حق دول فين

يوما ما نازله من بيتنا

و نطيت فى اول تاكسى رغم ان المكان مش بعيد

منعا للقرف بتاع شوارعنا الحلوه

خصوصا فى الصيف

فى السكه و عند القصر العينى شاورت للتاكسى ووقف

هيه كمان كانت رايحه العجوزه

لفيت دماغى ورا اشوفها لما اتأخرت

لقيتها ست كبيره لابسه اسود و شكلها تعبان

قلت للسواق اطلعلها قدام

قالى لا خلاص

المهم ركبت و مطلعتش كبيره زى ما كنت فاكره بس شكلها حزين و تعبان اوى

و لابسه جلبيه سوده بسيطه زى معظم ستات البلد دى

السواق سألها فين فى العجوزه

قسم العجوزه

ايه ده القسم؟؟

انا فاكر انك عامله عمليه

انتى اتضربتى فى خناقه

و تحول صوت الست التعبان للعياط

عياط منهك

ما انا عامله عمليه

ضربونى و فكوهالى و بهدلونى

و انفجرت فى العياط

اهدى بس اهدى

ايه اللى حصل

اهل جوزى ضربونى بعد ما ولدت و فتحولى العمليه

و عورونى فى كل حته

و خدوا ابنى اللى مكملش اربع تيام منى

و تعيط

و جوزك فين؟؟

و رايحه القسم تبلغى؟؟

اتخانقت معاه عشان كان بيضربنى و سبت البيت و رحت قعدت عند اهلى

و اختفى من خمس شهور و معرفش عنه حاجه

خطفوا ابنى و خدوه منى

انا عايزه ابنى

عملتى محضر؟

رايحه قسم العجوزه ليه؟

عملت و طلبوا منى اروح القصر العينى اجيب

ورقه تثبت الاصابات

اصل هما ساكنين فى المهندسين

و كان لازم انزل

و بجد مكنتش عايزه و صعبت عليا اوى و حسيت بالغضب

و مقدرتش امسك نفسى و طلعتلها فلوس رغم انى باتكسف اعمل كده

و رغم انى ياما اكتشفت مقالب و نصب

و وانا نازله حطيتهم فى ايدها

و لقيتها انفجرت فى العياط اكتر

و فى عنيها حزن و كسره مشفتهومش و مقدرتش استحملهم

لا يا حبيبتى انا مش عايزه حاجه

ربنا يسترها معاكى

ملقيتش حاجه تانيه اقولها و طبطبت عليها

و نزلت و انا مضايقه م الدنيا

حاسه انى على قد ما انا مكسوفه منها على قد ما انا عايزه ادى الدنيا قلم

و عايزه اخلص على كل البنى آدمين اللى ميستهلوش كلمه بنى آدم اصلا

و حاسه بقهر واحده ست غلبانه ملهاش ضهر

و ملهاش حول ولا قوه

و بتمثل الاغلبيه فى البلد اللى مبيرحمش ده

كام ست مش واخده حقوقها و بتتعرض للضرب و الاهانه و الطلاق و الرمى فى الشارع

هيه و عيالها

بسبب حيوان ميستاهلش

........................

يوم تانى وراه عند الكوافير

و وسط كم الرغى

و انا مجرد مستمعه و متفرجه

شدنى حوار مختلف عن الحوارات الفارغه بتاعه التسالى

صاحبه الحوار دكتوره لسه بتدرس او فى مرحله ما قبل التخرج

بتاعه الكشف على العيانين و اللف فى المستشفيات و الشفتات

مشدنيش حوارات العيانين الحافظين أمراضهم و عارفين تكنيك الدكاتره و اسئلتهم

و كله حسب العرض و الطلب

و بيتاجروا بعياهم عشان ياكلوا

قد ما استفذنى الحوار اللى جاى

تعرفوا ان فيه عيانين تانيه ساعات بيهربوا عشان

منكشفش عليهم –الطلبه و الدكاتره-

و ساعات بتخانقوا معانا و مع الدكاتره

عشان رافضين ده

مره فيه واحده ست

دى اكتر واحده صعبت عليا

كان عندها سرطان الثدى و الدكتور خدنا نشوفها

و يشرحلنا عليها

و مرضيتش تقلع و نشوفها

و فضلت تعيط

الدكتور قالها

بصى حتعيطى حتططنطى حتقلعى ياعنى حتقلعى

و حيكشفوا عليكى

و نادانا نكشف

انا بجد صعبت عليا و كنت مكسوفه و انا باكشف عليها

بس احنا لازم نكشف عليهم

هما المفروض انهم جايين و عارفين ان مقابل علاجهم ده مستشفى تعليمى و لازم نتعلم

مفيش حاجه ببلاش

و هما طالما جم المفروض عارفين ده كويس

يااااه

احنا مش بنقدملهم خدمه ببلاش

و هما اللى جم و هما عارفين!!!

و مين عجوزه زعقتلنا و الدكتور اتخانق معاها

و مين عيطت بس يا حرام صعبت علينا

بس لازم نتعلم!!!

هيه دى الخدمه اللى دوله البهايم دى بتقدمها

فى المستشفيات الحكوميه للغلابه

و هو القصر العينى ده اصلا يصح يسموه حتى مكان آادمى

و لا يعتبروا اللى فيه بيحترموا أرواح الناس و اوجاعهم و حاجاتهم

كفايه تدخل تشوف المعامله الزباله من اول الباب لحد الممرضين و الدكاتره

و الناس اللى سايحه فى دمها و مرميه و مش فى العنابر

خدمات و علاج

شي الله يا خدمات

ده الشاش و القطن و اى حاجه

بيجيبوها من بره

مش كفايه كمان ذل و اهانه و يتحولوا لسلعه غصب عنهم

ايه احساس اى واحد من دول لو دارت الدنيا بيه و بقى مجرد شحات غلبان

موجوع عايز يتعالج و مضطر

و يجوا يوقفوه عريان و يتحول لوسيله شرح

و سيبك بقى م الألم و قلق الراحه كل شويه

فين حقه كبنى آدم انه مينتهكش كده

لا جسمه و لا مشاعره و مرضه

ده غير العلاج الغلط و الفوط اللى بتتنسى و الناس اللى بتسمم و تموت

و ياعينى الدوله عملت كتير و تأمين صحى

و مش قادرين نقدم اكتر من كده خدمات ببلاش و حنلغيه

و النبى روحوا موتوا

و كفايه قرف

هو انتم قدمتوها يا شويه غجر

هى دى خدمه!!

تتأكد ازاى؟؟ بالمفتاح السحرى

انا عامل زى اللى طاير فوووق فى السما

بس خايف جناحاتى تتقطع و أقع

عشان كده لما تقول بحبك لحد لازم تكون متأكد

الحب مش كلام و خروج و فسح

ولا ولد و بنوته و زوج و زوجه

الحب حاجات كتير اوى

الحب بيخليك تحب اللى حواليك

و تاخد بالك من احتياجاتهم

و تكون فرحان

و عشان فرحان بتكون عايز اللى حواليك يكونوا فرحانين زيك

و عشان كده بتكون بشوش

تتأكد ازاى

تحكيلوا حدوته المفتاح السحرى

اصل كل قلب و ليه مفتاح سحرى واحد بس هو اللى بيفتحه

هو اللى فيه السر

و هو اللى حيخليك سعيد و فاتح للدنيا درعاتك بابتسامه

و لما تكون سعيد حتقدر تسعد اللى حواليك

عشان حتكون عايزهم هما كمان يكونوا سعدا زيك

طول ما انت تعيس مش حتقدر تسعد نفسك و لا اللى حواليك

و لا حتى طول ما انت خايف

و المفتاح ده بس هو اللى حيخليك تستحمل قسوه الدنيا و متاعبها

حتقابلك مفاتيح كتير فى السكه

فيه مفاتيح مش حتفتح و فيه مفاتيح ممكن تفتح قلبك

من غير ما تكون سحريه

يمكن عشان كده ممكن نحب مره و اتنين بس منكملش

مش عشان محبناش

عشان مش عارفين نتعامل مع الحب ده و نحتويه

ساعات تانيه ممكن نكون بنوهم نفسنا او بيوهمنا غيرنا

و ساعات مبنفكرش غير بالعقل و المنطق

و ده عمره ما كان صح

و ساعات بنلعب زى العيال الصغيره

خلى بالك

المفاتيح دى حتفتح قلبك مره و اتنين و تلاته

بس مش طول العمر

حيجى يوم و تتقطم

و المفتاح اللى فى ايدك و ملك قلب تانى كده تمام

عشان كده لازم تخلى بالك كويس

لازم تتأكد انك معاك المفتاح السحرى

زى ما اللى قدامك معاه مفتاح سحرى لقلبك

فى نفس الوقت

ساعتها بس حتقدر تعيش

تملك الدنيا و تطير و تقدر تعيش