اسمع ضربات جرسك
اسيب مكانى و اروح لقوضتك
محتاجانى اساعدك
تقولى حاتعبك كده معلش و انتى زعلانه
معلش ليه ده انا باحب اشوفك و بحبك تنادينى
اقومك تسندى عليا و انتى مش قادره تمنعى صرخاتك و احساسك بالام
و تمسكينى زى ما اكون طوق نجاه
زى طفل صغير مكلبش فى مامته
و انتى عماله تقوليلى اوعى تسيبينى
كل مره باسمعها منك
بابقى عايزه اعيط
و اقولك انا مقدرش اسيبك يا كوكو
اوعى انتى تسيبنى
انا ولا حاجه من غيرك
و اخدك فى حضنى
او استخبى فى حضنك عشان اطمن و احس بدفاكى

انا و انت ودعنا السنه اللى فاتت مع زياره دكتورك
و ألم جديد وقفت قدامه عاجزه و حاسه بغضب مالوش سبب
الحمد لله
مفيش كسور
و الالم بيروح
كوابيسى هيا اللى مش راضيه تفارقنى