Tuesday, November 07, 2006

اهو جه يا ولاد..اهو جه ياولاد


هو ايه؟؟
الشتا و البرد
بدأت مظاهر الشتا و البرد و الصقيع تبان
و اعلن ضيفنا انه حيكون ضيف بارد و تقيل
و بما انى كائن بيحب الدفا
فانا باكتب و انا لابسه شالى و شرابى و متكلفته
و جمبى مجى السخن
و بصراحه انا استقبلت الضيف برخامه
انا باحب اوى بس مقدماته و طبعا أمطاره
أول ايام الشتا
مزيج من لسعه الهوا الساقع مع دفا الشمس
و سما فيها شويه سحب بس مش مغيمه
باحس كانه الربيع عندنا
بعد كده باعيط خصوصا انى مبعرفش اعمل حاجه و انا بردانه

ما علينا أسوأ حاجه فى استقبال الضيف
العمليه الانتحاريه اللى بنضطر نعملها فى بدايه كل شتا و كل صيف
ادفن هدومك يتاعت الصيف و نزل الشتوى
شيل كوفرتتك و طلع بطانيتك
و مفيش مانع بعد الغسيل و الترتيب و التنزيل
تلاقى كله وقع و كله دخل فى بعضه
و عيش حياتك بقى
عشان كده ياريت تتبرعوا و تساندوا واحده بردانه زى حالاتى
ادعولى اتمها على خير,"

...........................................

8 Comments:

At 12:53 PM, Blogger Ahmed Rashwan said...

صور جميلة قوي ودمها خفيف
أنا كمان عندي مشاكل جامدة جدا مع الشتا:))
ومرتين أوصل لبلد أوروبي في الصيف وألاقيها بتمطر وأنا مش عامل حسابي ، أول شيئ اسارع بشراء جاكيت خفيف
الغريب أنني أكتشفت الآن وأنا أكتب هذا التعليق أن الجاكتين الذين قمت بشراؤهما من أجل الأمطار الصيفية ضاعا بعد فترة قصيرة بطريقة عبثية .. الأتنين والله :)) غريبة :))
أتمنى أن يمر هذا الشتاء عليكي بأقل تعكير صفو ممكن .. تحياتي

 
At 12:20 AM, Blogger احمد القيسي said...

اجمل ما في الشتاء هو الدفئ الاسري
حيث يهرب الناس من برد الشوارع الى دفئ البيوت وتجتمع الاسرة وتتعالى الضحكات والنكات
انا احب الشتاء

 
At 3:49 AM, Blogger Dananeer said...

تعيش و تاخد غيرها ده اولا
ثانبا للاسف صاحبنا عملها و ضيع عليا عرض كستور امبارح
وخدت برد!
:(

احمد عندك حق
فيه دفا تانى بنلاقيه فى الشتا
بيوحشنى اوى استقبال بنت خالتى اللى كانت عايشه معانا بكاكاو باللبن سخن و انا جايه من بره
او الاقيها عملالى شوربه العدس اللى باموت فيها
(">)

 
At 7:22 AM, Blogger أُكتب بالرصاص said...

الشتا في مصر
بيفكرني بالمدرسة
والسقة الصبح وانا قايم من تحت البطانية
والمطر
والزحالايق
والطين
والهوا البارد

ياااه

من زماااان ماشفتش شتا

 
At 7:36 AM, Blogger Dananeer said...

اكتب بالرصاص تعرف انك بجد فكرتنى بالزحاليق و ايام المدرسه
يااااه بجد
و بعدين ازاى من زمان ماشفتش شتا
مبتقمش الصبح من تحت البطانيه دلوقتى
لو كده ياريت تشوفلى شغل معاك من غير صحيان الصبح!

 
At 8:01 AM, Blogger أُكتب بالرصاص said...

لا بأصحا الصبح ...اطفي المكيف

طبيعة البلاد هنا
ستة شهور صيف

وستة شهور



جهنم

:)
درجة الحرارة في الشتا في الظل .....بتصل إلى 35

 
At 12:52 AM, Blogger SOLITUDE® said...

انا عكسك خاااااااااالص
انا الشتا بالنسبة لي هواية
http://s7s7m3aya.blogspot.com/2006/11/blog-post.html

 
At 6:57 AM, Blogger Dananeer said...

انا باعشق منير و الاغنيه دى اكيد

 

Post a Comment

<< Home