موسيقى للروح و للضى

ساعات كتير باتمنى اكون هنديه مسحوره

تقدر تنقل احاسيسها و اللى بتشوفه و تسمعه

من جواها للى حواليها بلمسه و نظره

ساعات كتير بالاقينى بأسال نفسى

ياترى الكون حيكون عامل ازاى من غير ألوان؟؟

من غير بحر و شمس و حاجات كتير؟؟

من غير موسيقى؟؟

من غير كلام و أغانى القلوب؟؟

ياترى؟؟

باحس بوحشه و خوف

لاحسن ميكومنوش فى لحظه موجودين

و اقول الحمد لله بجد على قوت القلوب و الروح

النهارده و امبارح كانوا بالنسبه لى حلم

حلم حلو اوى حتفضل مزيكته جوايا

أول حفله ليا لوجيه و على سلامه

و أول مره عينيا تخونى غصب عنى

و من غير ما أقدر امنعها

و الاقى دموع لا هى دموع حزن و لا دموع فرح

هيه الكيمياء

بجد انا مهما قلت مش حاقدر بجد انفل الموسيقى و الصوت و العود و الشعر

و الغنا و همسات اللى حضروا

انا مش مسحوره و مش لاقيه كلام

روحوا شوفوهم و اسمعهوهم و حتفهموا

كل اللى بجد نفسى اقوله ياريت ميغيبوش

على سلامه

انا انبهرت بالشعر و باحاسيسك

و اتمنى بجد يكون ليك قريب كتاب

وجيه

مش عارفه اقول ايه

بس الضى رجع لوحده يوميها

..................

تانى يوم كانت الساقيه بتحتفل بسنه رابعه

مع اسكندريللا و الشارع

انا سمعت اسكندريلا قبل كده فى بروفه و عجبونى

بس مقدرتش احضر اى حفله قبل الحفله دى

اولا اكتر حاجه اتبسطت بيها جدا يو ميها

انى شفت بهاء جاهين

و كنت قريبه جدا منه

و سندته كمان

انا باعشق ابوه

و باحبه جدا لدرجه انى كنت باستنى جرنان الجمعه بفارغ الصبر الصبح

عشان بهاء و بريد الجمعه

و كنت بابعتله جوابات كمان

و فاكره انى مره رديت على قصيده

بعريضه فى صلاح جاهين لسه معايا مسودتها

بهاء ربنا يديك الصحه

كان نفسى اشوف امين حداد كمان

بس للاسف رغم وجوده مشفتوش

شفت العسوله ساميه

و بقيت الفرقتين

و انبهرت

انتوا محصلتوش

و كونكم بتحافظوا على سيد درويش و علامات الماضى فى موسيقتنا دى حاجه كبيره اوى

انا انبهرت بشد الحزام و الصبر طيب و بنت البلد و الحلوه دى

و الزغاريط و خفه الدم و الصهلله و حتى اندماجكم مع الموسيقى و هزاتكم

وبعدين

انا ماليش دعوه عايزين سايت

و نعرف مواعيد و اماكن الحفلات و نسمع الاغانى

"و انا بادور دلوقتى لقيت عند عمرو تسجيلاتهم"

هيييه

و بجد طول الحفله لقيتنى باقول

الله يرحمك ياشيخ سيد

الله يرحمك يا صلاح و يا فؤاد

كنتوا حتفرحوا اوى بيهم زيى و زى كل واحد حاضر

اللى خلف مامتش مش كده

انتوا باشعاركم و اعمالكم و كمان ولادكم معانا