Saturday, April 12, 2008

لسه بأحلم

Photobucket


وحشتنى حاجات كتير اوى

وحشتنى الصفحه البيضا و اقلام زمان و الشخبطه

وحشتنى الشاشه الساكته و طرقات الكى بورد و انا باملاها زى المجنونه

من غير ما ابقى عارفه بالظبط حتودينى لفين

لحد ما اخلص و اشوفنى

اشوف اللى جوايا و افهم حاجه


وحشنى الكمبيوتر اوى و وحشتنى البلوجات

و الاغراب اللى مش اغراب و قوت القلوب

وحشتنى دنانير جدا بكل اللى جواها و بتعبيرها عنه على ورق


وحشنى بابا نويل اوى و كل ما اعرف من حد ان بره لسه فيه ثلج

باقوله جوايا حابعتلك جوابى اللى معرفتش اكملهولك و ل 2007

كل مره تسمحلى الظروف اعقد قدام الشاشه كان بيبقى اول حاجه نفسى اعملها

مكنتش باعرف اقولك

لقيتنى مبقتش عارفه اكتب و لا اقول

مش عارفه اخرج اللى جوايا حتى على ورق او شااشه و سطور

اوقات كنت باحس انى عايزه اعيط

و باهرب م الشاشه و الاقلام و الورق


غريب اوى احساس انك مليان حواديت و كلام و ساعات غضب و وجع

و وقت ما تلاقى ملجا تلاقيك مش عارف

مش عارف تقول لنفسك ايه و لا تقولك


يااه قابلتنى حاجات كتيره اوى و حصلى كتير اوى الشويه اللى فاتت

فيه حاجات بافتكرها باحس ان بقالها زمن مش شهور

عمر!


فيه اماكن قريبه لقلبى بلاقينى باعيط و انا باشوفها بعد زمن و بمر عليها مرور عابر سبيل

فيه وقت مبتبقاش عارف انت مين زمان و لا دلوقتى

ولا عارف حتى المكان


بتلمع ف ايدى دلوقتى دبله بقالها بالظبط 5 شهور و 3 أيام الا كام ساعه

بقى عندى حكم مبعرفش انام غير لما اسمع صوته

بقى عندى شقه بيدخلها نور الصبح و الشمس و لما تبص ممكن تلاقى خلا

بقى عندى فرحه قلب حد اخيرا لقى انسان بيحتويه و بيحس باللى جواه من غير كلام


ساعات باحس انى باحلم و باحمد ربنا

كله مقدر و كتوب و ف أوانه


مقلتش قبل كده بس اخر حاجه كانت ف حساباتى دبله و شقه و عريس!

لو سألت اى حد قريب حواليا حيقولك انى مجنونه و مضربه عن الجواز

و دايما باهرب م الحب و المسئوليه و الوجع

نصيره الحريه و المدافعه عن اضطهاد الجنس الآخر

و مش ناويه تقع تحت رحمه واحد منهم

كفايه اللى شافته حواليها

و كفايه خلافات غيرها اللى علمت بشكل او التانى جواها

دايما كنت باعرف اعمل حاجز يخلينى بعيده عن اى محاوله قرب

و دايما كنت باعرف اجرى كويس و اختفى


و اول مره يضحك عليا و حد يستنانى ف اخر الممر لحد ما امشيله و اكتشف

انى اتكعبلت و مش مخيفه اوى و مرعبه زى ما كنت فاكره

كل ما اخترع غفريت ف السكه واقف او احاول ارجع ينورلى السكه من بعيد

و الاقينى مش قادره ابعد عن صاحبى و الصوت اللى باحب رنته


زمااان اوى حلمت حلم فضل معلق جوايا

كان من 7 سنين ان مكانش اكتر

كانت تانى سنه ليا ف الكليه

و تانى يوم كان حيبقى يوم دراسه

و رغم انى مكنتش رايحه ف حته

الا انى معرفتش انام و حسيت انى عايزه اعيط

و مخنوقه تمام زى اخر يوم السبت ف الاجازه قبل المدرسه


حلمت انى ف المدرسه

مكان جديد ليا وسط ناس ف هدوم كحلى زيى و كل واحد على دسكه اقلام و ورق

و واحده بتلف

اكنه امتحان و كنت خايفه

بابص حواليا الاقيهم بيكتبوا و انا مش عارفه اعمل ايه

و لا معايا أقلام زيهم

لحد ما قرب منى ولد مش عارفه ظهر منين

و ادانى قلم و رجع خطوات و وقف جنب باب الفصل و هو بيبتسم و بيحضنى بعنيه

و لقيتنى مسكت القلم

و بصيت لعنيه و اطمنتله و كتبت


حلم طفولى ميعنيش اى حاجه

كنت بافتكره اوقات

كنت باحاول افتكر ملامحه

مكنتش بافتكر غير عنين عسلى دافيه فيها لمعه

محكتش لحد الحلم بس فاكره انى صحيت مسكت ورقه و قلم و كتبته و كتب التاريخ

ف ورقه اتشالت وسط حاجات كتير

لقيتها صدفه بعدها و ابتسمت


دايما باحس انى وسط زحمه الدنيا دى خايفه و مش عارفه اتصرف

و دايما عنيه و ابتسامته بتطمنى و بلاقينى باعرف اتحرك

اول مره افهم معنى حاجات كتير و احسها


اسمى بقى ليه طعم

وجودى بقى ليه طعم

اول مره احس انى الدنيا لحد

و اول مره لما اتخانق مع حد اوى احس انى زعلانه منه و عليه و خايفه

كان نفسى الدنيا تبقى فيلم كارتون كل حاجه فيها بسيطه حتى الخناق و الشر


علمنى ان الدنيا احلى من اى فيلم كارتون

مع كل خلافتنا و كل الضغوط اللى فيها

اللحظات الصغيره اوى اللى ف الوسط بقى ليها طعم تهون عشانه كل حاجه


بقيت مضغوطه اوى من ناحيه

الدنيا بقت صعبه اوى

الشوارع و الناس و الشغل

الجوع و الغلا و الضغوط

اسعار الشقق الفلكيه و النصابين التقال اللى وقعنا تحت رحمتهم

و المقاولين و اصحاب المبانى اللى كل اللى يهمهم ياخدوا فلوس

و مش مهم يدوك امتى و حتاخد ايه


كل خطوه بقى فيها قلق

ساعات بابقى عايزه اعيط زى العيل اللى اتكسرله لعبه

بس دى مش لعبه دى شقه و حياه

مش عارفه ليه مش بيحسوا بده


دخلت ف اول خطوه ف دوامه الست حياه

بقلب طفل

و احساس عجوزه

و من حين للتانى لما احس انها بتيجى عليا اوى

بارجع افتكر و اقول لنفسى

أنا باعيش!

انا عندى حلم!


ابراهيم

انا كمان معرفكش شخصا

بس انت اللى خليتنى لقيت الحروف

انا بجد متشكره

10 Comments:

At 11:30 PM, Blogger مـحـمـد مـفـيـد said...

وحشني كتابتك جدا

 
At 4:19 AM, Blogger Hamed Ibrahim said...

حمد الله ع السلامة
أجميل شيء الكلام البسيط
اللي خارج من القلب مقذوف مباشرة على الكيبورد بدون ترتيب ولا تنسيق ولا عبارات متسقة ولا نحو ولا أي حاجة غير إحساس فقط

كلامك ده خلاني أحس إنها وحشاني جدا
:(

 
At 12:51 AM, Blogger محمد صبحى said...

الله عليكى بجد

عودا حميدا ياعصفورة

مستنى كتاباتك بعد فترة الغياب دى

 
At 3:27 AM, Anonymous ابراهيم LionHeart said...

السلام عليكم ورحمة الله وبركاته
اختى عصفورة
اولا الحمد لله على سلامتك وانك رجعتى تانى
لعشك بجد يعنى الانترنت كله منور

ثانيا بقى مبروك على الحلم الجديد يا عصفورة مبروك على العش الكبير
العش اللى بحق وحقيقى مبروك على الدبلة وعلى الارتباط ان شاء الله موفقة حافظى عليه وكبريه وخليه اجمل عش مهما كانت الظروف صعبة ان شاء الله هتقدرى طول ما فينا نفس ولسة بنحلم يبقى في امل

ثالثا متشكرنيش يعنى انا مفروض اشكرك على فكرة لانك ماتعرفيش كلامك لما قريته عمل فيا ايه وقد ايه فرحت بكل
كلمة فيه واهم من دة كله انك لاقيتى حلمك دة فرحنى اكتر

عارفة....احلمى...اهم حاجة طول ما احنا عايشين اننا نفضل نحلم مهما كان الحلم دة صعب او بعيد بس لازم نحلم علشان نعيش اصل الدنيا هتبقى صعبة اوى من غير حلم و اصل احنا لو بطلنا نحلم نموت

 
At 3:32 PM, Blogger ريحانة said...

مش ممكن بساطتك فى الكلام
روعة السكون اللى مالى صفحتك
مبروك:)

 
At 6:03 PM, Blogger أنا من كنت محتاجاً said...

جميلة أوي الأحاسيس دي ...ربنا يوفقكم مع بعض

 
At 5:40 PM, Blogger .::```ElGeNeRaL@HaMdY```::. said...

انا عملت مدونه واتوافق على طلبى بس مش عارف اركب الاعلانات على موقعى يا ريت المساعده hamdy_elhalwany@hotmail.com

 
At 10:54 PM, Blogger Eman M said...

:):)
a new life is waiting for you dear, lovely life ensha2allah.

 
At 10:39 AM, Blogger إبـراهيم ... معـايــا said...

يااااااااااه يا دنانير، أنا كمان واااحشني قوووي المرور عندك، إنتي فين يا بنتي ، من زمااااااان، حتى التدوينة جدي شكلك سبتيها، ومشيتي ؟!!!


عودي بــســـررررعة ...
هكمل قرايىة

 
At 7:36 AM, Blogger محمد قرنه said...

فعلا القراية ليكي ممتعة
وعود أحمد إلى شخصية دنانير
لا تغيبي عنها كثيرا
ومبروك ليكي كتير وإن كنتي المفروض تخافي شويا من الحسد :)

 

Post a Comment

<< Home