Wednesday, April 18, 2007

عشانك



كل مره باحس بيكى و انتى بتنهارى باحس بعجز

خصوصا انك مبتقعيش زيى

بتنهارى من جوه و بتفضلى متماسكه و صامده و مخبيه

موجوده لو مين محتاجك

و دايما بتستقبلى الناس و بابتسامه تخطف

و خفه دم تخرج اى حد من اى حاله حزن


كل مره بابقى عايزه اقولك

انك بجد انسان جميل اوى اوى

و انى بجد محظوظه عشان اتكعبلت فيكى


يا مرمر مفيش زيك بجد

مفيش حد زيك بيفهمنى و روحه حلوه

و قوى زيك


انتى حلوه من بره و من جوه غصبن عنك

حلوه بجد

حتى و انتى مش مصدقانى او بتكدبى مرايتك

انا و مرايتك مبنكدبش

احنا بنوريكى النور اللى بتشعيه..متبقيش عاميه

أنتى عمرك ما كنتى بهلوانه أو أراجوزه

عشان خفيفه الدم


عارفه يعنى ايه تكونى بتتقطعى من جوه

و مع ذلك ترسمى على وشك ابتسامه و وشى ضحكه

أنت حد قوى اوى


و رغم أنك كتكوته صغيره

بأحس انك لمبه الجاز بتاعتى

اللى بتنورلى السكه و دايما بتسندنى

من غيرك أتوه


أنا مش مستحمله أشوف حزنك المستخبى

و وجع قلبك و قسوه الدنيا

و مش مستحمله خرسى و أنا باسمعك

من جواكى بتصرخى

و مش عارفه أقول حاجه


ممكن تيجى فى حضنى و تعيطى

ممكن ترتاحى عندى شويه

و تفضى اللى جواكى


أنا مستعده مسيبش القلم

لو فضلتى ماسكاه معايا

و تعالى نشخبط سوا زى الأطفال

و بألوان حلوه نضحك ع الدنيا

Labels:

6 Comments:

At 8:21 AM, Blogger Mohamed A. Ghaffar said...

ربنا يخليكى لبعض وميحرمكوش من مشاعركم الجمله ويفك كرب مرمر

 
At 11:04 AM, Blogger Hechkok said...

So much warmth and deep feelings between you too, something ver rare these days and your Marmar is someone hard to find in thi crazy world of ours.
I wish she will be happy again from outside and inside and I think we are alike me and her and I just feel what she is going through.

 
At 8:19 PM, Blogger مـحـمـد مـفـيـد said...

بوست رقراق جدا
ادام الله بينكما الحب

 
At 6:59 AM, Blogger Dananeer said...

هيه بجد تستاهل اكتر من كده

يارب امين

 
At 1:08 AM, Blogger مصـ( الخير )ـعب said...

ربنا يكرمها ويكرمك
خليكي جنبها لحد ما تبقى كويسة
الناس دي نادرة أوي في العالم ده
حافظي عليها

ربنا يا رب يحميكم لبعض

 
At 8:08 AM, Blogger Dananeer said...

هيه بجد عمله نادره اوى
المشكله انها هيه اللى على طول بترفعنى

 

Post a Comment

<< Home