سلملى على التعداد

كان المفروض انى فاتحه البلوج اكتب عن الصنف
ما علينا نتكلم عنه فى وقت تانى
قطع حبل افكارى جرس الباب
و بعد ما قمت فتحت لقيت بنوتين بيقولوا تعداد
مجمعتش قالوا ايه..سمعى على قدى بقى
مليش فى الكلمات السحريه السريعه
لقيتهم بيقولوا تانى احنا بتوع التعداد
اخيرا بتوع التعداد اللى بيقوالوا عليهم
طيب تعالوا يا جماعه مدخلوش
معرفش ليه كان عندى اعتقاد ان الموضوع بجد
و الحكومه عمله شغل
المهم شوفوا الاسئله و قولولى تعداد ايه ده
رب الاسره موجود
لا ده منزل ورثه
يعنى مين اللى عايش هنا بالظبط
ده بيت جدتى
انا و جدتى
اساميكم
......
فيه كام شقه فى البيت
بما انه سؤال مش متوقع
قعدت ابص حوليا و اعد
قولى اى حاجه مش مشكله
مخلصه و لا بتدرسى
مخلصه
مخلصه ايه
هندسه
فيه كمبيوتر هنا؟
نعم؟ليه؟
مفيش رد
قلت اه و انا مستغربه من السؤال
طب بقولك ايه مفيش حد تحت
لا بس هيا ست عجوزه ساعات بتكون عند ولادها
طب متقوللنا بيانتها
معرفش
طب هو فيه حد فوق

اه
طب متقوللنا اساميهم
طب متطلعوا
انتى مش عارفه بيانتهم
مفيش رجاله فوق؟
لا مفيش ممكن تتطلعوا
و طلعوا
و بعد شويه نزلوا مع صوت بيقول
احنا هنا بيت محترم
و كل اللى ساكنين محترمين!!!

ما علينا
اولا تعداد ايه ؟و كوسه ايه؟
بالمنظر ده حنشوف مسخره
احنا بتكلم على الاماكن و المدن الرئيسيه
متكلمناش على المجاهل و العشوائيات اللى بطولك يا مصر
من اسكندريه لحد النوبه و حدودنا مع اسوان
اللى مش عارفه حيعدوهم ازاى

ثانيا البنات كانوا ماسكين كشكول و استمارات مملوهاش
كشكول صغير بيكتبوا فيه بالرصاص و بين كل سكان شقه و التانيه خط
حاجه كده شبه خريطه العشوائيات لو عملولها خريطه

اخيرا حد يقولى ايه علاقه الكمبيوتر بالتعداد؟؟؟

و حسب علمى فيه اعلانات بتقول تعاونوا

و اكشفوا عن اسامى ضيفكوا
و حنوفر فرص عمل لولادكوا!

اعتقد اننا حنشوف تعداد مسخره
محتاجين نزود كام مليون عليه