Friday, November 10, 2006

غــــــــــــــــــــــوايــــه!



ساعات كتير بتستوقفك حاجات و تعملك دوشه فى دماغك
غصب عنك تلاقيك عمال تفكر
رغم إنى كنت بحاول ابقى جوه الغيبوبه اليومين دول
او حتى أفكر فى أى حاجه تافهه
حفاظا على قواى العقليه انا كمان
و منعا للاكتئاب اللى مالوش بديل قدام الاخبار اللى بقت بتطاردنا
و بنحاول
نهرب منها و من السعى وراها اليومين دول
بالاقينى برضه مش قادره أقاوم
انزل اشترى الجرايد
بس مش قادره مش عايزه اتوجع على حاجه
اقلب فى العناوين و الصفح بسرعه
واركنها مطبقه زى ماهى
و اقول لنفسى فى حاجات كتير حابقى اقراها
اقول افتح التليفزيون اشوف اى حاجه عبيطه
تلقائى اجيب الجزيره بعد شويه
اقول مش حاقعد على النت عشان انا عارفه نفسى
مفيش كام ساعه
و أكون واخد مكانى و سط مليون صفحه
عربيه جزيره الحياه المصريون المصرى اليوم و كم بلوجات
بعد كام ساعه ابقى مشحونه بجميع انواع الافكار
و حاسه انى منهكه عقليا و قلبيا لاقصى درجه
اقوم لسريرى مش شايفه حاجه و مش قادره انام
اقوم اجيب كم مجلات ميكى و شويه كتب
بعد شويه تلاقينى من وسط كل دول ماسكه
الأزدواج الثقافى
و قلم و بعلم على السطور و بعيد قرايه سطور و افكر


غــــــــــــــــــــــوايــــه
مش قادريين نتغلب على نفسنا و عليها
على راى دكتور يحيى الرخاوى
نحمل الوعى الثقيل نكونه كدحا اليه
و لا عالم افتراضى زى ما
بيقول
و لا تيجى تبص على سنين عمرك اللى فاتت
و تحس انك كبييييير اوى و لسه فى نفس الوقت مكبرتش
و عايز
زمان بعد نفطه البدايه بشويه
بنفس البراءه و نفس البساطه حواليك
و حد تجرى عليه تقوله
مش أنا
تلاقيك مش عارف السنين راحت فى ايه
و مش عارف انت بقيت ايه
فى غيبوبه و
كيتش تفاصيل عملته بايديك
عايش متفرج مش قادر تقوم تشارك
ولا قادر يغمى عنيه
من بين صوابعه مفتحها عشان يشوف
حتى لو حيتعب
و لا مسروق منك الضى
و مش عارف تفهم اللى مصريين
انك تبقى نسخه من اى حد حواليك المهم متبقاش كده
ممكن اوى تعمل اراجوز بس المهم متكونش نفسك
لازم تلبس ماسك غير ماسكاتك دول
ماسك بيضحك و يجامل و يتكلم
فى كلام من نوع تانى
و مالوش دعوه باللى جوااه
لا افكاره و لا احاسيسه
و الا حتبقى غريب مجنون
و كمان مش عارف نفسك!

كل ده مش مهم بس المهم الحل
تشارك فى الاحداث و لو بكلمه لا؟
تدور على كيان كبير تندمج جواه
مع ناس فاهمه الهذيان بتاعك ده؟
ولا حتضيع وسط كيتشيهات اكتر زى تجربه تفاصيل؟

تغمى عنيك خالص طالما
مش قادر تكون زيهم
تسكت و تبعد عن الناس اللى عايزينك تكون
مش فارقه معاك و زى ما المفروض تكون
كائن ضعيف بدماغ فاضيه و افكار من نوع تانى
معرفش
الغريب انى مش عارفه انا وصلت هنا ازاى
انا كنت عايزه اتكلم عن حاجه تانيه

5 Comments:

At 1:35 PM, Blogger film69 said...

وصلتي هنا إزاي ؟؟ هممممم
اعتقد أن الغالب على هذه التدوينة والنماذج التي أوردتها تتناول الفرد واختياراته التي تتكشف من خلال وعيه
وان الكيرين - وأنت منهم ,احيانا أنا أيضا -يرغبون في الهروب من مأساة الواقع وتحت وطأة الشعور باللاجدوى لكنهم بحكم وعيهم يجدون أنفسهم متورطين فيه بشكل أكبر
مهما قررنا أن نرفع إيدينا فلن نستطيع ، فقط ربما نحدث تغيير في مساراتنا بحكم تنامي الوعي ولكننا لن نتمكن من إسقاطه
ولا أنتي كمان .. يمكن هو ده اللي وصلك هنا

 
At 5:24 PM, Blogger محمد الدسوقى رشدى said...

هو احنا صح سؤال بجد ياريت تجاوبيسنى عليه
؟

 
At 7:02 PM, Anonymous simsima said...

تدوينة رائعة يا عصفورة
تحياتي
أسماء

 
At 10:19 AM, Blogger Dananeer said...

أحمد انا من امبارح باحاول اعلق على كلامك و مش عارفه
و مش عارفه كمان مبصش عليه كل شويه
ساعات بنحتاج غيرنا يحللنا !

ديسو مبرووووووك البلوج
ياريت كان عندى اجابه

سمسمه تدوينتك اللى عمليتلى دوشه

 
At 7:36 PM, Blogger محمد الدسوقى رشدى said...

مرة تانية
هو احنا صح بلاش صح اوى بس علىالاقل احنا قريبين من الصح
طيب بلاش دى كمان
هو المفروض لما نحب نضحك نضحك ازاى
بلاش دى
لما اكون عاوز اهرب اعمل ايه ؟

 

Post a Comment

<< Home