يويو و انا و ايدين بتسندنا

مش قادره اكتب عن حاجه
عن حرب ظالمه
و عن اطفال بتموت من غير رحمه
وعن بلد بتتحول لاطلال
ولا عن سكوووت
و لا عن بلد زى بلدنا ميت اصلا
بجد مبقتش قادره اتفرج ولا اتكلم

حاكتب عن يويو
الطفل المعجزه اللى عنده سنه و كام يوم
و لسه يادوبك بيحاول يمشى
فى لحظه امبارح شفته
و هو بيتسند على ايدين الناس حواليه
عشان يتحرك
و يمشى خطوه و التانيه لوحده
فبل ما يقع تانى
او يلحق نفسه و يرمى نفسه
على ايدين تمسكه تانى

حسيت ان كل واحد فينا يويو
بنحتاج ايدين تسندنا و صوت بيطمنا
نفوم نرفع رجلينا و نتحرك لقدام
صحيح مش بنتحرك كتير
صحيح ممكن نفع
بس بنلاقى ايدين بتتمد
و صوت بيطمنا
عشان نقوم نمشى من جديد

لازم يزودوا الناس اللي بتدينا على قفانا

مرة
الريس عايز يزود شعبيته فقال لرئيس الوزراء يعلي الأسعار

فالناس تتضايق يقوم هو ينزلها

، فعلا رئيس الوزراء زود الأسعار، بس

الناس ما اتكلمتش، عادي خالص

،

% الريس استغرب قوي، وقاله: طب خلي الضرايب على المرتبات خمسين

زود رئيس الوزراء الضرايب خمسين فى المية

الناس هزت دماغها وسكتت

الريس اتجنن وقال لرئيس الوزرا بص، طلع أي قرار غشيم من عندك يخلي البلد تولع،

رئيس الوزرا عمل ضريبة اللي يعدي كوبري يدفع عشرة جنيه

، الناس نفخت و ضربت كف بكف ودفعوا،

فقام رئيس الوزرا خلى اللي يعدي يدفع عشرة جنيه وهو طالع،

وعشرة

جنيه وهو نازل من الناحية التانية، الناس قالت اللهم طولك يا روح و أمرنا لله و دفعوا.

رئيس الوزرا كبرت فى دماغه، وأمر إن اللي يعدي بعد ما يدفع عشرة

جنيه، و هو خارج من الكوبري ياخد على قفاه، و نزل الريس بنفسه

متنكر يتابع الموقف،

الناس تدفع وهية طالعة الكوبري عشرة جنيه، و

عشرة جنيه و هية نازلة و تاخد على قفاها وتمشي،

" شوية و لقى واحد بيزعق و متضايق، وطى على ودنه قال له مالك؟؟

له "حاجة تقرف! أنا متعطل هنا بقالي خمس ساعات..

ما ينفعش كدة قال:

..لازم يزودوا الناس اللي بتدينا على قفانا!!!!!!!!"

............

*جامده يا تامر

خطر على الصحه

قالى: ايه الجرانين اللى ف ايدك دى
رضيت :جرانين معارضه
مبقتش اقرا جرانين الحكومه
رد: انا بطلت اقرا جرايد خالص
بتتعب

نسينا احنا مين

لسه مخلصه فرجه على اكرم و بلال فى العاشره مساء
و بصيت على الاخبار و شريط الاخبار فى الجزيره
و كل مادا باتعامل مع الاحداث ببرود يكسف
كام واحد مات النهارده
يااه بقوا كذا
يااه العراق 70 واحد ماتوا
60
100
قطع بنعدها
من غير وعى من غير احساس


مش عارفه
دول بنى ادمين
مش ارقام
بجد انا مكسوفه اوى
مش بس من نفسى انا بقيت مكسوفه مننا
لاعارفين نساعد نقسنا ولا حتى غيرنا
وبقينا بارديييييين و عمليين
اشك نكون واقعيين والا ماكانش ده بقى حالنا
بلد عربى نازليين فيه ضرب و تقطيع
واحد ورا التانى بيمصوا ف دمهم
واحنا معاهم

لبنان مش مجرد بلد عربى
كله فجر و كفر
زى ما فلسطين مش مجرد حته ارض و اتباعت رخيص
بجد حرام اللى بيحصل هنا و هناك


بيقولوا الضرب ف الميت حرام
احنا عايشين ولا متنا
احنا واعيين ولا مخدريين
ولا ساعات مواجهه الواقع بتكون اسوأ من اى تخدير؟؟


واللى بيموتوا دول
بيموتوا تمن لايه بالظبط
ماتوا عشان ايه اللى يعيش
نار خراب دمار حرب
هو ده التمن
مسلم مسيحى يهودى حتى
اى جنسيه
ايه كميه الارواح اللى بتم ازهاقها كل يوم دى

البنى ادم ده بجد غريب
جه دنيا
بص حواليه
و كل ما ذريته بتزيد
راح هنا وهناك
و كل واحد شافلوا لعبه
بقت حياه
ده حياته لعبه اسمها مش عارفه ايه
و ده مش عارف ايه
و فيه كتيير بيلعبوا
حرب و ضرب وتسييح دم


ربنا بعينا جميعا على نفسنا قبل لعبنا
بجد نفسى اعمل حاجه
اساعد اللى هناك دول
غير الدعا و شريط الاخبار
..............
قالتلى الدور علينا
قولتلها احسن عشان نفوق
ساعتها ممكن يكون لينا هدف
ساعتها خلينا نبقى ضمن المقاومه الشعبيه
اذا كانت لسه عايشه عندنا

حين تنساك الشعوب و تصبحين وحيده!!

ياترى حيجى يوم و نتنسى احنا كمان زى ما بننسى؟؟؟

الحياه

ردود فعل قبل الوفاه اليوم الثاني للوفاه

بعد فرجه
حسيت اننا بقينا وحشين اوى
لدرجه توجع

يويو بقى عنده سنه و سنتين يا جدعان

مبقتش بحب الاطفال اوى زى زمان

بس كلوا كوم و يويو كوم

محدش يقدر يقاوم يويو

وضحكه يويو و حتى صريخه المستمر

يويو النهارده عنده سنه

و سنتين بحالهم جننا و هو بيطلعهم

وتعب و خس اوى

و الباقى عامل شغل

مفيش عيد ميلاد النهارده

عشان عيان

) :

ادعولوا يخف و نعمله عيد ميلاد محصلش

كل سنه و انت طيب يا احلى يوسف ف الدنيا

و عقبال ما بابا و ماما

و طنط "اللى هيه حضرتى!!"

نفرح كلنا بيك

الست دودو حبيبه قلبى

طبعا مكنش ممكن ان الاوزعه الصغيره تعمل بلوج و مكلمكوش عنه و عنهاالمشكله انكم لو شفتوها
هتعرفوا انها مش اوزعه بالمره
دى اطول منى كمان
وبحس ان حضرتى اختها الصغيره و هى الكبيره
هند اختى الصغيره و حاجات كتير
بنك التسليف بتاعى
و المهم انى غالبا مش بارجع المديونيه
ده بخلاف الحاجات الحلوه اللى بتجبهالى وعلى حسابها اوقات كتير
كمان
المتحدث الرسمى باسمى عند بابا
و منسق الشئون الخارجيه
وو
مجنونه بالكتابه و التعليق و النقد
وبتقول كلام كبير
قولولى رايكم

الست دودو حبيبه قلبى

ليا وطن

اخيرا رجعت

ده بيبقى احساسى كل مره اسيب فيها هنا

حاجه حلوه اوى

انك مهما رحت

و مهما غبت

مهاجر مسافر

ان شاالله بتصيف زيى

ولا قاعد عند حد

بتبقى عارف

انك ليك مكان و ناس

راجعلهم مهما حصل

و مهما كنت مبسوط

مفيش احن من بيتك عليك

و مفيش احب من ناس هما

مركز حياتك و كل حاجه ليك