Thursday, June 21, 2007

حق دول فين


يوما ما نازله من بيتنا

و نطيت فى اول تاكسى رغم ان المكان مش بعيد

منعا للقرف بتاع شوارعنا الحلوه

خصوصا فى الصيف


فى السكه و عند القصر العينى شاورت للتاكسى ووقف


هيه كمان كانت رايحه العجوزه

لفيت دماغى ورا اشوفها لما اتأخرت

لقيتها ست كبيره لابسه اسود و شكلها تعبان


قلت للسواق اطلعلها قدام


قالى لا خلاص


المهم ركبت و مطلعتش كبيره زى ما كنت فاكره بس شكلها حزين و تعبان اوى

و لابسه جلبيه سوده بسيطه زى معظم ستات البلد دى


السواق سألها فين فى العجوزه


قسم العجوزه


ايه ده القسم؟؟


انا فاكر انك عامله عمليه

انتى اتضربتى فى خناقه


و تحول صوت الست التعبان للعياط

عياط منهك

ما انا عامله عمليه

ضربونى و فكوهالى و بهدلونى

و انفجرت فى العياط


اهدى بس اهدى

ايه اللى حصل


اهل جوزى ضربونى بعد ما ولدت و فتحولى العمليه

و عورونى فى كل حته

و خدوا ابنى اللى مكملش اربع تيام منى

و تعيط


و جوزك فين؟؟

و رايحه القسم تبلغى؟؟


اتخانقت معاه عشان كان بيضربنى و سبت البيت و رحت قعدت عند اهلى

و اختفى من خمس شهور و معرفش عنه حاجه

خطفوا ابنى و خدوه منى

انا عايزه ابنى


عملتى محضر؟

رايحه قسم العجوزه ليه؟


عملت و طلبوا منى اروح القصر العينى اجيب

ورقه تثبت الاصابات

اصل هما ساكنين فى المهندسين


و كان لازم انزل

و بجد مكنتش عايزه و صعبت عليا اوى و حسيت بالغضب

و مقدرتش امسك نفسى و طلعتلها فلوس رغم انى باتكسف اعمل كده

و رغم انى ياما اكتشفت مقالب و نصب


و وانا نازله حطيتهم فى ايدها

و لقيتها انفجرت فى العياط اكتر

و فى عنيها حزن و كسره مشفتهومش و مقدرتش استحملهم


لا يا حبيبتى انا مش عايزه حاجه


ربنا يسترها معاكى


ملقيتش حاجه تانيه اقولها و طبطبت عليها

و نزلت و انا مضايقه م الدنيا

حاسه انى على قد ما انا مكسوفه منها على قد ما انا عايزه ادى الدنيا قلم

و عايزه اخلص على كل البنى آدمين اللى ميستهلوش كلمه بنى آدم اصلا


و حاسه بقهر واحده ست غلبانه ملهاش ضهر

و ملهاش حول ولا قوه


و بتمثل الاغلبيه فى البلد اللى مبيرحمش ده


كام ست مش واخده حقوقها و بتتعرض للضرب و الاهانه و الطلاق و الرمى فى الشارع

هيه و عيالها

بسبب حيوان ميستاهلش

........................

يوم تانى وراه عند الكوافير

و وسط كم الرغى

و انا مجرد مستمعه و متفرجه

شدنى حوار مختلف عن الحوارات الفارغه بتاعه التسالى


صاحبه الحوار دكتوره لسه بتدرس او فى مرحله ما قبل التخرج

بتاعه الكشف على العيانين و اللف فى المستشفيات و الشفتات


مشدنيش حوارات العيانين الحافظين أمراضهم و عارفين تكنيك الدكاتره و اسئلتهم

و كله حسب العرض و الطلب

و بيتاجروا بعياهم عشان ياكلوا


قد ما استفذنى الحوار اللى جاى


تعرفوا ان فيه عيانين تانيه ساعات بيهربوا عشان

منكشفش عليهم –الطلبه و الدكاتره-


و ساعات بتخانقوا معانا و مع الدكاتره

عشان رافضين ده


مره فيه واحده ست

دى اكتر واحده صعبت عليا

كان عندها سرطان الثدى و الدكتور خدنا نشوفها

و يشرحلنا عليها

و مرضيتش تقلع و نشوفها

و فضلت تعيط


الدكتور قالها

بصى حتعيطى حتططنطى حتقلعى ياعنى حتقلعى

و حيكشفوا عليكى


و نادانا نكشف

انا بجد صعبت عليا و كنت مكسوفه و انا باكشف عليها


بس احنا لازم نكشف عليهم

هما المفروض انهم جايين و عارفين ان مقابل علاجهم ده مستشفى تعليمى و لازم نتعلم


مفيش حاجه ببلاش

و هما طالما جم المفروض عارفين ده كويس


يااااه

احنا مش بنقدملهم خدمه ببلاش

و هما اللى جم و هما عارفين!!!


و مين عجوزه زعقتلنا و الدكتور اتخانق معاها

و مين عيطت بس يا حرام صعبت علينا

بس لازم نتعلم!!!


هيه دى الخدمه اللى دوله البهايم دى بتقدمها

فى المستشفيات الحكوميه للغلابه


و هو القصر العينى ده اصلا يصح يسموه حتى مكان آادمى

و لا يعتبروا اللى فيه بيحترموا أرواح الناس و اوجاعهم و حاجاتهم


كفايه تدخل تشوف المعامله الزباله من اول الباب لحد الممرضين و الدكاتره

و الناس اللى سايحه فى دمها و مرميه و مش فى العنابر


خدمات و علاج

شي الله يا خدمات

ده الشاش و القطن و اى حاجه

بيجيبوها من بره


مش كفايه كمان ذل و اهانه و يتحولوا لسلعه غصب عنهم


ايه احساس اى واحد من دول لو دارت الدنيا بيه و بقى مجرد شحات غلبان

موجوع عايز يتعالج و مضطر

و يجوا يوقفوه عريان و يتحول لوسيله شرح

و سيبك بقى م الألم و قلق الراحه كل شويه

فين حقه كبنى آدم انه مينتهكش كده

لا جسمه و لا مشاعره و مرضه


ده غير العلاج الغلط و الفوط اللى بتتنسى و الناس اللى بتسمم و تموت


و ياعينى الدوله عملت كتير و تأمين صحى

و مش قادرين نقدم اكتر من كده خدمات ببلاش و حنلغيه


و النبى روحوا موتوا

و كفايه قرف

هو انتم قدمتوها يا شويه غجر

هى دى خدمه!!

26 Comments:

At 6:26 PM, Blogger تسـنيم said...

ما تتخيليش وجعتيني أد اييييييه وبالرغم من أننا كلنا بنمر بحالات كتير من دي لكن هيا دي مصر يا عبلة

 
At 7:04 PM, Blogger Ahmed Shokeir said...

دنانير

Great post, I choose it ...

Post of the day

 
At 9:03 PM, Blogger مـحـمـد مـفـيـد said...

بصراحه
اوجعتني سطورك ولكن مش عايز ين نحصر الظلم من الرجل الي الست
ولكن الظلم وعدم الرحمه متفشره في الكل ومنتشر بصوره فظيعه
بوست حساس جدا

 
At 9:39 PM, Anonymous The Eyewitness said...

كل يوم بحس أكتر أن أحنا لازم نعمل حاجة، لكن من كتر الحاجات آلي لازم تتعمل أحياناً مبتعرفش تعمل أيه ولا أيه، لكن يمكن لك واحد فينا مدعو أنه يكتشف هو كشخص لازم يعمل أيه....
شكراً على البوست مع أنه وجع قلبي....

 
At 3:33 PM, Blogger عــلا said...

و جعتي لي قلبي بالبوست ده يا دنانير..

متهيألي في ناس كتير ممكن ترحب بالكشف عليهم مقابل فلوس.. طيب ما يدفعوا لهم و يسيبوا التانيين في حالهم.

باتكلم كأني عايشة في بلد تانية.

 
At 7:30 PM, Blogger karakib said...

لا تحملي نفسك اكثر مما تستطيع
عارف انه ساعات الحاجات دي بتنط قدام عنينا غصب عننا
يا عزيزتي
انها تلك الحياة البغيضة التي جئنا اليها دون ارادتنا لنتعذب و نقمع و نري القليل من اهوالها
ثم نرحل عنها ايضا دون ارادتنا

القليل من اهوالها بس

 
At 7:58 PM, Blogger Dananeer said...

تنسيم
مش حاقولك صعبو عليا اد ايه

احمد
ربنا يخليك
كفايه انك هنا
اعمل ايه كنت متغاظه اوى

محمد
مش حصر و لا حاجه
بس معظم الطبقه الى مش متعلمه
غير المتعلمه اصلا
الست بتتبهدل فيها و بتتعامل كقطعه طويله الأمد

eye
بحد نفسى احس انى عملت حاجه
و مش مجرد فلوس
و نفسى اللى جاى ميكونش بالقسوه دى

علا
مفيش حل

هانى
غصبن عن الواحد
الواحد بقى بيخدر نفسه و يبعد عن الاخبار و الجرايد و تلفزيون
اعمل ايه طيب

 
At 9:34 AM, Anonymous محمد said...

بصراحه انا تالمت جدا لما قرأت كلامك
الإحساس بالظلم و القهر و الضعف اسوأ شىء ممكن يكر به الإنسان و خاصة لما يكون مريض

 
At 9:54 AM, Blogger الحلم العربي said...

صعب اوي فعلا
أنا شايفة ان للاسف معظم الستات في مجتمعنا مظلومين.....لأن واحدة زي الست دي مش هتعرف تجيب حقها غير بعد عذاب و بهدلة في الاقسام

بالنسبة للمستشفيات التعليمي
بجد شئ مهين جدا....أنا اختى دكتورة في مستشفى شبيهة بدي لكن بتقولى ان الموضوع ده بيحصل كل يوم و هما مش بيعرفوا يعملوا ايه ....هي بتحاول على قد ما تقدر تحافظ على خصوصيتهم لكن المشكلة في التفكير العام للدولة ....ان ما دمت ما بتدفعش يبقى من حقنا نهينك بثمن العلاج اللى هتتعالج بيه

بجد حاجة تقرف

شكرا على التدوينة اللى توجع القلب
تحياتي

 
At 2:55 PM, Blogger Amr Ahmed said...

احب اقولك ان قلبنا اتوجع

تمام

ممممممممممممم

حاجة تنكد

حسبنا الله ونعم الوكيل

 
At 5:51 PM, Blogger MoHaMeD HoSSaM said...

بجد حاجة تقرف انا مش عارف ازاى هما معندهمش احساس وبيعتبره ان دا شى عادى

حسبى الله ونعم الوكيل

 
At 1:17 AM, Blogger مصرى said...

حاجة توجع القلب

 
At 3:06 AM, Blogger MaLek said...


جامده,ولسه بدري,ولسه في ياما حاجات اوجع

 
At 9:57 PM, Blogger تسـنيم said...

بوستك ده كان السبب في إني أنزل بوست القهر تعالي اقريه واقري بوست هيا دي مصر يا عبلة

 
At 12:09 AM, Blogger makhlouf said...

اللى حكتية ده يعنى الفساد

 
At 4:20 AM, Blogger Geronimo said...

عارفة كنت في تونس وهناك شفت بيت جميل قوي

بيت زي الفندق الصغير
لما ست جوزها يضربها
او تتعرض للعنف بأي شكل

بتلجأ له بمجرد ما بتدخل بتتسجل بياناتها وبيبدأوا يخصصوا شخص للاستعلام عنها

لو محتاجة لصلح مع جوزها او رفع قضية عليه وتاخد حريتها

او اى مشكلة اغتصاب او ضغط اهلها بسبب الشرف

بتخش الست بجرحها وتفضل فترة لغاية ما تتأهل نفسيا وجسديا للخروج وللعمل وللوقوف على رجليها

بيطوع لها محامين لعمل البلاغات والامور القضائية

انا بتخيل انه جوه البيت ده ممكن اى ست ف الدنيا تعرف انها بني آدمة ولها قيمة ومش المفروض تتهان او تعامل كحيوانة ...

البيت هناك مش مليان

لانه الراجل طول ما هو عارف انه مراته اللى هيجرحها ويبهدلها هتلاقي مكان تلجأ له ويحميها

عمره ما بيتجرأ يعمل كده

لكن للاسف الست ف بلدنا زي ما قلتي ملهاش ضهر

وعموما ف بلد مفيهاش حقوق انسان

مش هيكون فيها حقوق مرأة او اي شئ

ربنا يرأف بعباده
ملناش غيره قادر ينصف المظلوم

 
At 10:36 PM, Blogger OMA said...

ya nhar abyad
eldonya b2t we7sha awy
eh el nas dol
homa begd mafesh dam fe 2labhom zayena wla eeh :|
mosh 3arfa a3al2 3la ay 7aga
bs begd 7asbeya allah w ne3m elwakel fe ay 7ad yestathr bebany adam...w klo salf w den

 
At 11:38 PM, Blogger Amira Hassan said...

بالنسبة لموضوع الست اللي كانت في التاكس فمش هعلق عليه لانه تعب لي اعصابي بجد

و بخصوص القصر العيني ..معرفش قريتي تحقيق الصحفي هشام علام هو زميلة له في المصري اليوم لما دخلو ببلطو الدكاترة و كشفوا على العيانين من غير ما يحد يقف و يمنعهم...مهازل..مصر كلها مهازل اساسا

 
At 10:15 PM, Blogger Dananeer said...

محمد
معاك حق مفيش اسؤا من الاحساس بالظلم و قله الحيله

الحلم العربى
مهى دى المشكله
جيل بيشوف ازاى الجيل اللى قبله بيتعامل مع الستات و بيطلع متربى على الاهانه و اعتبارها قطعه او اداه للمتعه
مش من حقها يكون ليها تى حاجه
لا رأى و لا احاسيس و لا انسانيه ترفض انها تتهان و لا و لا ولا

حتعمل ايه فى طفل شايف ابوه بيعمل كده مع امه و طلع من دلوقتلى كده
طب لما يكبر بقى حيبقى ايه
وحش!!

نفسى يكون فيه حل خصوصا لاطفال الطبقه الفقيره زى ابن النجار اللى باتكلم عنه

عمرو
آسفه
و حسبنا الله ونعم الوكيل

مصرى
فعلا

مالك
طب و بعدين بجد

تنسيم
معلش مكنش فيه نت حاروح اشوف

مخلوف
يعنى فساد أرواح قبل اى حاجه

سمسمه
باحلم بيوم متبقاش الست حاسه بالضعف و قله الحيله
و الاستسلام عشان مفيش حل ما بين الاهل و زوج مبيرحمش
يا ريت يا سمسمه يوم يكون فيه بيت و قوه تمنع ده

oma
فيه اسؤا على رأى مالك

أميره
لا مقريتوش
بصراحه بقت عندى حاله قرف من الجرايد
و من عدم المصداقيه جنب الحاجات اللى بتوجع

 
At 2:47 PM, Blogger كراكيب نـهـى مـحمود said...

جميل اوي يا دنانير اوي اوي

 
At 12:55 AM, Blogger شغف said...

ليكي تاج عندي

باختصار التاج بيقول :

ايه الأسباب اللي تخليكي تحبي الحياة ؟

 
At 8:10 PM, Blogger amazing_angel said...

waiting ur next post!!!

 
At 3:56 AM, Blogger dead man said...

يا مصري ليه دنياك لخابيط

 
At 4:09 PM, Blogger Epitaph said...

tab wel 3amal! akeed momken ne3mel 7aga nezee7 beeha el wag3! :(

 
At 7:36 AM, Anonymous مرمر said...

يبقى انت اكيد فى مصر.......!

 
At 11:28 AM, Blogger جوستيـن said...

حلو

 

Post a Comment

<< Home