حدوته
فنان فقير على باب اللهالجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت
posted by Dananeer @ 9:08 AM
15 comments
15 Comments:
لما بنام بحلم وباعيش
صحيتني ليه يا شاويش يا شاويش
جامده اوي
ايه ده هو لسه في ناس بتحلم يا عيني هتدفعوا الضريبة الجديدة بتاعة الاحلام ربنا يكون في عونكم انا عن نفسي بطلت اعيش وبطلت احلام لاني عملت كل حاجة ممكن شاب يتمناها ومن كتر الانجازات الي حققتها في بلدنا ربنا يخليها مش لاقي حاجة احلم بيها حتي امبارح خير الله ما اجعلوا خير نمت حلمت لقيتني رايح اعمل اصلاح سياسي في دولة معفنة اوووي وصحيت علي جردل ميه واخويا بيقولي اطلع نام فوق السرير انت وقعت والدنيا برد
بما إنه وجيه وبما أنى حبه شكرا
بس على راى وجيه
البحك زى البكا خالص تلامذة وفصول ومدارس
يارب تكونى بخيير
بما إنه وجيه اللى انا بحبه ..يبقى شكرا
وكمان عاوز اقول على رأى وجيه
الضحك زى البكا خالص
دير بالك على نفسك
يارب تكون بخير سلام
أتمنى إضافة إن الكلمات الرائعة دي لفؤاد حداد، على الرغم إني متأكد من إن كل اللي بيسمعوا وجيه عارفين
جامدة طبعا لوجيه التحفة
",
الاغنية دى من روائع فؤاد حداد
انا بحبها اوى و خصوصا الحتة اللى بيقول فيها
بتقول عليا كبير السن و ان فى قلبى ولد كتكوت
تحياتى لذوقك الجميل
أشكرك علي نشر تحفة صديقي العزيز .. وجيه عزيز ‘ شوفي إزاي الإحساس بكلام المبدع فؤاد حداد
لسه ممكن رغم كل شئ
المدونة جميلة .. سعيد بالزيارة
الاخ اللى ابتدى يشكرنى و بعدين نزلت الشتايم و التريقه
بص انا متفرقش معايا و مكنتش ناويه اعلق اصلا
بس كونك تستهزى بتفاصيل حياتى
بتقرا ليه
وصلت للحاجات القديمه ليه
مفيش داعى ابدا لكلام سخيف
حقيقي أنا مش عارف إنتي تقصدي مين ! أنا اللي قلت أشكرك علي أحلي أغاني صديقي وجيه عزيز .. فين بقي التريقة ولا الشتيمة هنا ... وفي اخر كلمة سجلت أعجابي ب المدونة .. أ{جو إني مكنش أنا المقصود
تحياتي
الحقيقة أنا مش عارف إنتي تقصدي مين .. أنا الوحيد اللي شكرتك علي غنوة وجيه بجد تحفة وعبقرية اللحن في نقل إحساس فؤاد حداد .. فين بقي التريقة والشتايم هنا .. وعلي فكرة أنا صديق وجيه عزيز فعلا وبفرح لما بشوف أعماله موجودة عندكم ومبقدرش أحوش نفسي من التعليق ! وفي أخر الكلمة سجلت أعجابي ب المدونة .. أ{جو إني مكنش أنا المقصود
أشكرك تاني
انونيموس
مش غريب انك تلاقى مدونه بالصدفه و ترجع تشوف الرد عليها
عموما فيه حاجه اسمها
confirmation
بيجى بكل تعليق فى اى بوست لكل المدونه
و فيه توقيت
و حاجات كتير
عموما لو فيه اتنين انونيموس
انت و العفريت
فشكرا و لا يهمك
".
لم تكن الزيارة صدفة ولا التعليق صدفة ولا العودة صدفة والتعليق إتكرر عن طريق الخطأ ومكنش في تأكيد عندي إن الرسالة وصلت فعلا وعلي فكرة برضة التعليق ده مش صدفة ومتعمد أشوف ردك لأن إفتراض سوء النية أمر ضايقني جدا .. وأنا والعفريت واحد ,اشكرك ع الرقة في الرد
وها أشكرك تاتني علي غنوة وجيه عزيز
Post a Comment
<< Home