عايزه أيه من بابا نويل؟؟
مكنتش مستعده للسؤال و انا باحكيلك عنى و عن كوكو
و ازاى لقتها مش فاكره يعنى ايه رأس السنه
و مش عارفه بابانويل
و ازاى قعدت جنبها احكيلها
و سألتها فى الآخر عايزه أيه من بابا نويل
إنتِ عايزه أيه من بابا نويل؟؟
انا مش عايزه حاجه
....
كالعاده تخرسنى الاسئله المفاجئه
كالعاده برد باى حاجه يسعفنى بيها لسانى
عشان ادى دماغى فرصه تفكر
افتكرت زمان
و احنا صغيرين لما بابا كان بيجيبلنا حاجات
و بيحطلنا جنب سرايرنا
شوكلاته و حاجات
و يسيبلنا ماسكات بابا نويل
و اد ايه كنت بافرح بيهم
حتى و انا عارفه ان مفيش بابا نويل
و ان بابا نويل بابا
............
عايزه عربيه بابا نويل
ايه الطمع ده انتى عايزه تاخدى كل حاجه ليكى
ضحكت
و مردتش مكنتش عايزه الهدايا و الحاجات
كنت عايزه اركب العربيه و اطير فى السما
وسط السحاب
لا باتكلم جد عايزه ايه من بابا نويل
ضحكت بعصبيه
مفكرتش عايزه ايه
خلاص حاسيبك تفكرى
شوفى عايزه ايه من بابا نويل؟
ايه الحاجات اللى عايزاها و تتمنيها للسنه الجديده
و ايه الحاجات اللى حصلت فى 2006
و مش عايزاها تحصلك تانى
و ايه الحاجات اللى حصلت و فرحتى بيها او عايزاها حتى فى السنه الجديده
هاتى ورقه و قلم و اقعدى مع نفسك و اكتبيهم
و اكتبى عايزه تعملى ايه
ضحكت تانى
ياسلام و لما اكتب الحاجات دى كده بقى حتتحقق
لا بس اول خطوه عشان تحققيهم انك تكتبيهم
و تعرفى انت عايزه ايه
لو مكنتيش عارفه فدى مشكله
خلاص اتفقنا
حاسيبك ساعه و لا اتنين و اكلمك
تكونى كتبتيهم
ضحكت تانى
ده جنان
انت بتتكلم جد
جربى بجد دى حاجه مفيده جدا
ان شاء الله
.............
.............
و قفلت
معرفش ليه مقلتلكش انى كل سنه و غالبا فى التوقيت ده بافكر فى حاجات كتير و بافتكر حاجات كتير
و فجاه كنت بلاقينى باشخبط
مش امنيات و ايه يحصل و ايه ميحصلش
حاجات افتكرتها
قعده مع ناس
كلمه حد قالهالى
حاجه مزعلانى
ناس ضايقتها
حاجات مخوفانى
معرفش
اى حاجه بيتيجى فى دماغى وقتها
غالبا كمان بافتكر اوى قعدات الكليه
و الاحداث اللى عدت علينا
معملتش كده المره دى لحد دلوقتى
افتكرت ساميه بس فجاه من كام يوم
و قعدت فاكراها اوى
خصوصا لما عديت على مكانها
اللى بافتكرها فيه مع ناس تانيه
معرفتش اروح امسك ورقه و قلم
بعد مكالمتنا من كام يوم
و معرفتش ابطل تفكير من ساعتها
ساعات بالاقينى باضحك
و ساعات بازعل
و ساعات بحس بخوف
امبارح مسكت كشكول و قلم
و كتبت شويه الرسائل دول
بالصدفه كان فى نفس الكشكول اللى كتبته زى عادتى قبل و بعد السنه الجديده
بلحظات
السنه اللى فاتت
صحيح عايزين ايه من بابا نويل؟
عايزه اعرف
posted by Dananeer @ 10:47 PM
11 comments
11 Comments:
أنا كمان ةمش عارف انا عاوز ايه من بابا نويل
بس فى حاجة واحدة بس متأكد انى لو شفته هطلبه منه رغم انى عارف انها مش بايده
هطلب منه إنه يسعد كل الناس اللى بحبهم
ولو فضى يبقى عدى على
ويحاول يخلينى افرح شوية
أو علىى الأقل مزعلش ولا اكتئب
على فكرة بابا نويل حقيقة
بس لازم نلاقيها جوانا الاول
قبل ما ندور على عربيته اللى بطير فى السما
يارب تكون كويس
وكل سنة وانت طيب
والناس اللى عندمك بخير
و انت طيب يا ديسو
و دى مش بايد بابا نويل
عشان كده بنسألها لرب كريم
و الايام دى ايام خير عشان ذى الحجه و عرفه
عشان كده ليك عليا اخلى كوكو تدعيلك
و شكرا على تعليقك و كلامك يا فندم
طيب خلاص
حلا للمشكلةدي
ممكن لما ييجي بابا نويل تقوليله - بخبث - انا عاوزة عربية زي بتاعتك
و ممكن بعد كده تبقي توزعي هدايا انتي كمان
علشان غالبا بابا نويل مش بييجي مصر كتير
ايه ده و ابقى مامانويل؟؟
هيييييييه
حلو اوى تشوف الفرحه فى عيون ناس
او تكون سبب فرح
اللى مش بايد بابا نويل و كنت باتكلم عنها السعاده
والرضا
كل سنه وانت طيبه
بابا نويل لو جه حطلب منه حجات كتير كتير
كتير كتير كتير كتير
لحد مايقلى بس انا خلصت
wenta tayeb
3ayez eh tayeb 2ole??
law leek 7aga wa7da bs totlob eh?
السعادة و الرضا ؟
احتمال دي الحاجات اللي مخليها بابا نويل لنفسه
بيحس بيها في وقت العطاء و فرحة الناس
كل سنة و انتي في سعادة و رضا
Msh 3aiza hagat kteer..
just eny maz3alsh alsanady mn had aw mn mawqef..
maz3alsh bgad..
bas de omniety.. ally 3arfa enha msh hatet7a2a2 :)
i don't want 2 be selfish .it is enough for me 2 see the disappearance of street children and i want 2 say goodbye for wars..and goodbye suffering,just 2 leave us live in peace...
ياريت يا دودو
بس احنا بنتنفس حروب و صرعات
و دم و فقر و مرض
نموت من غيرهم
Post a Comment
<< Home