Thursday, February 15, 2007

كريم رضوان مبقاش هنا

Photobucket - Video and Image Hosting

كريم رضوان

انسان معرفش عنه حاجه غيرصورته و اللى اتكتب عنه من كام سنه

بس معرفش ليه اتأثرت بالكلام ده

و باللى حصله و موته

رجعت ابص لصورته و قد ايه باين في عينه الذكاء

نوع من الحميميه و الدفا فى صورته

مقدرتش اقاومه و رحت ماسكه قلمى و حاولت انقلهم

مكنتش عايزه انسى التفاصيل دى

زعلت على كريم اوى اوى

و حسيت بالغباء و الغضب

.....

كريم كان ضحيه اول احتفال بذكرى 11 سبتمبر

عشان كان مسلم عايش هناك

شويه سكرانين اعتدوا عليه و قتلوه فى لحظه

و بكده ارضوا غرورهم بانهم انتقموا من المسلمين القتله اللى فجروا و قتلوا شعبهم


و زى ما كنت زعلانه على كريم

فاكره كويس انى اول ما سمعت اخبار التفجيرات فرحت فى امريكا كبلد

بس اول ما ابتديت اتابع الاخبار

و الناس اللى ماتت و اتشردت

حسيت بحزن و زعل و غضب

و انى مكسوفه من نفسى

زى ما مكسوفه من شعب مر بمأساه

وشاف صورنا فى اخبار العالم

و هيه بتحتفل بشماته باللى حصلهم


حسيت انى لو مكانهم حاكرهنا كمان اوى اوى


البلوجرز كانوا بيتكلموا عن حمله جماعيه عشان نكتب عن وجهه نظرنا فى موضوع واحد

و كان اول موضوع حريه العقيده


مكنتش متحمسه اكتب حاجه

لحد ما افتكرت كريم

و سألت نفسى يا ترى لو كنا هنا او هناك

قادرين نفهم و نحترم اللى قدامنا و عقيدته

و نفهم كويس ان شويه الناس اللى بتفجر و تقتل باسم اى دين دول

مش محسوبين على حد

و مفيش داعى اننا نتحول لوحوش زيهم

ياترى كان حتبقى فيه فرصه لكريم؟

ياترى كان حيبقى موجود معانا و قدامه حياه مليانه؟؟

الاعمار بيد الله طبعا

بس السؤال فرض نفسه


اخر حاجه احب اقولها

ممكن مكونش مقتنعه بديانات البعض

زى البهائيه اللى اول مره كنت اسمع عنها

بس ده لا يمنع انهم بشر زينا زيهم

لينا رب كريم كلنا حيحاسبنا على ايمانا و اللى عملناه

مش احنا اللى نقدر نحكم و نحدد مين رايح جهنم و مين رايح الجنه


انا كنت شايفه ان من حقنا و حقهم اننا نعرف ديانتهم

عشان حتى متتجوزش مسلمه بهائى و هيه متعرفش

او يتصدم جد و جده فى بنته و جوزها

و يرفع قضيه او غيره


مع اقتناعى باللى فوق

ده مش معناه انى اقبل شويه الغجر اللى بيئذونى و يئذوا ديانى و معتقداتى

و هاتك يا شتيمه و كلام فارغ و الحاد

امثال اللى اسمه نكيف و غيرهم

معنديش استعداد اقبلهم بتاتا و لا اتعامل معاهم

و لا حتى اتناقش

و لو اقدر اوقف الاذى و الكلام الفارغ اللى بيقوله حاحاول

..............

تحديث*

"اولا زى ما قلت انا لما كتبت كتبت عشان افتكرت كريم و اللى حصله و اللى بيحصل على الجنب التانى

و فعلا مكنتش اقصد اهانه او اساءه لحد بس انفعلت

انا فعلا اسفه لأن الحوار مكنش فى صيغه مناقشه محايده اكتر منه تعبير عن اللى جوايا"


ثانيا و رغم انى مش من المدافعين و لاحتى المهاجين لعبدالكريم

بس بارفض كتاباته

الا انى اتضايقت بجد من الحكم

خصوصا انه كارثه فى بلد زى بلدنا الحلوه!

وخصوصا التهم الخرافيه اللى بقت زى اللبان

اى حد بيكتب اى حاجه حنرزعه كام سنه

امنع صادر اسجن اعتقل

سنه اهانه الريس فوق البيعه!!

Labels:

16 Comments:

At 1:52 PM, Blogger Layal K said...

طب أزاي مقتنعة باللي فوق ورجعتي قلتي الكلام ده...تفتكري هما ردهم هيكون أيه لما تقولي إنو كلام فارغ وأذى(بغض النظر عن إذا كان ده صحيح ولا لأ)أنت شايفة إن ده كلام فارغ و هما شايفين إنو إنك كلامك فارغ بردو...فين الحرية عندك أو عندهم؟؟

 
At 2:30 PM, Blogger Dananeer said...

ليال
انا مقصدش بكلمه مش مقتنعه بيهم
انى مش قابلاهم و انهم بيشتموا و احنا حنشتم
ابدا

انا اولا
لما اتكلم عن الناس اللى بتئذى و تشتم
مكنتش باتكلم عن ديانه مقابله
عن بنى ادمين
بيئذوا غيرهم بالتهكم و التطاول على مفردات دينا

انت حر تؤمن باللى انت عايزه
انا مش حاحاسبك و لا حافرض عليك
بس مش حر تشتم معتقداتى
رسولى قرانى
و انا حره احتفظ بعدم اقتناعى
و فى نفس الوقت لا حاهجم دينك
ولا الحاجات اللى انت مؤمن بيها

بس هو ده اللى انا مقتنعه بيه
و شايفه انى كلامى مش متناقض

 
At 3:01 PM, Blogger Layal K said...

ده مش معناه انى اقبل شويه الغجر....
و كلام فارغ...
لو اقدر اوقف الاذى و الكلام الفارغ...
مش ده هجوم؟؟

 
At 3:20 PM, Blogger Dananeer said...

ليال
تانى انا اتكلمت على اسلوب كلام شخص بعينه
و اللى بيكتبوا زيه و بيهاجموا بنفس الشكل

انا اتصدمت لما كنت باتكلم مع طارق مره و بعتلى لينك نكيف ده
كل حاجه ليها حدود
اكيد مش حاقدر امنع نفسى انى اضايق اوى كمان
حاجه ترفع الضغط

ده انا معرفش حتى ديانته ايه
و مبهاجمش دينه لو كان ليه دين
لانه مش حاخد موقف من اصحاب مله على واحد
ده بنى ادم بيشتم

كل اللى عايزه اقوله و اللى شايفه انه هو ده المهم

ان الاسلام نفسه الناس بره بتتعامل مع اصحابه بنفس العنصريه
و الهجوم العنيف
من كونهم الارهابيين لتهديدات كتير
لحد ناس بتتقتل نتيجه فهم غلط

لازم كلنا نكون متسامحين و نقبل الديانات التانيه
عشان غيرنا يقبلنا و يقبل دينا

انا مثلا منساش ان انتيمه المدرسه و انا صغيره كانت مسيحيه
الفارق الوحيد اللى كنت باحسه بينا
الصليب اللى على ايديها
و اننا بنتفرق فى حصه الدين

لما كنت باعيا
كانت اول واحده بتزورنى مع مامتها
و تسلفنى كشاكيلها كمان

و لحد دلوقتى مش ناسياها

بس فيه فرق كبير اوى بين التسامح اللى بالشكل ده

و رد الفعل ناحيه ناس تانيه

 
At 7:18 PM, Blogger Layal K said...

أنا مش ضد كلامك...ومش بقول إن كلام الباقي مش مستفز...أو أنهم لم يتعدو على دين أو فكر معين...أو أنهم على راسهم ريشة...بس احنا مش هنوصل لأي مكان بالطريقة دي...أنت هاتقولي كل واحد حر بس مايجيش ناحية ديني ورسولي وقرآاني بس معلش يا أستاذ أسلوبك مش تمام وأنا هحاربك...ويجي الأستاذ يقولك أنا ملحد وأنا حر وفين حريتي الشخصيتي وبعدين يسب ويلعن الأديان والرسل...هنفضل كدا ومش هنوصل لحاجة الغير البهدلة والشتايم

 
At 7:21 PM, Blogger Layal K said...

أسفة للأخطاء بس الكيبورد بيعلق على كام حرف
وياريت ماتخديش كلامي هجوم ليكي أنا بوضح رأيي وأنت كتبتي مناقشة مفتوحة :)

 
At 8:11 PM, Blogger تــسنيـم said...

دنانير أنا معاكي في وجهة نظرك وحاسة بالأسى والشجن في صوتك وان كنت مش شايفاه حتى لو مكنتش شوفت صورة كريم ولا شوفت لينك نكيف لكن أنا أعرف أمثاله من اللي ميعرفوش يعموا حاجة غير التطاول على الذات الالهية وشقير كان عامل كذا بوست عن الأشكال دووول..

حرية العقيدة وممارسة شعائرها حق لكل واحد فينا وغدا نرد لمن يحاسبنا ويفصل بيننا..

محبتي.

 
At 10:41 PM, Blogger mahmoud said...

انا هنا مش عشان ادافع عن حد بس بقول مش كل الامريكيين وحشين و متنسوش المظاهرات اللى عملوها ضد بوش وقت الحرب على العراق
و انا اعرق امريكيين متعاطفين مع المسلمين و بيكرهوا التعصب الامريكى
و برضو جنسيات تانيه كتير بتؤمن بنفس الشىء
البوست ده أثر فيا جدا جدا يا دنانير
و بجد انا بحس بسكين مغروس فى قلبى انا لما مسلم يتهان على يد متعصب جاهل و أعمى
اللهم انى اشكو اليك ضعف قوتى و قلة حيلتى

 
At 7:45 AM, Blogger Dananeer said...

اعتقد ان مهمتنا نتسامح و نحاول على قد ما نقدر نقبلهم و نخليهم يقبلونا
ومهمه كل واحد بيفهم كويس فى دينه و داعى مثلا
انه يجادلهم بالتى هى احسن

عموما يا ليال
تعبتينى
:)
يا ستى انا مش هواه الكلام فى السياسه و الدين
زى ما قولتلك انا مكنتش حاكتب

بس فكرت فى كريم
و ان السبب فى موت شاب بيدرس و لسه فى اول حياته
عدم قبول و عدم فهم لدين مقابل
و المره دى دينى

تقدرى تقولى حبيت احس انى باعمله حاجه
و مقدرتش امسك نفسى و كتبت اللى جوايا

خلينا نقول انا باكتب اللى جوه وخلاص
مقعدتش ابص عليه

عشان كده اول واحده حافشل فى قافله المناقشه و الحوار
:)

تسنيم
بالضبط انا عجبنى بوست شقير جدا
و كتبت له ساعتها
انى مبحاولش ادخل تانى اشوف بيكتب ايه نكيف ده
خليه تكلم بس احنا معترضين

موودى
بالظبط
مش مهم التعصب تحت اسم اى بلد
و جنسيته ايه
لانه مالوش جنسيه
و زى ما انت قلت فيه امريكان كتير مش راضيين عن اللى بيحصل فى بلدهم
و منهم مايكل مور

عارف يا مودى
فيه وقت كنت باحب اتعرف على ناس من بلاد مختلفه
اتعرفت على ممرضه امريكيه و كانت بتحكيلى على ولادها
و كانت واخده فكره عننا غريبه
انا متخلفين جهله فى خيم

بعد احاث سبتمبر بعتلها باقولها احنا اسفين اوى
و حاولت افهمها ان ده فعل متعصب
و فيه افعال متعصبه زيه
من امريكان و اوروبيين و غيرهم ناحيه مسلمين

خافت و قالتلى انتى مش واحده
و ياريت بلاش نتكلم تانى

صعب عليهم و علينا نقبل اللى بيحصل

 
At 2:11 PM, Blogger محمد عبد الغفار said...

موضوع شائك من الأولى تركه على ما اعتقد

 
At 1:54 PM, Blogger حائر في دنيا الله said...

الحرية موضوع كبير
فنحن نقبل الحرية لنا ونرفضها عندما تكون علينا
واعتقد ان الطرف الآخر كثيرا ما يخاف ان تكون الحرية شيء سيؤذيه وسيضطره للتراجع فيما يقتنع او يؤمن به منذ فترة
الموضوع فعلا معقد ويحتاج لإخلاص عند فعله
وأشك أصلا أنه موجود

مع تحياتي

 
At 2:17 PM, Blogger Darsh-Safsata said...

أعلم إن الحديث إنساني أكثر منه سياسي، ولكنني لم أستطع أن أتجاوز عن شقه السياسي
أفهم في المفهوم الإنساني الدعوة للتسامح، ولكنني لا أقبلها على المستوى السياسي
فإن كنا نؤمن بالحرية، فلا مجال لمفهوم التسامح، لأن التسامح يحمل في معناه القدرة على فعل شئ ولكننا نتغاضى عن فعله
الحرية هي حق لكل إنسان وليست على الإطلاق هبه يمنحها البعض للبعض الأخر بالتسامح والسماح لهم بقول هذا أو فعل ذاك
إن كنا نؤمن بالحرية فلابد أن نفهم أن هناك من سيقول ما لا يعجبنا وليس لنا الحق في الاعتراض على حقه في هذا القول ولكن لنا كل الحق في الاعتراض على ما يقول - إن أردنا - وأن نشرح لماذا هو مخطئ

يزعجني أيضا أن المؤمنين بأديان التوحيد الثلاثة هم عادة أكثر الناس تعصبا وعدم قبول لمهاجمة معتقداتهم، وما يحزنني في ذلك أنهم يؤمنون أن هناك إله خالق أكبر من كل الكون وكل البشر ومع ذلك فهم ينفعلون ويغضبون إذا أهانه أحد وينبرون للدفاع عنه !!! أليس هو أعظم من كل هؤلاء وأقدر أن يرد عليهم بما يشاء؟

 
At 11:24 PM, Blogger islam yusuf said...

موضوع جمبل فيه مفارقه للحياه فى الشرق و فى الغرب

 
At 1:39 AM, Blogger Dananeer said...

تانى يا جماعه
انا كنت باخرج اللى جوايا
و مهتمه بالناحيه الانسانيه اكتر من اى حاجه

و انا اسفه جدا لو اذيت شعور حد او حجرت على حد بحكم مطلق
ده احساسى و اللى جوايا
من غير تزيين

ساعات بحس اننا من بعد ما اخترعنا التقسيمات و اللعب
و حتى دور كل واحد منا
و بدأت المشاكل

شويه بيلعبوا سياسه
شويه بيلعبوا كوره
شويه بيلعبوا دكاتره
شويه بيلعبوا مصر و شويه بيلعبوا امريكا
و هاتك يا ضرب و خناق

الانسان بايده بيعذب نفسه
و مفيش فايده فينا
:)

 
At 10:42 PM, Blogger مـحـمـد مـفـيـد said...

عجبني اوي سردك وتقفصيلك لاجزاء صغيره من حياتك
عيشي زي هبه اللي انتي عايزه تعيشيها
بالنسبه بقي لموضوع المدعو كريم فاعتقد انتي عارفه انا عايز اقول ايه ؟
:((

 
At 3:32 AM, Blogger Dananeer said...

محمد انا متشكره اوى

اوحش حاجه لما تحس فى وقت انك مش عارف مين جواك

انا مش عارفه انت عايزه تتكلم على كريم
و لا عبد الكريم و التحديث

فى اعتقادى عبد الكريم
بص انا م من انصاره و لا الحمله بتاعه الدفاع عنه
و مشفتش بيكتب ايه
غير اول مره اتقبض عليه فيها و كنت عايزه اعرف مين المدون ده و ليه اتقبض عليه؟

بس لو فكرت فيها
4 سنين سجن
ومنهم سنه اهانه الريس!!
ياحالولى
طب الريس و اللى معاه بيهينونا و بيهينوا البلد الف مره

و بعدين هيه لبانه؟

الحاجه التانيه
ان حكم زى ده حيديهم الحق يجيبوا اى حد من قفاه و تعالى يا حبيبى كام سنه عشان شويه كلام كتبته

و لو بصيتله بعين رحمه
ده طفل عنده كام و عشرين سنه و بيهرتل و ربنا يهديه

تخيل الاربع سنين سجن حيعملوا فيه ايه
و فى سجونا
تفتكر حيطلع ناسى الى بيكتبه او اللى حصله

 

Post a Comment

<< Home