لما كبرت

زمان كان نفسى يكون عندى حيوانات كتير
وكان نفسى اعمل حاجات كتير كمان
كان نفسى يكون عندى حصان
كان نفسى فى حصان اوى
اطبطب عليه
و ابص فى عيونه الحلوين ام لمعه حزن
و اكله سكر من بين ايديا
كنت مقتنعه انى فى يوم حجيب حصان و اربيه

زمان كان نفسى فى غزاله
عشان حبيت طيبتها و خوفها و ضعفها
و لمعه عنيها

و كان نفسى فى دولفين اوى
دولفين عسول و شقى
نلعب سوا كتير

و ممكن كلب بحر
مش عارفه

كنت مقتنعه انى ممكن اشيلهم فى البيت
و فى البانيو و اى شقه فاضيه فى العماره

كنت باحلم كمان
انى حاصحى و ابص م البلكونه
الاقى الشوارع بقت بحر
حلو اوى امواجه هاديه
و صافى
مليان كل الحاجات اللى باحبها
دولفينى
سمك ملون
حصان البحر
و نجوم بحر و مرجان كتير
حاجات كتير ملونه
اصحى الصبح
أأكلهم من بلكونتى
و ممكن انط فى لحظه و اكون معاهم

كنت باعمل خطط
عشان اتسحب اروح جنينه الحيوانات
اخطفلى الغزاله من هناك

و اودى اتنين سيد قشطه
النيل
التمساح بقى معرفش
كنت لسه بافكر

خلاص اشوف شكله مره واحده بس و ارجعه
انما حاسيب سيد قشطه
عشان لما اركب الاوتوبيس النهرى
اتفرج عليهم

كنت حاسه ان اننيل محتاجهم
و هم محتاجين حريه
معرفش

و كنت مقتنعه انه كل ده حيحصل فى يوم
يااه لو كل حاجه تبقى زى ما كنا بنحلم بيها زمان