Tuesday, February 27, 2007

مش المفروض

Photobucket - Video and Image Hosting


رضوى
كانت كاتبه بوست عجبنى لسه قرياه من شويه

عن الخوف انك تكون مختلف

او بمعنى اصح الخوف من ان غيرك مش حيقبلك و انت مختلف

خصوصا كتميز دينى


افتكرت ساعتها حاجات

خلتنى اقولها


اوحش حاجه ان الواحد يضطر يكون ماشى مع التيار او محطوط فى قالب معين

عشان ميخسرش

او عشان زهق من انه يتخانق

او حتى يتقابل بعلامات الاستعجاب و الهمس

فبيسكت

و بيكون فى سكوته نوع من التكتم والمهادنه مع الرفض الصامت


و انا صغيره فى اجتماعات العيله عند جدتى

كنت باحب اخد مجلاتى و اقعد اقراها فى البلكونه مهما كان الجو حر

لمجرد انى باحب القرايه و الهدوء


خالو كان دايما ياخدنى على كرسى الاعتراف و يقولى

خليكى مع الناس

هاتى حاجتك حتى و اقعدى هنا

بس انا باحب اقعد هناك!

و اضطر انضم للقافله


مكنتش منعزله و طفله واخده ركن

بس فيه وقت كنت باحب اخد حاجاتى و اقراها

لما باعوز اعمل حاجه كنت باعملها


برضه كانوا البنات بساعدوا فى الاكل و تجهيز السفره و خلافه

انا كنت باحب اكون مع خالى و ابن خالى فى التصليحات!

فك ركب ودى هات

روح اشترى مش عارفه ايه

روحى ساعدى البنات

سيبيهم هم يعملوا الحاجات دى


كنت باحب اوى كمان اقف بدل العامل فى محل كان بتاع خالى

كنت بالاقى متعه انك تشوف الناس وهيه رايحه و جايه

و تتعامل معاهم و تكون مسئول


و ده برضه كان محل خلاف

كنت طفله خيالها واسع و حركتها كتير

و كلامها كمان

بتتكلم و تتصرف بتلقائيه مطلقه

و برضه كنت بتصدم بالمفروض و لازم تكونى و لازم تعملى و مش لازم مش عارفه ايه

و الانتقاد اللى مكنش مفهوم ليا مع نظرات الاستغراب المتبادله بينى و بينهم!

خصوصا انى مكنتش بلاقى النوع ده فى بيتنا


مع مرور الوقت بتكبر و بيقابلك كتير بيقلولك المفروض و لازم

خصوصا انى كنت باحب اروح اقعد فى كل مكان شويه و أزور الناس

كل واحد من وجهه نظره


و انت مابين رافض و محتار و متناقض

يبتدى كلامك يقل مع الوقت و حركتك

و تبدى تشيل جواك


و بقيت انت اللى بتقيد نفسك بنفسك

حتى خيالك اللى مضايقهم

و تصرفاتك بتحاول تلجمها


و يبتدى التناقض و الخناق جواك

و كتير بتتمرد و تخرجه

و يحصل تصادم مع المفروض و ازاى

و تناقضات اكتر مع المفروض اللى مبيعملهوش كتير

اصحاب كلمه مفروض


لحد ما بقيت بتزهق

فبقتش بتتناقش

بتشيل ارائك جواك و رفضك لارائهم

لحد نقطه معينه و تتمرد


تكبر اكتر

تحتار من كونك مختلف

و كتير من المفروض و اللى لازم اللى بيقولوها الناس

بس جواهم و بعنيهم اكتر من كلامهم!


مثلا مكنتش باحب البس جيبات و حركات!

معرفش اندمج مع الناس المختلفه اوى

من نوعيه الناس اللى دماغها فاضيه او ليها اهتمامات مختلفه تماما

خصوصا البنات و الستات الكبار اللى من النوعيه اللى جايه

مبحبش اقعد اتكلم على تسريحه مين و اكله ايه و مين كانت لابسه ايه

مبحبش الدهب و الاكسسوارات!

مبحبش حفلات البنات الجماعيه و الرقص!

و لا قعدات الكلام فى الشغل


مش باحاول ادور على العريس اللقطه

ولا مقتنعه بتاتا بجواز الصالونات


قايمه طويله

بقيت ازهق من الكلام و المناقشات اللى ملهاش لازمه

و بقيت ازهق من التناقض بين انك تتكلم مثلا على كتاب ايه اللى كنت بتقراه

و مين اللى بتكلمك باهتمام عن ستار اكاديمى

او رجيم مين و اكل ايه


مكنتش بارغى كتيرفى الشغل مع النوعيه دى

و باكره الاحساس ان الناس بتتطفل على تفاصيلك مع محاوله التعديل

زى محاولات توفيق راسين فى الحلال!

او نصيحه من حد بلبس ايه عشان الولاد بيهتموا بالحاجات دى!!

و خد عندك


مش عايزه حاجه مبعملهاش

مش فارقه معايا بقى المفروض و ازاى

مضايقه باحب ابقى لوحدى

و باكره محاوله جرى غصب عنى


مش مهم عندى الناس اللى مش قريبين يعرفوا ارائى

و مش بارضى ابدا اتصرف بشعار المفروض و حد من الكبار يفرض عليا حاجه


بس مع الاغراب و نصايحهم و المفروض

بقيت باسكت و مش مهم دايما اتكلم و لا اقول لا مش المفروض

او انا باحب كذا و مبحبش كذا

او حتى عن العالم بتاعى


المفروض مكنش انا؟؟

المفروض اضحك عشان المفروض

و ازعل عشان المفروض

و اتكلم عشان المفروض

و اسكت عشان المفروض

زهقت من المفروض


بس فيه حاجه وقعت فى السكه

و حاجه مش قادره اتخلص منها


النونو الشقيه بتاعه زمان ام كلام و حركات كتير مش لاقياها

تاهت فى السكه

بتظهر واحده تشبهها فى لحظات قليله اوى خصوصا لحظات التهييس


و اللجام و القيود اللى انا حطيتها عليها زمان

مش راضى يفارقها

و مش راضى يفارقها الخوف من انك تجرب او تغلط او تقول

عشان المفروض!

و عشان خايف تتوجع او توجع


مرتين الاقى حد قريب يقولى

سيبى هبه انتى ليه حبساها و مطوقاها

ليه حطه هبه جوه قمم و قافله عليها

Photobucket - Video and Image Hosting

هبه مفتقده النونو اوى

و مش عارفه تتخلص من التناقض اللى بين بره وجوه

يمكن فى يوم تقدر تطير بعيد عن المفروض..

Labels:

25 Comments:

At 5:06 AM, Blogger Dananeer said...

بعد ما فريت الى كتبته
لقيتنى انا كمان باميز
و مش قادره اقبل المختلفين عنى زى ما قلت

هو احنا كلنا مرضى التميز الداخلى؟؟!
مرضى التقسيمات لجماعات مختلفه من البشر
وراها تقسيمات و تقسيمات و تقسيمات
دول حياه دين لون و مليون تقسيمه بنخترعها و احنا واعيين
او كحتى مش واعيين؟؟

 
At 12:27 PM, Anonymous Anonymous said...

أشكرك يا دنانير علي الكلام الجميل عن حفلة الصاوي وهي كده الناس الجميلة بتشوف كل شئ جميل ‘ والحمدلله إننا بنقرب م الناس بجد

علي سلامة

 
At 1:47 PM, Blogger محض روح said...

ديمل فعلا عندنا حالت رفض غريب لاخر حتى لو تظهرنا بغير كده بحس ديما اننا متحفزين لبعض يمكن سوء النيه بقى الافتراض الاول
مش عرفه افتكرت كلمه لاانيس منصور بتقول كلا منا يحمل بذور كراهيه لكل من ليس من دينه وجنسه ولونه مش عرفه
كتير بحسها صح حتى لو كنت رفضها اصلا
بوست تحفه وبجد حسه انه كلام من جويا انا

 
At 8:52 PM, Blogger Aladdin said...

سبقتيني بتعليقك أنا لست مع كلمة "مختلف" اللي بقت موضة مموجة اليومين دول! كلنا مختلفين باحس الكلمة "عنصرية" فعلا، والمفارقة المضحكة أن شلة "المختلفين" دول متشابهين في حاجات كتير برده!!!

أنا لا اعتبر نفسي مختلفاً وإن رأي ذلك الآخرون. ليس كل من ارتدى كوفية فلسطين وحفظ كام رباعية لجاهين وسمع منير وقرا جارثيا ماركيز وميخائيل نعيمة يبقى "مختلف"!!

أهم حاجة انك تعبري عن رأيك بكل حرية بغض النظر عن آراء الناس، ولو كان هناك هذا الانسان المختلف السامي، فهو/هي تلك الانسان(ة) الذي/التي تعبر عن آرائه(ا) ومشاعره(ا) بكل حرية دون النظر إلى خلق الله من فوق!

 
At 3:56 AM, Blogger Dananeer said...

انونيموس
انا مبسوطه ان الكلام عجبك
;)


محض روح
مش عارفه اقول ايه

علاء الدين
بص اتمنى اوصلك اللى جوايا
و خصوصا كبنوته عندها 24 سنه مجنونه
و فى مجتمعنا

تنكر ان المجتمع بيميز و بيحطك فى قوالب مستفذه

مثلا طفله يبقى بتلعب بعروسه
"من ضمن الحاجات الغريبه مفتكرنيش بالعب بعرايس خالص!
لعب تانيه ممكن
"
شابه
مطبخ و عريس و معرفش ايه
افكار مفروضه!

ده من ناحيه

الناحيه التانيه بعيد عن بنوته
خلينا نقول بنى ادم
مش عارف يندمج مع محاولات الناس لايجاده فى عالم مختلف عن اللى جواه

عشان المفروض
و الذوق و الجانب الاجتماعى
تلاقيك بتتكلم فى كلام انت مش قابلك فيه

والله انا مش بابص للى حواليا على انى اعلى و احسن
بالعكس انا ساعات باحس ان المنطق و الفلسفه و التفكير و الكتب و الاهتمامات الغريبه لعنه

و باحسدهم على عدم التفكير فى الكلام اللى يوجع الدماغ

احنا بنتاثر بحاجات غريبه و مش مقبوله لغيرنا
مثلا
من كام سنه فيه واحد انتحر عشان مش قادر يجيب هدوم المدرسه لولاده و
مش فاكره قبله ولا بعده شتا

ممكن تكون حاجه تضحك
بس انا اتأثرت و زعلت اوى
لدرجه خلتنى اخش فى طور تقشف
و اتكلم عنهم بتاثر

الموضوع ده سببلى تريقه مش عاديه من افراد العيله
حتى لما عديت المرحله دى
و لحد دلوقتى من نوادر العيله عنى

الفكره ان كل وواحد جزيره
كيان مختلف
بشوف الحاجات بشكل مختلف
و مش قادرين نقبل الاختلاف ده

ولا كوفيه ولا غيره
مجرد بتشوف من بعيد و تحلل
و ده عيب
زى ما هو ميزه

انا مش عارفه اوصل اللى جوه
يمكن جمعت احاسيس كتيره فى حته واحده

غضب من تقاليد
غضب من القوالب و المفروض
غضب من نفسى عشان القيود
غضب من سخافه البعض

صحيح انا شفت فى اللوحه حاجه تانيه
:)

صدقنى انا نفسى عايزه اتفرج عليا من غير لجام ولا خوف

 
At 11:00 AM, Blogger karakib said...

كلماتك رسمت لوحة
الوانك اللي أستخدمتيها
خلت كلمة تنط قدامي لما خلصت البوست
حافظي علي نقائك ده و لا تسمحي لأحد أن يلوثه
بس كده

 
At 4:31 PM, Blogger amazing_angel said...

المفروض أن يكون هنـاك لا مفروض,ولكننــا في عـالم القيـود

 
At 10:41 PM, Anonymous The Eyewitness said...

المشكلة الأكبر والأخطر لما بيكون التناقض جوة أو لما التناقض الخارجي بيتنقل إلى تناقد داخلي. لكن لو بيفضل التناقض مجرد شيء خارجي فده مش مشكلة خطيرة وهو ليس إلا معيار يوضح لنا مدى إيماننا بما هو بداخلنا.

 
At 3:25 PM, Blogger Sokomonoce said...

الاختلاف هو سمة الواقعية ولا نستطيع ان نغيرها لكن ان نستخدمها فى التمييز فهذا ضد الواقعية التى خلقنا عليها ان تكون مختلف فهذا رائع و ان تكون متميز فهذا قمة الروعة واما ان تكون موميز بضم الميم الاولى وبشد الياء بمعنى ان تميز بين الناس فهذا قمة الرجعية والتخلف اذ تفرق بين الناس على اعتبارات قد وضعها الخالق نفسه للتشكيل والتجميل واظهار الجماليات فى الاختلاف

حد فاهم حاجة من اللى انا قلته علشان يفهمنى انا قلت ايه؟

 
At 7:57 PM, Blogger سلسبيل said...

حسيت لحظة انك بتتكلمي عني..لاني عندي نفس المشكلة
وحسيت كمان انها مابقتش مشكلتي لوحدي وان اخيرا حد شاركني فيها...يعني طلعت مش مجنونه ولا مخي متركب شمال
حقوللك كلمه واحده
طلعي هبه من القمقم...واصنعي فرضياتك وقوانينك الخاصه بيكي انتي..وانسي المفروض واللازم واللي ينفع واللي ماينفعش..طالما انتي عارفه انك صح..

 
At 12:04 PM, Blogger Sarah ElTobgy said...

Mesh mesadda2a eni ba2ra el kalam da 3ala post mesh beta3i.. ana khoft 7ad ye2raa wana a3da 3al laptop yeftekerni 3amla blog tnai serri :) kalamek mesh 3an el ekhtelaaf bas.. 3an fard el mafrood.. nefsy ashoof meen elli farad el mafrood.. ana katba posts keteer menha wa7ed be 3enwaan "meen elli farad el mafrood" bas mesh adra anshorhom.. mesh 3arfa.. 7asseit en law 7ad el kalam da hay2ool 3alaya mo3aaqa of some sort! Howa ana mesh na2sa kefaya kam el tamseel elli bamasselo kol youm 3ashan ab2a shabah el nas elli 7awalayya.. elli 3ayzenni albes dahab.. w ab2 zai mahomma shayfeen msh zai mana 3ayza! a3od lwa7di amma a7eb.. asala7 computers zai mana 3ayza.. 7atta e7sassi eni raghm 7obbi lel nas wel socializing i would sometimes be grateful if people wouldgive me my space to enjoy..! without intruding to ask if i am OK coz i decided to me "ma3a nafsy shwayya" :( i don't know.. i really thank oyu for being that honest and for gor2etek fel ketaba.. yemken your post today yekhaleeni afakar fi 7agat keteer awi..

 
At 5:52 PM, Blogger fares said...

جميل اوي علي فكره ياريت تشرفيني علي مدونتي

 
At 7:21 PM, Blogger مي said...

This comment has been removed by the author.

 
At 5:12 AM, Blogger Dananeer said...

كراكيب او هانى
ربنا يخليك
الصفحه البيضا حلم

دودو
مش كده

eye
الكيميا جوا تعبانى اليومين دول
الدنيا منكوشه
مع الفركشه المستفذه بره
بيكون كتير

sokomonce
حلو اوى
اكيد حد فاهم حاجه
يسلم بقك

سلسبيل
لو يسيبونا على اخينا مش المفروض ده و يشوف كام واحده و واحد حيخلص عليه
كونك تخرجى من القفص مش سهل و مش بيجى مره واحده

ساره
انت اللى فرحتينى
بالضبط
مساحه من الخصوصيه تحترم
مع احترام اختياراتك

فارس
نورت
انا زرتك سريعا بس اوعدك ارجع ابص بتانى
بعيد عن التعذيبات

 
At 11:54 AM, Blogger سندباد said...

لكي أكون صريح معاك...أنا زرت مدونتك بعد ما قريت تعليق إنت كتباه في مدونة برايد

(و سيادتى مهندسه باهتمامات مختلفه تماااااما )

و فعلا طلع إن سيادتك بنت مختلفة تماااااما

ودا مش عيب...لأن الأسماك الميتة هي من تمشي مع التيار

تحياتي لك

 
At 4:32 PM, Blogger كراكيب عادل said...

الله حلو اسلوب بساطتك في الفضفضة دة عجبني
















تحياتي

 
At 10:17 PM, Blogger el2ahwagi said...

3ala fekra... mosh moshkela ennik torfodi elnaas elli 7awaleeki .. we mosh moshkela en elnaas yorfodoona ...

elmoshkela ennohom ye7awo yeghayaroona aw e7na n7awel neghayarhom .. hena elmafrood wel lazem yeb2o too2 beyokhno2 ...

ana zayik sa3at keteer ba7es bghorba 3an el naas ... ana wef masr kan aktar ... 3ashan el naas 3andena da mazag 3andohom eltadakhol fi sho2oon elakhareen wefard qoyood 3aleehom ... w lamma n2ool la2a ,,, net7awel lemakhloqaar ghareeba tezeed fodoolhom wetatafolhom 3ala 7ayatna we fard almazeed men elqoyood ...

soganaa2 afkarhom ... yekraho yeshoofo 7ad et7arrar menha ...

elmohem ennik teseebi eltefla elsoghayara tetnafes ... law 7assa ennaha makhnoo2a edeeha shwayet hawa ... 7aba 7aba ... le7ad materga3i lenafsik tani ... sa3etha hatdoosi 3ala kol elqoyood ..

2olti kalam keteeer awi kan w mazal beydoor fe bali ...!!

 
At 11:49 PM, Blogger IRC President said...

قلبتي علي المواجع :D

ثقافة الإختلاف من الحاجات المطلوبة جدا في المجتمع بتاعنا

 
At 12:54 AM, Blogger Dananeer said...

سندباد
ليه بس الفضائح دى
انا مهريه تريقه فى البيت بسبب الموضوع ده
:)

كراكيب عادل او عادل
ربنا يخليك
بس ليه المسافات دى كلها

القهوجى تعليقاتك وحشتنى
بجد

IRC
نعمل ايه بقى

اعتقد اننا محتاجين اكتر نفبل الاختلافات من غير محاولات التدخل الموجه

 
At 1:04 PM, Blogger إبـراهيم ... معـايــا said...

الجميـل إني لاقيتك كاتبة تعليق لنفسـك ، وأنا اللي كنت فاكر أنا بس اللي بعمل كدهون !! ...

تحياتي يا دنــا نير

 
At 4:44 PM, Blogger ياسمين said...

دنانير

هتصدقينى لو قلتلك ان دموعى نزلت وانا بقرا البوست

أنا بقى فضلت زى ما انا .. مختلفة فى نظر الاخرين عادية فى نظرى

صممت انى طول حياتى ما ألبسش قناع واقول اللى نفسى فيه واللى بافكر فيه واللى بحبه اعمله بدون أخذ رأى حد

ويا ريتنى ما كنت كدة .. فى الآخر يعجب بك الناس لكن يتحاشونك أو يتناولن شخصيتك فى حواراتهم الخاصة على انك عجيبة من العجائب

 
At 7:46 PM, Blogger حاول تفتكرنى said...

الاختلاف فى حد ذاته تنوع
والتنوع يخلق الجمال
ونسخ الشىء يساوي مسخ


الموضوع شيق
وأكيد له روافد حوارية كثيرة
تحياتي

 
At 9:39 PM, Blogger bluestone said...

المشكلة ان حياتنا محكومة بقيود المفروض .. وخصوصا لو كنتي بنت المفروض بيدخل في نطاق العيب
ولو تحديتي الكل .. وبقيتي انتي .. صحيح هتكوني كسبتي كتير .. اولها تفردك في انك انتي مش حد تاني
لكن ما افتكرش اي حد فينا قدر يتغلب على شعور الوحدة بعد انتصاره في المعركة دي .. بس لانه مش زي اي حد ..

 
At 10:50 PM, Anonymous Anonymous said...

ba3d ma2ariit al post bta3aak fta7t la2iiit bal sodfa al link dah
mosh 3ariif iza kan 7isa3dak wala la2 bas yariit ta2riih we t2olilii ra2iak http://forum.amrkhaled.net/showthread.php?t=31110

 
At 9:40 AM, Blogger Dananeer said...

ابراهيم
انا باكتشف البدع بعد ما اهذى و اشوف ايه اللى جوا

و مين كدهون ده؟

ياسمين
اوحش حاجه نظره حكم جايره

حاول تفتكرنى
معاك حق
حاجه كده زيها زى صراع الاجيال
مش حتنتهى

القهوه العاليه
معاك حق
عصب عننا ساعات بننكسر
و ساعات بنكرر نسكت و خلاص عشان زهقنا

Anonymous
ابراهيم الفقى راجل كوبره
بس انا مبحبش اقرا الحاجات دى
;)

 

Post a Comment

<< Home