Monday, March 19, 2007

جنينه الحيناوات


Photo Sharing and Video Hosting at Photobucket

ينفع كده يعنى

يويو يروح جنينه الحيوانات لأول مره من غير ما يشوف الزرافه؟!!

و من غير ما تاكل بلسانها الجزر من على راسه

ازاى اصلا جنينه الحيوانات من غير زرافه

و ازاى اصلا مكنش عندنا غير زرافه يتيمه بس

المهم الفقيده قرفت من عيشتها و قررت تسيبنا و تطلع لنا لسانها

و هى بتقول سايبهالكم و عندها حق


بس ماليش دعوه انا كنت عايزه اشوف بجد الزرافه

دى صاحبتى و انا اشبهلها جدا

انا حصانه بتستزرف الله


قبل اى حاجه تبرعوا تبرعوا عشان يجيبوا زرافه نعذبها

أداره الجنينه خلت التذكره جنيه بحاله نظرا للظروف الماديه الصعبه

عشان يجيبوا الزرافه!!


ما علينا

خلينا ندخل من الباب


اول مره اشوف كم السعاده دى على وش يوسف

كانه عارف اننا رايحين فى رحله

و سيادته عاملى فيها واحد كبير و مش راضى يقعد فى العربيه

و ماشى ماسك بكل ايد بنوته

و بيتمرجح فووق


قطعنا التذاكر و دخلنا

فاكرين كانوا بيعدونا ازاى ولا قطيع المعيز يا خواتى

و انطلقنا


خريطه؟؟

بتهرجوا ياجدعان احنا خبره جدا

الجنينه دى شافتنا زمان و شفناها لما زهقت


الولاد بيهرجوا و قال ايه عايزين يقعدوا يأكلوا

مش كفايه مأخرينا و نايمين لحد الضهر

مروه هددت الكل

يلا على جوه

ناكل دلوقتى قال


حضراتنا ماشين بنسمع حنمشى ازاى و نشوف ايه

و كله بيجيب فى سيره الفقيده اللى كنا عايزين نشوفها

و مش عارفين اللى حصلها


يوسف بقى ولا ملك سيام كان راكب فوق زاحمد

يا مجننا و بيجرى بهستيريه فرح مش معقوله

و كل ما يشوف حاجه يقول

ايه داا؟سوووو

و يشهق اوبااا


اول حاجه شافها الحمار المخطط افندى

و كان فرحان بيه جدا

و النعامه اللى كانت نافشالنا ريشها

و كان فاتح بقه

اول مره اشوف نعامه بديل!


و الجمل

اللى دخلناه جوه عنده

و ساعتها اترعب و انفجر فى العياط

الجمل فعلا يخوف

محتاج حلاق و دش محترم

و ده حال معظم الحيوانات الغلابه اللى جوه


تخيلوا انهم نايمين زى الغلابه

شوفوا الدبه عامله ازاى

و معرفش ودوا الدبدوبه البيضه فين

و الدش بتاعهم اتحول لحنفيه معدن صغيره!


الطاوس مسروق ريشه


الاسد مسَلْوع و عايز فومين غسيل


الشامبنذى عنده اكتئاب و زعلان

و ليه حق

خلال عشر دقايق

كان فيه كم محترم من الاطفال العساسيل جدا و اهاليهم الواعيين جدا

و عليه تم تغريق الشامبنذى

اشى ميه و اشى زباله

و اى حاجه فى الرجلين


سيد قشطه و المدام زى ما هما بسنانهم اللى محتاجه طب اسنان بحالها


النسر قلنا ليوسف عليه كوكو!


و على سيره المسميات

الحيوانات اتبهدلت خالص على ايدينا

عشان نسهل على يويو افندى

قطقط "اسد بقى قطه اى حاجه باربع رجلين و ديل"

كوكو و فوره "اى حاجه بشويه ريش"

قشطه

بوبو و بوبى "كلب البحر او اللمبى زى ما الحارس مسميه"

الولد حيطلع كل حاجه بايظه عنده


بس بصراحه

انا حاسه اننا كنا فرحانين اكتر من يوسف بكونا هناك

و بذكرياتنا هناك

واضح ان ده السر اللى بيخلى كل اب و ام

ياخدوا نوناتهم قال ايه عشان يفرجوهم على الحيوانات

و كمان يعذبوهم و يحطوهم عليهم


بابا و مامت يوسف بيقولوا انهم حاقدين عليه

و اشمعنا هم محدش عمل معاهم كده و هم صغيرين

و دخلهم جوه عند الحيوانات اللى اصلا هما خايفين منها دلوقتى!

الابهات و الامهات دول مش ممكن!!


احنا لزقنا فى الجبلايه و لا العيال

و هاتك يا فرجه على القرود و هيه بتتشمس و اللذى منه ;)


و انا كان فاضل اتطنطط لما لقيت كريمه الفيله لسه موجوده

و كلنا وقعنا من الضحك لما اكتشفنا ان الحارس هوهو بتاع زمان لسه موجود معاها


هيه عربيه السيسى صغرت كده ليه؟؟ دى كانت بتكفينا

قال يعنى احنا لسه اقزام

انا اتبسطت جدا


كان فاضلى الست زرافه و اطير م الفرح

صحيح

منفذتش المخطط بتاع زمان

:)

Labels:

13 Comments:

At 11:35 AM, Blogger ياء said...

نقول ايه

يا بخته

كده حتخلينا نحسده


وعلى فكره الصور جامده

 
At 4:41 PM, Blogger Hechkok said...

Lovely trip , I enjoy going to the Zoo till now and it reminds me of my youth. The white bear show up in the cold weather only.
by the way in the Desert road between Alexandria and Cairo an open Zoo called Africana , it is so cool.

 
At 6:50 PM, Blogger تسـنيم said...

ربنا يخلي يويو اللي كان السبب في استعادة كل الذكرياات الحلوة دي.. أما الست زرافة فربنا رحمها من البهدلة وقلة القيمة

 
At 11:33 PM, Blogger محمود ماجد said...

من اجمل الذكريات اللي بيفضل الواحد فينا يفتكرها وهو طفل ذكريات الزيارة الأولى لجنينه الحيوانات


اول زيارة لي في جنينه الحيوانات شفت حيوان ، عجبني اوي ، صورته لسه في خيالي لغاية دلوقتي ، او بقايا صوره يعني ...حتى الآن كبرت ومش قادر احدد هو كان ايه ، لكن اغلب الظن إنه كان راجل لابس مهرج ....

:D

 
At 9:47 AM, Blogger ert3ashat said...

:D:D:D:D:D:D:D:D:D:D....wad7 enek knty mabsoota akter meno be kteer...begad post gameel awyy awyy

 
At 1:35 PM, Blogger Reem said...

أنا كمان كنت فى جنينة الحيوانات قريب
تعرفى رد فعلى قدام الحيوانات يقارب من رد فعل يوسف بالظبط
نفس البهجة و السعادة و استعادة جزء قديم جدا من طفولتى مش بيرجعلى غير هناك
***
ربنا يخلى يوسف و يبارك فيه
***
برضة زعلت قوى على الزرافة و وقفت قدام بيتها و كنت هاعيط
***
بس التذكرة مش كانت بجنيه
حتى دى كمان غليت
***
تحياتى على البوست الجميل

 
At 3:53 PM, Blogger film69 said...

روح طفولية تهيمن على كلماتك الضاحكة الساخرة لحد البكاء على الحال البائس الذي وصلت إليه الحيوانات في الجنينة
تذكرت منذ عدة سنوات في حديقة حيوان إسكندرية عندما شعرت أن القرود تتفرج على البشر المحيطيين بالجبلاية وليس العكس :))ا

 
At 7:31 PM, Blogger amazing_angel said...

u are really just an old kid as u wrote in ur profile

 
At 9:48 PM, Blogger qindeel said...

حلو الكلام ده .. بس بيتهيألى يتسمع مش يتقرى !!
شكرا على تعليقك

 
At 6:58 PM, Blogger SimplyMoroccan said...

This comment has been removed by the author.

 
At 1:39 AM, Blogger Dananeer said...

ياء
انفع مصوراتى؟؟
:)

hetsh
و الله انا رحت من سنتين فى الصيف و الدبوبه كانت موجوده و فطسانه على نفسها و حطينلها ثلج
سفارى رحتها
اجمد حاجه فيها القرود لما تتنطط فوق العربيه و تاخد الاكل
و الغزلان
بس الحيوانات تعبانه و مهمله
خصوصا الست نعامه و الحمار

تسنيم
ربنا يخليكى يا فندم و الله يرحمها

محمود
الغريب اننا و احنا هناك افتكرنا حاجات كنا نسينها و مستخبيه جوانا

etra3asht
انت بتقول فيها
انا فعلا اتبسطت اوى
ربنا يخليك

ريم
كويس انك اتبسطى زيى
ربنا يخليكى
الله يرحم الفقيده
التذكره غليت يا فندم
المسخره ان الحكومه مش قادره تجيب زرافه

فيلم
كتير بافكر ياترى الحيوانات بتقول ايه
على الهبل اللى قدامها
:D

دودو
ايه ده انا الكبيره يا اوزعه

قنديل
منور البلوج سفير
يا سيدى انا مش باكتب
انا باصور بالكلمات
:)

simplymoroccan
بص يا سيدى "الحيناوات" دى ليها حدوته
بنوته زى القمر فى عليتنا كانت جايه اول زياره ليها من كندا
و طول النهار مبتقولناش غير عايزه اروح جنينه الحيناوات
فخدتها وديتها

روح متضيعش فرصه انك تعمل حاجه
حتى لو انك تتفسح هناك
:)

 
At 6:19 PM, Blogger SimplyMoroccan said...

This comment has been removed by the author.

 
At 2:55 AM, Blogger Dananeer said...

يافندم
اسفه جدا جدا

و بعدين تعالى عندنا تنورى
بس مفيش زرافه

 

Post a Comment

<< Home