خزعبلات آخر الليل
كل حاجه خلطبيطه اليومين دول
و مفيش كلام بيخرج
و لا طرقعات كيبورد حتى
حتى الاحلام و الافكار
اخرج فى الجو الحر
الاقينى بافكر
ياترى ايه الحل
خلاص لقيتها!!
بطيخه لكل مواطن على دماغه
تاكل البطيخه و ترزعها عدل فو دماغ حضرتك
ايه؟؟ و التلزيق؟؟
مش مشكلتى بقى
هو انا حافكر و احل كمان
بلاش يا سيدى
رشاشات ميه ساقعه فى كل مكان
حتى البيوت
و خلينا نلبس ووتر بروف بقى
مليان رسومات كارتون
انا عن نفسى عايزه عروسه البحر
اقولك مصغر تكييف محمول بانابيب
و كل واحد يمشى بتكيفه
انا ايه اللى وصلنى للافكار الخزعبليه دى انا ناقصه
.......................
اصحى من النوم بحاله مش طبيعيه من الزهق و العجب
اولا لانى بانام و باصحى بدرى اليومين دول زى الغلابه اللى كنت منهم
من 9 شهور
لحد ما اتهبلت و سبت شغلى عشان مش عاجبنى الهبل اللى باعمله
و النتيجه انى حطيت ايدى على خدى
مهندسه بترول محترمه ملو هدومها
مش عايزيين يشغلوها
عشان من غير شنابات
و سلملى على القرع البترولى بتاع البيت بيتك
ما علينا
ارجع معايا تانى
تخيل احساسك و انت صاحى و قدامك نهاار طويل و حر جدا
و احتمالات محدوده
مابين الكومبيوتر و النت اللى زى الزفت
و الكتب و الاخبار
و التلفزيون اللى ينقط
و معسكر الأمتحانات اللى فى البيت
ياقلبى لا تحزن!!
و بعدين ايه الخزعبلات اللى باحلم بيها دى
هو انا ناقصه عك
خد عندك امبارح
بعد القفله و الفرقعه اللى حصلت فى البيت دى
قضيت ليله مع الكهربائى و الشرر و الفرقعه
فى الحلم!!!
و خلى بالك
الحلم ملمس جدا
و خد عندك من المغامرات و المطاردات
و حتى الرحلات الغربيه
و الناس اللى معرفهومش و اللى اعرفهم
كتيييير
و إشى نيل و إشى بحر
و إشى ناس بتسافر و ناس بتموت و ناس بتعيش
اكونش اتحولت ل أليس بجد يا اخواتى
و اقووم تعبانه اوى من اللف و المشوره و الكلام ده كله!
عشان اقضى يوم طويل و حر جدا
و مالوش اى لازمه!!
ماليش انا لازمه اصلا
و اطرقع صوابعى و اعد السنين اللى بتضيع
و الى عملته و اللى عايزه اعمله فى دنيتى
هيه اله الزمن
طب و بعدين؟؟؟
عايزه ترجعى و لا تقدمى و لا تنزلى مكانك؟؟؟
و معرفش
فاروح اغلس عليها اسألها
حتعملى ايه
....................
الحل؟؟؟؟
انى محتاجه أسرق بنك طبعا زى ما باقول لكوكو كل يوم
يا هيه تسرقهولى
اقولك نسرقه سوا
بكرسيها الطبى
هو ده الحل
ماهو مش ممكن حالاقيها منين ولا منين
من الهدوم اللى ضاقت
ولا الكتب اللى باروح اشتريها بدل ما اجيب هدوم
و سواقين التكسه اللى ناهبينى نهب
ربنا يسامحك يا خالد
من ساعه ما قريت " تاكسى حواديت المشاوير"
و انا باتعاطف مع سواقين التكسه
خصوصا لما احس ان الراجل غلبان او محترم
و النتيجه حاشحت قريب
و بعدين مفيش مره تطلعوا مظاهره احتاج
على اسعار الكتب
ياعنى الواحد يعمل ايه بجد
دلوقتى يا حضرات انا عايزه اعرف فين منتديات تبادل الكتب دى
و امرى لله
ولو انى من انصار عض قلبى و اوعى تقرب من كتبى
انا باكره بهدلت الكتب
و اللى بيستلفوها منى و دمتم على كده
مشفوهاش يا اشوفها ورق لحمه
ايه الُفجر ده
البلد دى مش حتحس على دمها
حتى الاخبار
تفتح التلفزيون تلاقى ناس محروقه و هياكل
تفتح الجرنان تلاقى ظباط سايح دمهم
تفتح النت تلاقى فتاوى فضائيه
انا حاوجع دماغكم و دماغى ليه
فيه بطاطس محمره مستنيانى
ياللا تصبحوا على خير
posted by Dananeer @ 10:39 PM
4 comments
4 Comments:
شكلك بتذاكري علم نفس زيي
هو الاثر ده بتاع علم النفس
مع ان مفيش علاقة بين البترول وبينه
وبعدين محدش يجيب سيرة البيت بيتك وتامر زفت ومني زفتتين
قدامي
بكرههههههههههههههههههههههههم
اما مهندسين البترول قاعدين في البيت
امال مين اللي هيشتغل
هاتي شوية بطاطس
و الله ظريف موضوع البطيخه ده
تصدقى بايه
الكتاب ده لسه جايباه من كام يوم بس لسه مقرتوش
موضوع الكتب ده ماساه
لما لقيت الموضوع حيخرم اضطريت اتنازل عن كام كتاب للراجل تانى
اضربيه بطاطس افيد
:)
اهو انا ماعجبنيش ي التخاريف دي كلها إلا البطيخة اللي الواحد ياكلها ويلبسها في وقت واحد
والبطاطس المحمرة
فكرتني بجحا
كان بياكل البطيخ
ويشرب ميته
ويتسلى
باللب
ويدي الحمار القشر ياكله
تصبحي على خير
والله لسه كنت بقول فينك من زمان
شكرا علي تواصلك عند عبد الله
فعلا بعد كتاب خالد الخميسي ده كل ما اركب تاكسي افتكر الكتاب علي طول
ربنا يسامحه
Post a Comment
<< Home