BP و قصه حياه مج
شايف المج اللى فوق ده؟
ده المج بيتاع حضرتى
ممكن ميعجبكش شكله
ولا كونه بتاع شركه
بس انا من اكتر من عشر سنين
لما لقيته مكنتش متخيله اننا حنبقى مع بعض كل ده
و انه حيبقى مجى اللى مش باشرب حاجاتى غير فيه
و اللى باخدوا معايا و انا مسافره
و اللى باحب احضنه بين ايدايا
و احس ببخار الهوا الطالع منه و اشم ريحته
وادفينى بيه
و لما بيتعرض للحوادث قلبى بيقع
و احس انى بجد حازعل اوى اوى
لو حصله حاجه
يمكن عشان بارتبط بحاجاتى بسرعه
و مش باحب اغيرها
بنعدى كتير سوا
و كل حاجه ليها ذكرياتها
.....
ما علينا من سنه و بالتحديد
بعد 8 شهور غلبانه مش لاقيه فيهم شغل
و بعد ما اشتغلت و فى مجالى
اللى دخلته مش عن حب
و كنت ناويه مشتغلش فيه
و بعد ما اشتغلت و حبيت الشغل اوى
و حبيت مجالنا
فى لحظه لقيتنى بابص للمج كأنى باشوفه لاول مره
و اقول لنفسى غريب اوى
انى من 10 سنين كنت لسه فى المدرسه
و ارتبط بحاجه بتروليه
و ميبقاش مجى بس تبقى حياتى و مستقبلى
..
انا ليه باقول الكلام ده دلوقتى
عشان امبارح كنت بامتحن فى شركه
نتيجه اتحاد شركه المج و شركات تانيه
و ابتسمت و انا بافتكر مجى
و كل اللى بقيت باحلم بيه
اشتغل هناك
اشتغل مع الناس دى
عايزه اشتغل فى الجو ده
مش حازعل لو متقبلتش المره دى
بس اوصل للمحطه دى
عارف يعنى ايه تتعامل كبنى ادم
و انسان ممكن يعمل كتير
عشان كده بيتوفرله حاجات كتير
انا عايزه اقول كتير
بس لازم امشى دلوقتى
أدعولى
posted by Dananeer @ 1:11 AM
24 comments
24 Comments:
يالهوى ...........انا لما شفت المج ده مصدقتش وكنت هعيط
المج ده بتاعى
عارفة....
انا عندى مج زى ده بالظبط
ده مج غالى على اوى وعندى من اكتر من عشر سنين برضو
من الشركة اللى بابا الله يرحمه كان بيشتغل فيها وعشان كده هو عزيز على اوى عشان
بيفكرنى ببابا
وف يوم اتكسر
زعلت اوى
وحطيته ف اوضتى، على المكتب واحتفظت بيه ،ماما كل اما تشوفه تقوللى مش هترميه بقى ولا انتى غاوية كراكيب؟
شلته وخبيته ف مكتبى عشان محدش يرميه
والنبى يا دنانير ...خلى بالك منه اوى
وربنا يوفقك وتشتغلى فى الشركة
ربناااااااااااا يوفقك
نضال
انا مبسوطه اوى
مش انا لوحدى
انا اسفه اوى ان بتاعك اتكسر
انا عارفه انه احساس وحش اوى
خصوصا انه بيفكرك بباكى
ربنا يرحمه
و ربنا يخليكى
بجد نفسى اشتغل هناك اوى
:)
ربنا يوفقك ان شاء الله
انا كمان داخل على شغل جديد ...ادعيلى انى اقبل فيه انا كمان
يا رب معاكي و يوفقك
انا كمان عندي مج عليه ويني ذا بووه.باعشقه :)
dead man
ان شاء الله و شاكريين مهللين على الدعوه
واحد من الناس ربنا يوفقك
و تتقبل
وئام نورتى البلوج
انا باعشق وينى
فيه فتره كنت باجيب حاجات كتير عليها صورته
قصه ارتباط بينك وبين المج جميله
:))))
ربنا يوفقك دائما للخير
فعلا قصة حلوة ومؤثرة اوي
يمكن عشان انا كمان برتبط بالحاجات بتاعتي كده زيك وما بسيبهاش بسهولة ولا برمي حاجة ابدا
ربنا يخليهولك
ربنا يكتب لك الخير
ربنا يوفقك
الارتباط بالجماد معناه زيادة في الرومانسيه
يعني لما تيجي تبيعي موبايلك القديم تقولي يا ترى اللي هيشتريه هيحافظ عليه ولا لا؟؟؟
تحياتي
دنانير العصفورة البلوج بتاعك جميل قوي
والانسان لما يرتبط بالحاجات الي حوليه ويحبها بيكون انسان اصيل محب
بتمنالك التوفيق ويا رب تشتغلي شغل تحبيه
تحياتي
محمد
ربنا يخليك
عبدالله عامل ايه؟
فله
فعلا الواحد صعب ميرتبطتش بحاجاته
اللى بيستخدمها
و حواليه طول الوقت
محمد
متشكره جدا يا فندم
عبدالله
مش عارفه
بس هيه نوع من الحميميه بينك و بين حاجات موجوده فى مشاهد حياتك
و يومياتك
صعب اوى مترتبطش بيها
ألفه ممكن
رشا
متشكره اوى
sa3at ba7eb 7agat
may7ebhash 3'eery
fel ray7a wel gayat
ba3'any ma3a teery
rabena yekhaleek ya monir
يارا
انا باعشق الاغنيه دى
أنا كمان عندي مج مميز بحبه جدا وكان معايا نسخة تانية منه في الكلية ولما جيت في سنة رابعة أمشي واحدة صاحبتي كانت أعز صاحبة ليا في السكن خدته مني علشان يبقى ذكرى بس انا شرطت عليها إنها تحافظ عليه وفعلا لما جت تتجوز كتبته في القايمة على جوزها وكتبت جنبه مج تسنيم ومن يومها وجوزها عاينه في النيش خوفا علييه.
إنتي فيييين من زمان مشفتكيش
تسنيم
كمان القايمه
انا منه أغير
:)
ياستى انا مشغوله بوضوع الشغل ده
و قبلها كنت مكتئبه
حلوة فكرة التوحد الجميل مع أشياء تبدو عبيطة لكنها ساعات بتبقي محطات حلوة في حياتنا .. ‘ فكرتيني يا دنانير بالأحلام الجميلة .. مقابلة في ( جابكو ) بترول خليج السويس وأنا قاعد ع الكورنيش قبل الأمتحان اللي كان في موبيل أويل مواجه للمرديان وعمال أقرا كلمتين يمكن يكون فيهم وبيهم الحلم وإدعيلي ياما .. الشركة دي حلوة وأنا عايزأشتغل فيها يارب .. لحد مالقيتني في رأس شقير البحر الأحمر مش مصدق إني قبلت وإبتدي المشوار والحمدلله .. شكرا يا دنانير علي البوست اللي فكرني بحاجات جميلة ... لومعملناش حاجة نكون بنحبها .. صدقيني ده يبقي الموت الأكيد
تحياتي
عبدالله
العمدة
متاكد اننا منعرفش بعض؟!
عموما دعواتك
و معاك حق
احلى حاجه اننا نعمل حاجات و احنا بنحبها
بس عشان نوصل لده لازم نعمل حاجات كتير مبنحبهاش
مفيش حاجه سهله دلوقتى
صدقنى مش سهل انك تقول
مش شغال غير لما الاقى حاجه احبها
اتمنى تكون مبسوط فى شغلك ياسيدى
الحاجات البسيطة بتفكر الانسان بالاحداث اللي شهدتها الاشياء التي نمتلكها
لعل المج يذكركي بلقاء او مناسبة او محادثة
وفي النهاية يتحول المج الي صديق او رفيق
تدوينة في منتهي الانسانية :))
ابن عبد العزيز
او شريف لو ذاكرتى صح
نورت اولا
و متشكره اوى ثانيا
بجد حلو قوي انك تحبي حجاتك وان يكون في ارتباط بينك وبينها فكرتيني بأختي مرتبطه قوي بفنجان القهوه وتسافر بيه في كل حته
رضوى
:)
انا بقى يا ستى باحب اشرب قهوه بس مش من ايدى
رشا التدوينه بتاعه الفرح حلوه اوى
كنت عايزه اقولك معلش متزعليش
اكيد حتبقى وحشاكى اوى اوى
بس محبتش اضايقك
تدوينة دافية أوي
ربنا يحمي المج وأصحابه :)
أنا بقى أكتر الحاجات المرتبط بيها أوي أدوات بابا الله يرحمه.. هو ما كانش ليه مج..
بس شوية أقلام خط عربي وورق دشت بخط ايده والمكتب اللي كان بيقعد عليه في الشقة القديمة وصورتي وأنا صغير وهو ماضيلي عليها و ... و..... و .......
المج بقى جالي هدية في عشرينات :) عليه لوجو عشرينات وصورتي و جملة "صباح الخير يا مصعب" بالإنجليزي من أحد زميلاتنا اللي هي حاليا في الكويت
مصعب بجد ليك وحشه
المهم تكون بخير
ربنا يرحمه يا مصعب
و بعدين الاقلام و الورق اقرب حاجات لينا
ورق الدشت ده انا نفسى اشوفه
تقريبا يسرا اللى كانت فى الكويت؟؟
فيه حد بنت البلد اتكلمه عنه؟
Post a Comment
<< Home