ليه سبتمبر حزين

لسه راجعه من الحسين
مش عارفه ليه مش مبسوطه اوى
جايز عشان العربيه عملتها و عطلت منا و احتنسنا
ماشين نحايلها طول السكه
معرفش برضه
تخيلوا انى مشفتش فوانيس غير النهارده
بعد كسر الاعتكاف و النزول من البيت
بس مش معترفه بالفوانيس الارنوبيه و الدبدوبيه دى
باحلم بفانوسى بتاع زماااااااااااان
معدن و قزاز مسطيل بباب بيفتح
و الوان اخضر و فوشيا و احمر
حاجه كده زى فانوس عفركوش بتاع اسماعيل ياسين
و افتكر زمان كنا بنحب نطفى كل انوار الشقه
و كل واحد يمسك فانوسه
و امسك انا فانوسى المعدن ابو شمعه بتلسعنى شويه
و نلف فى الشقه و نقول وحوى ياوحوى
كانت قمه سعادتى ساعتها
..............................................
اول مره اقعد فى الفيشاوى و انا كبيره
مكنتش متخيلاها كده
كنت فاكراها اكبر و اوسع و دورين معرفش ليه
و كنت متخيله جو مختلف شويه

الحسين على غير العاده فى رمضان
مش زحمه اوى
جايز عشان اول يوم
و مع ذلك انا باحب المكان و الجامع اوى
من سنه عملت جوله مع ابن خالى اللى محدش بيفسحنى زيه و عمو
من السيده زينب للسيده نفيسه مرورا بالسيده عائشه و اخيرا الحسين
اليوم ده انا مش حنساه بجد
مكنش رمضان
بس كان يوم ليه طعم
المطر كان بينزل
و الجو كان فيه هدوء و وداعه غير عاديه
و كل جامع كان ليه طعم
حتى الناس و انت شايفهم جوه بيصلوا و بيدعوا و بيتهلوا
متشفعين باهل البيت
افتكرت اوى قنديل ام هاشم
و بعد ما خلصنا لفينا فى ساحه الحسين
و شوارعه شويه
و ركبنا العربيه و روحنا
كان بالنسبالى يوم روحانى و استكشافى
حافضل فاكراه
...............................................
بافتكر هوزا و انا هناك
و هى بتدندن
ساكن فى حى السيده و حبيبى ساكن فى الحسين
و كانت بتحبها و تغنى و هى بتتمزك و تتقمص الشخصيه

دخان الشيشه كان مغطى كل حاجه
بس كانت القعده حلوه
اتعزمت على كوكتيل بالرمان
و قعدت اصطاد

سياح فى كل مكان
بشتروا فول سودانى و فل و ترمس
و بيرسموا تاتو بالحنه
و يشربوا شاى بالنعناع و يصبوه من البراد
بس كانت حافطس من منظر شويه و هم بيشربوا الشاى بطريقه تضحك
الشاى بتاعنا له طقوس

بموت فى اى حاجه قديمه
قعدت استكشف البيوت
و المحلات و الشارع
و الاباليك اللى بيعجبنى اوى شكلها

حاجه من الحاجات اللى كان نفسى اعملها
اقعد فى قهوه
قهوه بلدى
بس معرفش
واضح انى مش حاحس بمتعه كامله
الا لو كنت متنكره كولد
و تقعد تدوب مع الحوارات و التفاصيل
القهوه حاجه ليها مذاق كده
متقوليش كوفي شوب ولا نادى و لا اى حاجه
تعوضك عن المتعه دى
لمه اصحابك
الزحمه و الدوشه
الغنى جمب الفقير
ابو جلبيه حمب ابو شوز نيك و جينز جنب بدل الموظفين
تشكيله ارواح مختلفه و احاسيس مختلفه و تفكير و حتى شكل مختلف
بتجمعهم القهوه و تاخدهم فى حضنها

كتير لما بازهق و الاقينى مش عارفه اروح فين و لا اعمل ايه
و اتخنق من زحمه الشارع و المعاكسات
اقول لنفسى يااه
نفسى اروح قهوه
تنزل تاخدك رجليك لهناك
مش لازم يوم التجمع بتاع الشله
بس بتبقى عارف انك اكيد حتلاقى حد
و لو ملقتش عندك ناس و زحمه و حواديت
حيدفوك و متحسش بوحده او زهق

باحلم مع سطور الكتب
بزمان تنزل ريتش تلاقى لمه بيتكلموا
و تروح صالون مى تتفرج و تسمع
و زحمه و ناس و دوشه
و لف فى الشوارع
يااه لو الواحد يقدر يعيش متمرد كده

افتكرتك طول الوقت و انا باشوف الارابيسك
و احنا بنتمشى فى الحسين
و احنا معديين على الازهر بارك
و انا باشوف منظر السما و القلعه و الازهر و الحسين و الانوار الصفرا اللى بتدفينى
و واحنا معديين فى زياره للمعادى
فى سبتمبر زى اليومين دول بدات الحدوته
عدت سنه
لسه مش عارفه ليه سبتمبر حزين