مصر بعيون تانيه

عايز تعرف بلدنا حلوها قد ايه
و كم الجمال اللى موجود فيها
رغم كل حاجه بيتحصل حوالينا
شوف صور وليد و الصور الموجوده فى السايت ده

بجد انا لو عليا كنت حطيت صور كتييير اوى

مش بس لمصر و بلاد تانيه كتير

خشوا شوفوا بنفسكوا

السايت تجمع لمجموعه من محبى التصوير

و صورهم

ياريت لو حد بيحب التصوير يشارك

و ياريت نوريهم مصر بعيونا

مينفعش..!!

مينفعش انزل اتمشى على النيل الصبح
عشان حالاقى مالذ و طاب
خدوا عنكم الخريطه
لو مشيت فى عبد العزيز ال سعود
يا حتلاقى عربيه مشيت وراك يا واحد سكران
وممكن عجوز او حد كبير يسمعك كلام مقرف
و ممكن يمد ايده وكانك فتاه ليل مثلا مش نازل تتمشى
و حيبقى كل همك انك ترجع بيتكم

مينفعش تمشى على كوبرى الجامعه خصوصا انك
لو عديت من العيال الصايعه و الشباب اللى بيستظرف
حتوصل لعربيه البوكس اللى قدام السفاره
و تتصدم لما تلاقي نظراتهم محسساك بالعرى
و كلامهم زفت
و مش فارقه بقى ضابط و لا عسكرى

مينفعش تروح ايام الجامعه للكليه مشى
عشان بالاضافه للى فوق ممكن تتضرب او يتف عليك
من العيال المتشرده
و زعق اشتم بقى و ابقى اقابلنى
تحمد ربنا انك قطعه سليمه

لو حظك الاسود وداك بقى عند كوبرى الجيزه
مش حتخلص

مينفعش تمشى فى شوارع هاديه
حتى لو فى مشوار و الصبح
عشان غالبا حتلاقى عربيه و واحد قد بابا فاتحلك بابها
يا اما حد بيطاردك و اسمع بقى المزاد
ميتين تلتميه ربعميه
مين يزود
يا بلاش كانك فى سوق نخاسه
مش مهم بجد انك شبه الاطفال
ولا انك محجب او لابس كويس

لو طلعت من الكليه
او كنت فى مشوار فى الجيزه
احذر عيال السعيديه
حتتضرب و يمسكوك من كل حته

لو فكرت تتمشى فى جامعه الدول ولا الهرم او المعادى
مش حتسلم خصوصا جامعه الدول
ممكن تلاقى عيل اوزعه بيعرض عليك مطوته و خدماته
عشان يحميك من بين السيجاره و السطل
المهم مشييه معاك!!

احذر من اى سواق تاكسى و لا ميكروباس
كله زفت من اول الاستظراف و البصات
ولعروض التوصيل المجانيه بدعوى الشهامه طبعا!!
ده بخلاف الركاب الافاضل
اللى عنيهم و ايديهم مش معاهم

مينفعش تبلطج مع سواق تاكسى بيستهبل
و عايز ياخد الضعف
عشان انت فى الاخر اللى حيتحرق دمك و تسمع
ودانك مالذ و طاب

مينفعلكش غير انك تنزل فى العربيه
و حتى دى ممكن تلاقى الاخ اللى جمبك
قال قيه بيهزر معانا و بيقفل و يشد
عشان يتعرف

تخيلوا حتى الجرايد لو عايزاها ايام الاجازه الصبح
لازم اجيبها جرى كانى زى الحراميه

على فكره قايمه مينفعش طوييييييييله
بتجبر نفسك عليها ساعات و ساعات اكتر بتحس بظلم
و تتمرد و تمشى و انت عامل زى الرادار
اللى مستنى اى حاجه

بصراحه اللى قريته الايام اللى فاتت جابلى حاله قرف
كفايه التعليقات و الاهانات المتبادله
و جميع انواع الشتايم
حتى فى الدين
ده بيخليك بتسأل نفسك كتير
للدرجه دى وصلنا لكده
و يخليك بتدعى بجد ربنا ميفتناش

الموضوع حاجه بتحصل كل يوم و محدش بياخد رد فعل
زى كل حاجه فى حياتنا و ده بينزلك درجه على طول السكه
واحد بهدد واحده و معاك مراتك و عيالك
تاخدهم بعيد و تعمل اعمى غصب عنك
واحد بيبلطج اصلك مش حتعرف تعمل حاجه
عيال يتسرق او بتضرب
و حاجات كتير بقى بتوصل
لناس بتموت فى الشارع او حد محتاج مساعده
و انت ياخايف تجيلك مصيبه يا خايف على غيرك
يا تعبان و مفيش حاجه تعملها
احنا بقينا عجزه و مكتوفين و متفرجين طول الوقت
مستنين المعجزه
او يمكن حد غيرنا يعمل اى حاجه
او طوفان التغيير يخدنا معاه

صحيح الكلام ممكن ميعملش كتير
بس لو متكلمناش دلوقتى و حاولنا نعمل اى حاجه
حتى لو بدات بمجرد كلمه اعتراض
مش حنعمل حاجه مش بس لينا
لا
لاخواتنا الاصغر منا
لولادنا و بناتنا
مش حنعرف نحمى حد
و حيجى يوم يلومونا
حتى على اننا ربيناهم كويس وسط غابه
مش عارفين يعملوا ايه فيها

انا بعرف اقول بالصور هنا حتلاقيهم قريب

معرفش..ممكن

بوست حلو بجد و كلام رقيق عند عيسى الدفراوى

توت توت..تعالوا تعالوا

ياولاد ياولاد ..توت توت
تعالوا تعالوا
علشان نسمع ابله فضيله
راح تحكيلنا حكايه جميله
و تسيلنا و تهنينا
و تذيع لينا كمان اسامينا
ابله..ابله فضييله
.............

رغم انى مش من محبى التليفزيون و اعتزلت فرجه على العاشره مسائا بعد المط رغم انى باحب منى الشاذلى
و قلت افتح يمكن الاقى حاجه على موضوع مالك
انا بجد مصدقتش نفسى
عارف لما ترجع تفرح و تعيط زى زمان
لانك قدام حاجه من ريحه زمان
و مش اى حاجه و مش اى حد
دى ابله فضيله
و صوت ابله فضيله اللى بياخدك بعيد
و يخليك من غير متحس حاسس بفرحه زى اللى فى صوتها
و متملكش غير انك تسكت و تسمع و تحلم

عندك حق يا احمد
الشمس بتطلع مع صوت ابله فضيله
صوتها يعتى بدايه يوم جديد
و كلنا بنحبها اوى
و مستحملناش دموع فرحتها امبارح
و هيا بتسمع كلامك
...........
من ضمن الحاجات الكتير اللى باحب بابا عليها اوى
و مش حانساها انه علمنى احب الراديو
و كان بيصحينا على حواديت ابله فضيله
و من ضمن الحاجات اللى اكتشفت انى احب ارجعلها
بجد فكره استضافه ابله فضيله حاجه فرحت ناس كتير
ناس تخطوا الاربعينات و الخمسينات و اتربوا على صوتها
و ناس زينا لحقناها
........
انا بقالى اكتر من اربع ساعات بادور على اى حاجه ليها و عنها على الشبكه الخرافيه
و تخيلوا......!!!!
كله اللى لقيته مقال و حدوته واحده لقيتها بالصدفه عند تواصل و فرحت اوى اوى بيها
انا شايفه ان عيب اوى لما متلاقيش غير دول
حتى فى صفحه الاذاعه و التليفزيون
و حتى كتاب الحواديت و الاغانى الجميله
نادر ابو الفتوح المؤلف و عطيات عبد الخلق صاحبه المقدمه اللى بنموت فيها
...............
الحاجه اللى بجد باتماناها زى ما كتير غيرى بيتمنوها
مش بس كتاب حواديت ابله فضيله
تسجيلات لكل حواديت ابله فضيله
شرايط سى دى ان شاالله سايت
انا شايفا ان ابله فضيله مش حابه تبقى بتبيع صوتها و تحس بده
بس هيه مش كده
دى هديه لاجيال موجوده و اجيال جايه
محتاجينها اوى فى الوقت اللى بتنتطمس فيه كل المعانى الجميله
و بتموت الحواديت
.............
مش بس ليلى بنت ريم حفيدتك اللى محتاجه الحواديت
كلنا محتاجينها حتى الكبار مننا
و حتى ولادنا اللى لسه مجوش
محتاجيين نعرفهم مين هيا ابله فضيله
و يعنى ايه قيم جميله
كان نفسى اوصلك ده
و للاسف مش عارفه اوصل لاى وسيله

و ضربك المرض من تانى

و على صوت التكبير بادور على ابتسامه زمان لقيتنى مش قادره افرح
رغم انى كنت باحب اقوم على الصوت للشباك اسمع و اشوف الناس و الشوارع و اول شعاع شمس واحس الهوا الساقع اشم ريحه عيش الفرن
ساعتها بس كنت باحس بان العيد جه و ننزل للشوارع نصلى العيد
مقدرتش الاقى الابتسامه
و انا باشوفك و انتى بتنهارى و تطحنك السنين و المرض و العجز
و انا بافتح باب قوضتك و خايفه تروحى منى و تسبينى
و ملاقيش ايديكى تحضنى و الاقيكى فى غيبوبتك احاول اطمن
و امسك ايديك و اقولك اوعى تسبينى يا مامتى انا مليش فى الدنيا غيرك
و مليش حضن غير حضنك و لا بيت غير بيتك
انا من غيرك ولا حاجه و انتى كل حاجه
.....................................................
اخر اليوم لقيتها لما قلت لنفسى الحمدلله
حضرنا رمضان و العيد سوا السنه دى كمان

ا كفاياكم..كفاياكم شفافيه و النبى!!

اجرى على السطور مابين
اصابت و كوليرا و معرفش ايه و
الحق الحكومه بتقولك وباء ايه ده مجرد تسمم جماعى
لتخريف و شطحات جرايد و اهانات
تبص تلاقى منددين و منادين بالحريه
و كله شابك فى كله و نازلين شتيمه
و رشوه وتهديدات احدث موديل بالجزم
و خيم مفيهاش مكان فاضى
و فلوس بتروح فى هلس
و ناس مش لاقيه تاكل
و مين عميل حكومى و مين فى حزب ايه
و مين شبك مع مين
و مسلسلات فيها ايه
كفااااااااايه دمااااااااغى

مليش غير حضنك

اصحى افتح عينى و ابص على سريرك قدامى و ابصلك
اتاكد من حركه صدرك لااراديا- عاده من ايام الطفوله
لما كنت بنام جنبك على سريرك و اول ما اخاف استخبى فى ضهرك و اتدفى بيك
و اخاف لتسبينى و اقول فى سرى يارب متخدهاش منى خدنا سوا او خدنى قبلها
و كل شويه اقوم ابصلك و اطمن لما احس بانفاسك و حركه صدرك
و تمر السنين و نكبر سوا
انتى تهدك السنين و العمر و الدنيا و متتحركيش من سريرك
و تتحولى لنونو صغير سنه كبير مليان تجعايد بس من جوه طفل
و انا اكبر شويه من بره و تملا روحى التجاعيد
و يبقى بيتك بيتى بجد و انتى كل حاجه ليا و امى رغم انى بنت بنتك

افوق شويه اقوم بتكاسل اروح لسريرك استخبى فيك و اخدك فى حضنى
لو صاحيه نتكلم شويه لو نايمه المس وشك و اسيبك

اول من ارجع من بره احب ارجع عليكى اروح لقوضيتنا و افتح بابها و اشوفك
لو صاحيه تقوليلى اهلا حمدالله على سلامتك و تضحكى و تفتحيلى حضنك و ايدك

لما اجى نازله واقولك تفضلى تدعيلى لحد ما اقفل بابك
و اقولك زى ما كنت بتقولى لولادك و يحبوا يقولولك فوتك بعافيه
مش حاتاخر كتير مش عايزه حاجه
لو طلبتى بتطلبى عصير القصب و الكور-مولتو-اللى بتحبيها
كل ما اقولك انا عايز اجيبلك حاجه تقوليلى لا انا مش عايزه حاجه
حاعمل بيها ايه

بحب وقت الاكل اقومك و اقوم بدور المسند بدل المخدات
و اقعدك فى حضنى و انتى بتاكلى و امسكلك المج اللى بتقوليلى عليه تقيل
باحب اوى ادفى بيكى وباحب اكتر اهتزازاتك اللى بفعل الزمن والسن

الناس فاكره ان انا اللى بعملك او باديكى
و الحقيقه ان انتى اللى بتدينى و تحركينى و تطمنينى
مش بس كده انت الحسنه الوحيده للكائن المرقع المهلل اللى عايش فى الدنيا دى زى الغجر نافر من كل شىء و اى حد واى حضن غير حضنك

هناك كل شىء بيلفك و تدوب

اول مره اروح المكان
اول مره اركب مركب من المكان ده المعادى
المكان كان اكتر من حلو خصوصا ان انه بعيد عن كل حاجه و هادى
و مش مليان انوار.
المركب كان لحسن حظى مركب شراعى
مبحبش المركب ابو موتور ولا صوته و الوانه ولا انواره
احلى حاجه انك تحس انك بعيد عن كل حاجه حتى عن وجودك على ارض الواقع
مستسلم لحاجه واحد هدهده المياه للمركب و ليك كانها بتواسيك و تحضنك برقه
القمر كان منور المكان بلون فضى بيفكرك بالصبح و هو يادوبك حيتولد من جديد
متبقاش عارف اذا كان فيه نور و جاى ولا لسه الليل ممشيش
الجزر المليانه زرع فى وسط النيل و انت بدور حواليها وبتتفرج عليها قد ايه كبيره و ظلمه
والصوب جواها شايف خيا لها بس و خيال بيت خشب باعمده بتفكرك بفيلم شفته قريب
و وسط كل ده تبص للقمر قد ايه بعيد و مستخبى وسط شبوره شفافه مكلفتاه
و يلف المركبى مع الهوا اللى بيحرك الشراع الكبير ونرجع من حوالين الجزيره
كل واحد سرحان فى ملكوته او فى المنظر او فى حد معاه بيحبه
و انا وانتى جمب بعض بهمس من حين للتانى بصى شوفى
هى دى بطه؟ شايفه منظر المراكب اللى هناك و هى فارده شراعتها وسط النيل حلوه قد ايه؟
مين الناس دول؟ مهربين؟! ايه التمثال ده؟ هو ليه القمر زعلان؟؟
فاكره النيل فى الاقصر و اسوان كان حلو قد ايه؟
شايفه الراجل اللى فى المركب الصغير ده مولع نار ياترى بيتدفى ولا بيشرب حاجه؟
شايفه مستكين قد ايه..قاعد بعيد عن الناس و الدنيا بحاله فى مركب يادوبك سايعه
و الله اعلم بيفكر ف ايه؟ و ياترى بينام ازاى
تقدرى تعيشى فى مركب او وسط المياه طول حياتك و نرجع نسرح تانى
بجد اكتر مره اتبسطت وسط النيل فى القاهره و انى خرجت معاكى و معاهم
باعشق جو رمضان بره بالليل

كان فيه فى يوم...حواديت للروح

تلات حواديت حلويين بجد ل الكسندرا و جيرونيمو و دكتور زيفاجو

مش عارفه وجعولى قلبى و لا دفوه

اغتسا ل

تقلبت فى فراشها و هى تسحب الغطاء على كتفيها تستدفىء به بينما كانت يداه تحاولان إزاحه الغطاء عنها و هو يوقظها..
صلاه الفجر-
الفجر لم يؤذن بعد, كم الساعه الان؟-
قالتها و هى تغالب سباتها و تكاد حروف كلماتها تختلط من فرط رغبتها فى النعاس.
- لم يبق على الاذان سوى دقائق قليله و عليك ان تنهضى لتغتسلى قبل الصلاه.
طار النوم من عينها حين صك مسامعها لفظة " إغتسا ل",فقذفت بالغطاء من فوقها بقوه و قامت و هى تتمتم فى استسلام و فى يأس حاضر!
جلست لثوان على حافه الفراش موليه إ ياه ظهرها تاركه قسمات وجهها تفصح عما يعتمل فى صدرها من مشاعر , شبه ساخره تسللت إلى حافه فمها و هى تتنهد بقوه..
اختلست النظر اليه و هى تمرق إلى الحمام فلما رأته يجفف رأسه بالمنشفه فى قوه و نشاط اتسعت ابتسامتها و غمر قلبها يأس مرير.
أغلقت عليها الحمام من الداخل و خلعت ملابسها ثم وقفت عاريه تماما أمام المرآه..لفت شعرها على يديها و أسدلته جميعا على كتفها اليمنى ثم على كتفها اليسرى ثم أرسلته خلف ظهرها و هى تتفحص جسدها فى المرآه..بدت فى عينيها نظره رضا مشوبه بحسره ثم تزايدت الحسره حتى محت إحساس الرضا الذى انتابها و هى تتفحص نضرتها فى المرآه, دلفت الى البانيو و سحبت ستارته فى عنف ثم بدأت فى خطوات الاغتسا ل..ذات الخطوات التى لقنها لها فى الليله الأولى ..ليله الزفاف..
فى خسه قا ل لها و هو يهبط من فوقها :مبروك..
غاص الماء من وجهها و من جسدها و من حياتها كلها منذ تلك اللحظه,نظر فى عينيها بقوه كأنما هى المذنبه..تظاهرت بالحياء, و سوف تمر عليها فيما بعد ليال تتظاهر فيها بالبهجه و بالنشوه و بالارتواء بينما الأرض عطشى لا تجد من يرويها.
و قا ل لها:إن أكثر ما شدنى اليك حياؤك الجميل,لست كالفتيات الفاجرات,تعجبنى المرأه التقيه التى لا تعلم من أمر الدنيا شيئا حتى تتزوج, و فيما بعد سوف يردد على مسامعها بمناسبه و بدون مناسبه حديث الرسول صلى الله عليه و سلم
"خير ما يكنز المرء المرأه الصالحه:إذا نظر إليها سرته,وإذا أمرها أطاعته, و إذا غاب عنها حفظته فى عرضه , و ماله", و لقد حفظت عرضها قبل أن تزف اليه و اضطرت لأن تحفظه بعد الزفاف..
أما ماله فقد أغدقه عليها- فى نظير صمتها- بلا حساب.
تركت الماء ينساب على جسدها و تبأطأت حتى تناهى إلى سمعها صوت المؤذن من المسجد القريب, و فى تلك اللحظه تعالت طرقاته على الباب يستعجلها لتنهى غسلها..غسل الجنابه.
وفى فجر ليله زفافهما احتضنها بقوه و هى خارجه من حمامها بعد الاغتسال و غاص بشفتيه فى شعرها المبلل فأحست بنفور شديد و غالبت رغبتها فى التقيؤو بدأت اولى خطواتها على درب المراءا’ فتملصت بخفه من بين ذراعيه و هى تتضاحك متظاهره بالتدلل و جلست أمام المرآه تمتشط,وجهها ينطق بالبشر و على صدرها يجثم هم مقيم.
وقفت تصلى خلفه, تمقت صوته حتى و هو يتلو أيات الله , نبراته تفيض جفافا و غلظه و تصنعا..
تحمد الله أنه يؤدى باقى صلواته فى المسجد تاركا اياها تخشع فى صلاتها على أنفراد.
وحين عاتبها والدها فى إصرارها الزواج منه رغم تحذيره إياها مما استشفته فراسته فيه من غلظه و من جفاف طبع أجابته فى ثقه: خشونته تنبع من تقواه فهو مثال للمسلم التقى الذى إن أحب المرأه أكرمها و إن كرهها لم يظلمها,فهز الأب رأسه فى حيره و لم يعقب.
و هما مازالا جالسين على السجاده يسبحان عقب الصلاه تمتم فى فظاظه:زوجه أخى حامل.
غاص قلبها و جف ريقها و همت بأن تنطق لكنها أطبقت شفتيها بينما استرسل هو و ظهره إليه قائلا فى نبره تقوى مصطنعه ما عادت تنطلى عليها:سبحان الله! لقد تزوجا بعدنا بسنوات عديده لكنها إراده الله " يهب لمن يشاء إناثا و يهب لمن يشاء الذكور أو يزوجهم ذكرانا و إناثا و يجعل من يشاء عقيما".
و كم من ليال مرت و هو يعلو و يهبط ثم يقترح أسماء لأبناء يعلم يقينا أنهم أبدا لن يولدوا.
أحنت رأسها و هى تنظر إلى يديها المعقودتين للتسبيح..طرقت الأبوابا لخلفيه لعينيها دموع ملتهبه فأوصدت دونها الأبواب وازدردت ريقها المملح فى يأس..فردت أصابع يدها تتأملها و هى تشد جلدها إلى الخلف كأنما تخشى أن يمضى قطار العمر مخلفا بصماته عليها و هى جالسه فى مكانها بلا حراك.
قام فقامت و توجهت الى المطبخ لتعد له الإفطار ..حبن انفردت بنفسها تركت لدموعها العنان ثم جففنها قبل أن تعود اليه.
قامت على خدمته و هو يفطر ثم ساعدته فى إرتداء ملابسه..امرأه صالحه ..نعم ,أعدت نفسها طويلا لتكون كذلك بيد أنها كانت تحلم فى ذات الوقت بزوج قوى أمين.
و هو يحمل حقيبته متهيئا للانصراف إلى عمله قال لها فى غلظه و وقاحه :لا تنسى أن تتصلى بزوجه أخى لتباركى لها,أخشى إن لم تفعلى يظنوا بك الغيره منها لأنك لا تنجبين.
قالها و هو يتجنب النظر إلى وجهها..الكذاب الأشر..
للمره الأولى منذ زواجهما تنظر إليه فى تحد..لم تحول وجهها عنه و لم تغض بصرها كما اعتادت..رشقت عينيها فى صميم نظراته و هو يلفها فى الحجره بحثا عن مهرب..ثبتت فى موقفها,وحين التقت عيناهما قالت فى هدوء عميق و فى إصرار:طلقنى.

" دكتوره نهى الزينى"

لوحدى

تماما لوحدى اعيش…1 عام..
من وسط اللى ماتو انا..
باسوى كام؟
حنيه؟
دولار؟
درهم؟ دينار؟
تعبنى انتظارك
ليالى طوال
كرهتك ف لحظه
رحيل النهار
مبسألش ليه لم تسأل عليا
أنا اللى سأل عنى حتى الغريب..
جرحى اللى سيبته يومين
أشتكى..
ممكن بلمس الحبايب
يطيب..
معوزتش ملابس
معوزتش حليب
أنا عايز ضهرك
يكون لى صليب..
و عايز السما السابعه
تنزف ملايكه
لأن اللى مات لى
ده طفلى الوحيد

قصيده حلوه لاحمد العايدى

اغنيه بلون الورد

صوت فى سكوت الليل ينادينى
خلا دموعى تفر من عينى
على فين يا موج الشوق مودينى

الحلم و المجهول و ليل الويل
و قمر بصوت مروان بيندهلى
بضم قلبى و اطير مع المواويل
و اتمشى فوق الموج على مهلى

باحلم يا دنيا بلالش تصحينى
على فين يا موج الشوق مودينى
و الريح بحس جريح بيوعدنى
ياخدنى من حزنى و بيعدنى
و يجيبلى حب حقبقى يساعدنى
فى رحله الايام و يسعدنى
و حنان يروى شوقى و حنينى
على فين يا موج الشوق مودينى
باحلم بدنيا يحبها ناسها
وتحب ناسها تشيلها فوق راسها
و الحب ساسها و داب فى انفاسها
و العيد ليلاتى يدق اجراسها
باحلم اطير و افرد جناحينى

على فين يا موج الشوق مودينى

اول مره اسمع كامليا جبران كانت امبارح من بوست رضوى

الاغنيه حلوه اوى بجد

و لو انى معرفش اسمها

و فيه اغانى تانيه كمان

وناس تانيه حتلاقوهم هنا

او على يسارى

انت مين؟؟بلاش قولى انا مين؟؟

امبرياليه ليبراليه علمانيه اشتراكيه و معرفش مين
كفايه على يسارى و ديموقراطى معتدل على اشتركيين و طبعا يمين
ساداتى ناصرى وفدى و دلوقتى تجمع و غد و برضه معرفش مين
شايفنكم و معا من اجل التغيير و اخوان مسلمين و متنساس الحزب الوطنى التقيل
تيار اسلامى و لا سلفى و لا مع مين
سنه ولا شيعه و الحق بقى فيه بهائيين
تبع الحكومه ولا ضدها و لا خايف تقول بصوت عالى و م المخروسين
اقولك ممكن تكون لا كده و لا كده وتطلع عميل
استنى كده ارجع اقلب فى صفحى
يالهوى ده فيه تجمع لقيته اسمه اللادينيين
ماركسى و لا غيره و ياريت متنساش تقولى غيره مين
بلاش تقولى انت مين
ممكن تقولى انا مين و فين لحسن مش شايفنى عل الخريطه
اقولك بلاش قولى ايه كل دول و ادينى ايدك
وخد بايدى و رينى مين كل دول
ارسملى شجره بجدور كتيره تحت طين و ارض
وسيبنى حالزق نفسى ورقه اول ما الاقى نفسى
فكرك يكون احسنلى ادوب وسط طين
و اطلع بجدر نخله عاليه
مش مهم عندى عاليه قد ايه
الاهم ليها جدر و ليها اصل و وسط طين

فطار بلوجاوى جماعى

و اخيرا تقرر ميعاد فطار البلوجاويه
النهارده بلارين المنيل
الحاضر يعلم الغايب
و ان شاء الله اشوفكم هناك
احلى حاجه انى ساكنه قريب

دى شويه السطور اللى استلفتها لروحى من عند زريا ب

تياترو صاحب السعادة

لعبة ؟؟عبر عن الحزن بجملة لم يمسسها أحد من قبلك ...أقولك ..الطفولة فى اللعب مع الكلمات هى كلمة السر فى هذه اللعبة....مثلا أن

تكتب "أنا حزين كقبعة على الشماعة-أنا حزين كشماعة غادرتها القبعة-أنا قبعة وشماعة وحزينيا أطفال العالم..اتحدوا

الانسحاب تحول من عادة مسائية كالنوم إلى عادة صباحية جدا..كالافطار ومعجون الأسنان..نهار أبيض يلاوع قلبى ببراعة

كنت ارغب فى التحدث عن ارتباط الأطفال بالبالونات..البالونة ..فرحة تطن فى المكان..تحاور الهواء وترتد دائما الى يدك...لكنها كباقى الأفراح التى ستختبرها فيما بعد حين تكبر وتنضج ..فرحة عمرها قصير تنطفىء فجأة وبلا سابق انذار

...
الزاد فى القلب لا فى اليد..فلا تحمل أشياءك فى يدك أبدا..زادك بقلبك..عمرك فى قلبك..الكون فى قلبك..الفرحة أقرب إليك من شراك نعلك والحزن أيضا..أما عن الخلاص..فلا تسألنى ..فهى ابرة فى كومة قش لا أعظ..ولكنى خائف

الكتابة ضد الوقت ..أن تعيد الحرارة إلى لحظات الناس المفقودة والمهملة والمنسية ..أن تخلق للجماد عينا ولسانا وشفتين ..أن تضيف سطرا إلى الذاكرة ..وأعمارا خلف عمرك المحترق ..الكتابة أن تحترق

جئت أسألك عن مكانهم فى القلب ...فأنا يا حبيبى لست ضائعا كما يبدو على ..لكننى دائما على مهب ريح وعلى مطلع انكسار

ماشى الغريب على قدمى من سالف السماوات ..يا سالف السماوات ..مدااااااااااااااادشايل كلام أبيض ..صدقينى ..مش عطشان ومش بردان ..ناعم ..زى لحظة حزن دافية ..وأخشن من ابتسامة ..شايل كلام تانى ..مالوش شجر ع الأرض

لاأقسم أن للأشياء رائحة ..ولكن أقسم ..أن للبدايات وللمواقف رائحة ..وأن الذكريات لاتعود إلينا كاملة إلا فى اللحظة المحملة ..بهذا العبق

الخاص ..حينها فقط قد ننتفض أو نبتسم ..من قوة ذاكرتنا وأننا مررنا بكل هذه التفاصيل

لم تصنع الكلمات وطنا ..ولا حتى كوب قهوة ..كل ما صنعته ..هو دقيقة تعطل فيها الوقت ..كى تمنح الوقت ضميرا أخف وقلبا أقل وطأة وروحا تضحك دقيقة ..تعطل فيها الوقت

دى شويه السطور اللى استلفتها لروحى من عند زريا ب النص الاصلى هنا يستاهل بجد انك تدوب فيه
خلانى فرحانه و بادور على وصف للفرح و المزيج اللى جوه بعد ما خلصت الحدوته
معرفتش الاقى كلام
قعدت ادور على الكلمات جريت و استخبت منى

فى عيد ميلاد صاحب الحواديت

الكتابه ان تحترق
لما تدى للناس قطع من روحك فى كل كلمه و حدوته
و مش اى قطعه
قطع جميله منوره
مهما كان احساسك و حالتك
ترجع للناس مش بس الدفا
تخليهم يحلموا و يدوبوا مع الكلمات و ينورا
تديهم جناحات يرفرفوا بيها
زرياب غزل الموسيقى و الاحلام و عمل منهم حواديت بيقددمها لنا فى التياترو
ممكن تكون الكلمات مبتعملش وطن بس بتخفف كتير على الارواح و بتدى امل
كل سنه و انت و المسرح و زرياب بخيربرضه عجوزه و معرفتش العب باالكلما ت