...
ممكن تبقى فكرة لطيفة و خفيفة الدم
لكن عموما عموما، لو نفسك تبقى عارفة،، يبقى تضغطى على نفسك شوية، وتسيبى النت (شوفى مين بيكلمك) بس لاء بجد
فى حاجة ظريفة، اقرأى فى المواصلات دايما (لو مش بتسوقى) واعملى لنفسك مثلا عادة ثابتة انك تقرأى ساعة قبل ما تنامى، مثلا
بس، بالنسبة لى الطريقتين دول بيعملوا مفعول السحر،،، وبلاقينى بقرأ مع انى ِديدة التعلق بالنت
:)
بس سيبك يعنى من كل اللى فوق دة
أنا بقى عايزة اشوفك بجد يا هبة
الله
!!!!!!
لست أدري نسيت تقول لك إنها كانت عاملة بلوج عن الكتب و بقدرة قادر اختفى (أعتقد كان اسمه ع الرف)ـ
الحكاية مش محتاجة مقابلات ولا اجتماعات. لو مجموعة من الناس اتفقت تقرا كتاب و بعد كده تكتب رأيها و ملحوظاتها في
(blog, mailing list, etc...)
أعتقد دي ممكن تكون بداية معقولة. بس طبعا أصعب حاجة إن الناس تتفق على الكتاب اللي حيقروه
أما بخصوص ديوان، ماعتقدش إن فيها أي حاجة مش موجودة في المكتبات التانية (في ما عدا الجو المتأمرك طبعا). مكتبة الشروق بالنسبة لي هي المكتبة اللي لازم أزورها لما بانزل مصر، بمكن عشان دار الشروق هي الناشر لأغلب الكتاب اللي باقرا لهم
السلام والتحية
أولاً بالنسبة لديوان مكتبة "نضيفة" فيها كتب غالية جداً وفيها كتب بأسعار عادية جداً 5 و 6 وعشرة جنيه فى الطبيعى يعنى ... وجوها مش متأمرك أوى كل الحكاية إنها بيروحها ناس أجانب كتير .. وفيها ركن كافيه .. وكتب أجنبى كتير جداً.. بصى أصل أنا بحب المكان ده جداً جداً فهتلاقينى متحيزة ليه .. وفعلاً إقتراح لستُ أدرى هايل .. مافيش مجال للقراية بالنسبة غير زى ما قالت يا فى المواصلات يا ساعة قبل النوم .. واللى بيحصل أكتر المواصلات .. وممكن تحويشلك قرشين جامدين وتنزلى على معرض الكتاب تشترى كل اللى نفسك فيه هيكفيكى طول السنة ويمكن اكتر .. وكل واحد يقدر يغير فى اللى حواليه لو غير نفسه الأول ده رأيى المتواضع بشدة ..
مش شايف ان في فرق كبير ان يكون التجمع بلوجاوي او غيره طالما ان انت نفسك مدوِنة
ممكن أي مجموعة تعمل نوع من نادي الكتاب
يعني انت ممكن تبتدي مع مجموعة من أصحابك
وتعملي له دعوة على المدونة لو تحبي تجمعي عدد أكبر من الناس وطبيعي هيكون فيهم مدونين
اعتقد ان في طريقتين اساسيتين في انظمة نوادي الكتاب - ياريت لو حد يدينا افكار تانية
الطريقة الأولانية إن المجموعة تتفق على كتاب كل واحد يقراه مع نفسه وبعدين يجتمعوا سوا ويتناقشوا فيه
الطريقة التانية ان شخص واحد من المجموعة يقرا كتاب ويعرضه على الباقيين في اجتماع ويناقشوه مع بعض
ميزة الطريقة الاولانية ان الكل بيتعلم اكتر عن الكتاب لانهم كلهم بيقروه
والمناقشة بتبقى اكثر عمقا ووجهات النظر بتبقى اكثر تنوعا طبعا لان الكتاب بيبقى اتقرى من مجموعات وجهات نظر مختلفة
ميزة الطريقة التانية انها اكثر عملية لانها بتتخطى مشكلة الاتفاق على الكتاب اللي بتبقى صعبة خصوصا لو المجموعة كبيرة او اهتماماتهم مختلفة
الميزة التانية ان بتقدر تدي فرصة لعرض كتب اكتر في اجتماعات قريبة من بعض
وبرغم ان العرض بيبقى من وجهة نظر واحدة لكن المناقشة ممكن تبقى ثرية لو في تنوع بين المجموعة
وبتدي فرصة ان اللي تشده افكار كتاب يتعمق فيه اكتر انه يروح يقراه
من عيوب الطريقة دي برضه انها عادة بتجمع مجموعة من الكسالى في عالم القراية ويكتفوا بعدد محدود منهم اللي يقرا ويعرض عليهم
يعني نقدر نقول ان الاسلوب الأول أكثر عمقا والثاني عملي أكثر
وتفضل في الفرصة ان بعد كل اجتماع لمناقشة كتاب - أيا كان الأسلوب - ممكن يتعرض ملخص للكتاب أو للنقاش على المدونة
وممكن تتعمل مدونة مخصوصة لعرض الكتب بحيث إن كل واحد بعد ما يعرض الكتاب يكتب على المدونة الملخص
او واحد يتطوع انه يعمل ملخص لكل اجتماع
في كمان فكرة تدوينية تانية ان يتعمل مدوتة مخصوص لعرض الكتب وكل واحد يقرا كتاب يعرضه على المدونة والمناقشة تبقى من خلال التعليقات
وبكدة يبقى نادي كتاب تدويني مش محتاج ان الناس تتقابل او تتعرف
والنشر يكون عن طريق منسق المدونة اللي بيتلقى الايميلز ويعرضها
او ان كل اللي يحب يشارك بكتاب ينضم لمحرري المدونة وينشر اللي عايزه
دي مجموعة من الأفكار العندي ياريت تنفع في حاجة
بس نقطة مهمة تانية انك ممكن تناقشي افكار كتير لكن خدي بالك انك طالما انت اللي طرحت الفكرة فالكل هيساهم بافكاره
لكن محدش هيعمل أي خطوة الا لو انت اتحركت
ده برضه نتيجة تجارب سابقة
:)
minesweeper
كان فعلا موجود بلوج ع الرف،،، بس لغيته،، وحتى دون ما ارجع لاصدقائى المشاركين
حالة من الاحباط حاصرتنى لانى اقللت فى العدد اللى كنت بقرأه سابق،، غير انى معرفش،، بس بتخنق برضو لما بخلص كتاب و مالاقيش شئ اقوله،، او ما بصلوش من زاوية ممكن حد يستفيد منها
فا قررت الاغلاق
لو تقرروا تعملوا نادى الكتاب دة أون لاين،، ونفتحه مع بعض،، بس يبقى المشاكة فعالة مع الناس كلها
اعتقد انى ممكن اتحمس تانى، ليه لاء
أعتقد إن مكتبة ديوان ، اللي هتقابلك آخر الكوبري في اللي بينزلك على الزمالك لو انتي جاية من وسط البلد ، ليست سيئة ، لكنها في المقابل أسعارها مرتفعة ، الجميل فيها هو أنك تقدري تقعدي وتقري هناك وانتي بتشربي النسكافيه بتاعك
فكرة التجمع التدويني للقراءة فكرة جيدة لكن للأسف مش كل المدونين بيحبوا يقروا ، وبعدين كل واحد بيقرا نوعية مختلفة عن التاني
بالمناسبة
أنا قريت تعليقك عند رحاب
وبالنسبة لديوان " موسم زرع البنات " بتاع كوثر مصطفى ، فده كان صادر عن هيئة الكتاب أوائل التسعينيات تقريبا، سلسلة إشراقات أدبية ، وبدراسة لم تكتمل للدكتور عبد الحميد يونس ، لانه مات قبل ما يكملها ، وهو بالمناسبة عندي ، لو عايزاه ممكن ابعتهولك
بصراحه كان تفكيرى فى حاجتين و انا باكتب الكلام ده
نفسى استعيد حاجات تاهت فى السكه مش عارفه ليهو نشجع بعض نعمل اى حاجه نحس ان ليها قيمه
الحاجه التانيه
ناااااااااااااااس
ساعات الواحد بيحس باحتياج غير عادى للناس اللى مش عارفهم دول و فى نفس الوقت عارفين اللى جواه
و عارف اللى جواهم و فى بينه و بين الناس دى شعره مشتركه
رغم انى مش باحب التجمعات و لا الندوات ولا اى حاجه من الكلام ده
بس بجد حبيت اتعرف على الناس دى من قريب و على البلوجاويه البشر على ارض الواقع
للاسف مروحتش الحفله
معرفش حد معرفه شخصيه و ملقيتش حد مجنون عندى يشجعنى
ما علينا
كل اللى اتمناه يكون لينا نشاط و صوت على ارض الواقع كمان
بلو انا فعلا و لحد قبل ما اشتغل
مكنتش بانام غير على كتاب
و فى سفر او موصلات بيكون معايا كتاب بس باميل اكتر انى اتفرج فى الطريق و بحب اقرا فى هدوء
معرفش ايه اللى حصل
ليه البعد الغريب بينى و بين الكتب
عشان كده عايزه اجيب كتب جديده
بس عندك حق يا بلو
ياااااااااه يا محمد انا كنت فقت الامل انى الاقيه
ياريت تسلفهولى
Post a Comment
<< Home