الرضا

فيه و قت بيجى على الواحد بيحس ان الدنيا بتضيق اوى بيه
و ربنا يبعتلك فجاه حد يسندك كلمه تسمعها و ترفعك
ان شاء الله غريب تحطه الظروف فى سكتك
و مش بس مره مرات
النهارده و فى وقت كنت محتاجه فيه اوى للكلام ده كانت الجزء التانى من حلقه الرزاق
و حلقات برنامج عمرو خالد باسمك نحيا
الغريب انى مش انا بس اللى كنت حسا ان الحلقه ليها
و رفعت من معنوياتى كتير
كذا حد من اصحابى و اخواتهم
كنت ناويه ادور على الاحاديث و استنى الاعاده و اعمل تلخيص للحلقه
لانها بجد تستاهل انكم تشوفوها او تعرفوا بتتكلم عن ايه
و لقيتها جاهزه على الموقع

"ده مطلعش ملخص للحلقه بس فيه تجميع الاحاديث

لو حد لقى الملخص يقول"
بجد ربنا يجزيه خير عننا و يجزى اللى معاه
اتمنى الفيديو يكون موجود
تخيل تتفرج على معجزه بجد
رحله سمك السردين من شواطىء اوربا لحد امريكا الجنوبيه

ورا اعشاب بحريه بتحركها تيارات ميه قويه

و تستقبلها اسراب من النورس

و حيتان و دلافين و كلب البحر

عشان ده رزقهم و اكلهم

حديث قدسى على لسان النبى الكريم :
وهو (يا ابن ادم لا تخف من ذى سلطان مادم سلطانى وملكى لا يزال .ياابن ادام لا تخف من فوات الرزق ما دامت
خزائنى مملوة لا تنفذ.ياابن ادم خلقت الاشياء كلها من اجلك وخلقتك من اجلى فسر فى طاعتى يطيعك كل شى.
ياابن ادم لى عليك فريضة ولك على رزق فان خالفتنى فى فرضتى لم اخالفك فى رزقك0 ياابن ادم ان رضيت لما
قسمت لك ارحت قلبك وان لم ترضى قسمتى لك فوعزتى وجلالى لاسلطن عليك الدنيا تركض فيها كركض الوحوش فى
البرية ولا ينالك منها الا ماقسمتة لك وكنت عندى مذموما)

"ابن ادم عندك ما يكفيك وانت تطلب ما يطغيك لا بقليل تقنع ولا بكثير تشبع أن أنت اصبحت معافا في جسدك آمنا في سربك عندك قوت يوميك فقل علي الدنيا العفا"

ندعو الله فيما نحب فاذا اراد غير ما نحب لم نخالفه فيما يحب

ليه سبتمبر حزين

لسه راجعه من الحسين
مش عارفه ليه مش مبسوطه اوى
جايز عشان العربيه عملتها و عطلت منا و احتنسنا
ماشين نحايلها طول السكه
معرفش برضه
تخيلوا انى مشفتش فوانيس غير النهارده
بعد كسر الاعتكاف و النزول من البيت
بس مش معترفه بالفوانيس الارنوبيه و الدبدوبيه دى
باحلم بفانوسى بتاع زماااااااااااان
معدن و قزاز مسطيل بباب بيفتح
و الوان اخضر و فوشيا و احمر
حاجه كده زى فانوس عفركوش بتاع اسماعيل ياسين
و افتكر زمان كنا بنحب نطفى كل انوار الشقه
و كل واحد يمسك فانوسه
و امسك انا فانوسى المعدن ابو شمعه بتلسعنى شويه
و نلف فى الشقه و نقول وحوى ياوحوى
كانت قمه سعادتى ساعتها
..............................................
اول مره اقعد فى الفيشاوى و انا كبيره
مكنتش متخيلاها كده
كنت فاكراها اكبر و اوسع و دورين معرفش ليه
و كنت متخيله جو مختلف شويه

الحسين على غير العاده فى رمضان
مش زحمه اوى
جايز عشان اول يوم
و مع ذلك انا باحب المكان و الجامع اوى
من سنه عملت جوله مع ابن خالى اللى محدش بيفسحنى زيه و عمو
من السيده زينب للسيده نفيسه مرورا بالسيده عائشه و اخيرا الحسين
اليوم ده انا مش حنساه بجد
مكنش رمضان
بس كان يوم ليه طعم
المطر كان بينزل
و الجو كان فيه هدوء و وداعه غير عاديه
و كل جامع كان ليه طعم
حتى الناس و انت شايفهم جوه بيصلوا و بيدعوا و بيتهلوا
متشفعين باهل البيت
افتكرت اوى قنديل ام هاشم
و بعد ما خلصنا لفينا فى ساحه الحسين
و شوارعه شويه
و ركبنا العربيه و روحنا
كان بالنسبالى يوم روحانى و استكشافى
حافضل فاكراه
...............................................
بافتكر هوزا و انا هناك
و هى بتدندن
ساكن فى حى السيده و حبيبى ساكن فى الحسين
و كانت بتحبها و تغنى و هى بتتمزك و تتقمص الشخصيه

دخان الشيشه كان مغطى كل حاجه
بس كانت القعده حلوه
اتعزمت على كوكتيل بالرمان
و قعدت اصطاد

سياح فى كل مكان
بشتروا فول سودانى و فل و ترمس
و بيرسموا تاتو بالحنه
و يشربوا شاى بالنعناع و يصبوه من البراد
بس كانت حافطس من منظر شويه و هم بيشربوا الشاى بطريقه تضحك
الشاى بتاعنا له طقوس

بموت فى اى حاجه قديمه
قعدت استكشف البيوت
و المحلات و الشارع
و الاباليك اللى بيعجبنى اوى شكلها

حاجه من الحاجات اللى كان نفسى اعملها
اقعد فى قهوه
قهوه بلدى
بس معرفش
واضح انى مش حاحس بمتعه كامله
الا لو كنت متنكره كولد
و تقعد تدوب مع الحوارات و التفاصيل
القهوه حاجه ليها مذاق كده
متقوليش كوفي شوب ولا نادى و لا اى حاجه
تعوضك عن المتعه دى
لمه اصحابك
الزحمه و الدوشه
الغنى جمب الفقير
ابو جلبيه حمب ابو شوز نيك و جينز جنب بدل الموظفين
تشكيله ارواح مختلفه و احاسيس مختلفه و تفكير و حتى شكل مختلف
بتجمعهم القهوه و تاخدهم فى حضنها

كتير لما بازهق و الاقينى مش عارفه اروح فين و لا اعمل ايه
و اتخنق من زحمه الشارع و المعاكسات
اقول لنفسى يااه
نفسى اروح قهوه
تنزل تاخدك رجليك لهناك
مش لازم يوم التجمع بتاع الشله
بس بتبقى عارف انك اكيد حتلاقى حد
و لو ملقتش عندك ناس و زحمه و حواديت
حيدفوك و متحسش بوحده او زهق

باحلم مع سطور الكتب
بزمان تنزل ريتش تلاقى لمه بيتكلموا
و تروح صالون مى تتفرج و تسمع
و زحمه و ناس و دوشه
و لف فى الشوارع
يااه لو الواحد يقدر يعيش متمرد كده

افتكرتك طول الوقت و انا باشوف الارابيسك
و احنا بنتمشى فى الحسين
و احنا معديين على الازهر بارك
و انا باشوف منظر السما و القلعه و الازهر و الحسين و الانوار الصفرا اللى بتدفينى
و واحنا معديين فى زياره للمعادى
فى سبتمبر زى اليومين دول بدات الحدوته
عدت سنه
لسه مش عارفه ليه سبتمبر حزين

ايها الساده اقترحواو قولولى رايكم

بلوج رحاب فتح نفسى على اقتراح
تبديل الكتب ممكن
اقتراح مكاتب فيها حاجات حديثه
تجمع بلوجاوى ثقافى ممكن نتكلم فيه عن كاتب او كتاب
معرفش يعنى تنظيم بلوجاوى ثقافى
و و النبى محدش يقولى مكتبه مبارك
و مكتبه مما سوزان و بلا بلا بلا
انا لسه مكتشفه من بلوج كتب خان
و ان شاء الله ناويه استكشفها
فيه حد كان قالى ان فيه مكتبه حلوه فى الزمالك
لو حد عنده معلومات
مجربتش استكشف كتب الساقيه بس ناويه

اللى خلانى افكر فى كده حد ملوش دعوه بالشبكه و عالم البلوجات
قلتله مبقدرش اقاوم ادومان النت و البلوجات و انى عايزه ابقى عارفه
قالى بس انتى مش بتعملى حاجه باللى انتى بتعرفيه
مبتغيريش حاجه بالبلوج بتاعك
مبتوصليش اللى عجبك فى حته
تفتكروا ايه يابلوجاويه؟؟
اقترحواااااااااا افيدونا

كتب كتب كتب

و بما انك فتحتى نفسى اتكلم
جريت ابص على كتبى اللى بحبها و مع ذلك بقالى كتييييييييييييير مرجعتلهاش
اللى فكراه و لقيته
و اللى اتسرق فى السكه و مرجعليش
و اللى كان استعاره بس عجبنى
بس مبدئيا و ده انا متاكده منه
مفيش حصيله ثقافيه
اهنماماتى ادبيه
حتى دماغى المسكينه
مبتشلش اى معلومات قريتها
جايز فيه حاجات بتعلق لو فى شكل حواديت

معنديش كاتب مفضل
كنت بانطلق فى اى مكتبه او حتى معرض الكتاب
يا يشدنى العنوان
و اقلب فى الكتاب اشوف حيخطفنى و لا لا
يا حد قريتله قبل كده
يا حواديت كتاب و ناس اعرفهم عن كتب
خلونى نفسى اقراهم

دول كانوا كتب بحبها و فريتها من سنين
كلوب و تعلوب
و سندريلا
و ميمون ياكل اسكر
و حدوته كمان عن الفيران
احب كتب الطفوله
و لسه عندى بقاياهم!
و لاتريقه عليهم ممنوعه

الباب المفتوح لطيفه الزيات
جين اير شارلوت برونتى
وذذيرنج هايتس حلو بس انا باحب جين اير جدا
مائه عام من العزله ماركيز
طيور العنبر ابراهيم عبد المجيد
داريه سحر الموجى
ساره العقاد
مائه امراه و امراه كامل الزهيرى
رباعيات جاهين اكيد
جابر عصفور و حد من اصحابى بعتلى لا تصالح
خلونى احب دنقل و حبيت ديوانه اكتر و اكتر لما قرته
اكيد حاجات لدرويش
و طبعا الابنودى و اكيد مذكراته و يامنه اللى دبت فى هواها
و بهاء جاهين
و مش فاكره اشعار مين تانى

سيره ابراهيم اصلات خلوه الغلبان
و لطيفه الزيات
و اصداء السيره بتاع نجيب محفوظ الله يرحمه
و توفيق الحكيم اكيد سجن العمر و زهره العمر و حماره طبعا : p
و عاشوا فى حباتى لانيس خصوصا الجزء بتاع نحن ابناء الغجر و الكتاب نفسه
رغم ان انيس بيجنن
خصوصا لو انت واحد فاضى ومبتبطلش تفكير و شغال تملا دماغك زى حالاتى
قررت ابطل انيس فى فتره حسيت انى ممكن اكتئب ياا تهوس!!
مين تانى
مطاوع اكيد كذا كتاب خصوصا بعض من عرفت او عاشوا فى خيالى بتاع فورست جمب
انا باعشق لمطاوع شويه حاجات
عم احمد فؤاد بس مكنتش الفاجوميات كتاب ضغير كده
صفيه العسال مذكراتها و لو انى ناسيه اسمها اخيرا افتكرت حضن العمر
اهديتها لحد وقلت حاجيبهوملى تانى و محصلش مشترتش حاجه
اول ما باشوف كتب جديده الفلوس بتتفرتك
خصوصا ان اسعار الكتب بقت خرافيه
عموما
انا باستمتع بالمذكرات و السيره الذاتيه جدا
صفيه ليها كتاب مسرحيه حلوه برضه
فضل مركون سنتين
بعد ما قريت مذكراتها جريت قريته على طول و خلصتف فى ساعتها
رغم انى مبحبش الكتب اللى فى صيغه مسرحيه
ماما نعم ليها كتاب برضه بس مش سيره
نشتهى امه الرزاق

لقيت صدفه مذكرات سميحه ايوب و كانت كويسه
جبران مجموعه قصص
ثلاثيه غرناطه لرضوى

واكيد محدش محبش الراجل الصغير ده ابو ضحكه طفل و كتابين ياسروك
قنديل ام هاشم وصح النوم يحيى حقى
لسه مقريتش كناسه الدكان مش عارفه ليه

مين تانى
الناقد الادبى الوحيد اللى بقراله و عجبنى كذا كتاب ليه
رجاء النقاش
بين المعداوى و فدوى طوقان المفضل
بعدها
قلوب و عقول و تاملات فى الانسان ودول مش نقد
حواديت و فلسفه
السقا مات من الكتب اللى باحبها اوى للسباعى
بين ابو الريش لادريس

فيه حاجه لمجيد طوبيا عن دمياط و الحمله الفرنسيه
و فيه حاجه لجار النبى الحلو ضاعت
و حاجه لحد مش فاكراه عن محمد نجيب و بعد الثوره كان اسم الكتاب تقريبا1954
مش فاكراه مين اللى كاتبه
بس كان كاتب كتاب تانى لسنه تانيه فى الفتره دى و كان نفسى اقراه
جميل عطيه تقريبا لو مبخرفش هو جميل حاجه

قدامى كام كتاب
دعاء الكروان رغم انى باحب الفيلم اكتر
و اديب و الايام
حاجه لديكنز رغم انه بعد مستر باوندر بى و المدرسه
اقتنعت انه كاتب كئيب
لحد ما اقنعتنى زميله كورس اقرا
A Christmas carol
Cricket on the hearth
عجبونى
برضه 3 novels
ل Danielle steel
The journey
Lone eagle
و حاجه عن استغلال جنس ليلى مش فاكراها

ولو انتو بتحبوا كارتون الحصان ابو قرن بتاع نادى السينما زى حالاتى
حتعجكم
To catch a unicorn for Sarah seale رغم انها مبتحكيش عنهم

انا تعبت و قلبت الدنيا من حواليا بالكتب
عشان افتكر
معتقدش حد حيقرا كل ده
انا اتخضيت من كل الرغى ده

ايها الساده اقترحواو قولولى رايكم

ده الرد عند رحاب

يااه يارحاب فى وقتك
اولا طبعا بجد انا مبهوره بكم الحاجات دى
بجد كل مادا بتاسرينا بحواديتك و
بالنسبه للطيفه الزيات انا وقعت فى هوى الباب المفتوح و حبيتها
و لسه باعتبرها من احب الكتب لقلبى
و قريت اوراق ذاتيه و استغربت
اد ايه الحزن كان مغطى كل حاجه
و عجبتنى سحر الموجى جدا و داريه
و حتى الرسومات اللى فيها
حاموت و اتعلم رسم بحرفيه
مى التلمسانى مقدرتش اقرالها معرفش ليه اسلوب الكتابه غريب
انا عندى الخباء و حاجه تانيه من كام سنه و مفيش فايده
و عجبتنى ثلاثيه غرناطه لرضوى عاشور
باحب الجو ده و الاندلس
اسم سحر خليفه مالوف بس معرفش اذا كنت قريتلها حاجه
اه صحيح اوراق النرجس بتاع سميه
كتاب رموز
سعيتها عجبتنى حاجات فيه
بس مش سلس بالمره

و موضوع الكتب الحريمى ده غريب
لان فى كتبى برضه الكاتبات يغلبوا
خصوصا فى الكتب اللى باحبها

للاسف بقالى فتره مقريتش
و بقالى كتيير مقريتش حاجه اجنبى
ممكن دانيال ستيل
رغم انى جبت الخيمائى و اعمل اوسكالر وايلد الكامله
و كتاب لهيمنجواى وداعا للسلاح من المعرض
و كنت عايزه اجيب كل اعمال اندرسن خاصه انى شفت قصه حياته فيلم
و كان نفسى اوى اقراها
My life as a fairy tale
مش عارفه ليه بقى فيه حاجز

و بما انك خبيره و بما انى عاطله حاليا
و لسه كنت بافكر اشترى كتب ايه
احب تساعدينى
انا اولا كنت بافكر
فى ان تكون عباس العبد
مقرتهاش رغم ان بقالها كتيييير نازله
و حاموت و اجيب ديوان
كوثر مصطفى موسم زرع البنات رغم انه برضه قديم و مش لقياه
و مش عارف ا شترى ايه تانى
يارييت تقوليلى بما انك اميره الحواديت
و افيدونا يا جماعه

قصيده حلوه و شاعر احلى حتعجبكم

رمضان كريم جميعا

كل سنه و انتوطيبيين

رمضان كريم جميعا

كل سنه و انتوطيبيين

تخاريف فاطر

ياااه بجد محتاجاه يجيي اوى اكتر من اى وقت
كل مره باقع بوصل لحاله الانهيار و معرفش الملم نفسى غير فيه
المره دى محتاجه الملم حاجات كتيير اوى
عشان كده محتاجاك
محتاجه سكينتك
محتاجه التراويح و شكل الناس فيه فى الشوارع وقت الصلاه و بعدها
و ريحه العود و البخور و احنا رايحيين نصلى
و لمه العيله
و حاجات كتيير اوى

اوحش حاجه لما تحس انك مهزوم
مهزوم اوى و مكسور من جواك
و مش قادر تلملم الحتت المنتوره منك فى كل حته

صحيح وقعت كتير و انهزمت او استسلمت قبل كده
بس كل مره بتلم فيها الحتت المكسره بتلاقى حته ناقصه
المره دى مش عارف تلاقى حاجه

بعتتلى مره قالتلى شارلى شابلن بيقول
"اسوأ ما يكون فيه الانسان ان يكون بلا عمل او حب"
لقيتنى بافكر
اسوأ ما يكون فيه الانسان لما يبنى حاجات و تتهد و ميبقاش فاهم ليه
لما يفقد سند او بوصله و الاوحش مرسى
و لما فى وقت يجيي عليه ميبقاش عارف بيعمل ايه

اسوا حاجه لما تفقدهم يا شارلى
باختيارك
و الاسوأ لو غصب عنك
..........................................................
محستش يوم بحنين مش طبيعى لايام زمان
طول الوقت عندى حاجات لحنين ورا
صحيح مبنعرفش طعم الحاجات و نحس بيها غير لما تروح و تتسرب
وحشانى نفسى اوى مش بس ايام الكليه و المدرسه
و حشانى نفسى و وحشنى و حشانى كل حاجه زمان
خصوصا باليل فى رمضان
و بالذات عند تيتى بالليل بعد الفطار ايام ماكانت بصحتها
وحشنى اكلها و الشاى و اللبن اللى فكرنى بيه عمرو من ايديها
و البطاطس البوريه و الطماطم المخلله و حاجات كتير اوى
محدش بيعملها زيها
............................................................
مبقاش عندى حاجه اخسرها
قدمت استقالتى زى الافلام
قلتلها لنفسى و ضحكت
بما انها اول مره اشتغل و اول مره استقيل
فكان ليها طعم غريب

خصوصا الفراغ التام
و التليفزيون المستفز
و الاخبار اللى ملهاش طعم
و الاعلانات المستفزه

اكتر حاجه حتوحشنى الناس و طيبيتهم
و حبهم
و مكتبى الصغير و المنظر اللى كنت بابص عليه
................................................
بصتلها اوى و هى بتعافر و شايله فوقيها جبل
مصره تسحبه للبيت قبل الشتا ما يجيى
و لقيتنى باحسدها
باحسد نمله!

احلى حاجه ...

ابتسامه نونو صغير لامه
و هو عارف انها مش حتسيبه
بس برضه بيدور عليها
و دايما عايز يمسك فى هدومها عشان يطمن

البلد دى اسمها مصر ياهبلة !

البلد دى اسمها مصر ياهبلة !

الوحيدة اللى ملهاش وصف ، والوحيدة اللى فيها كل حاجة ، والوحيدة اللى مظلومة ، والوحيدة اللى مش لاقية عشيق ، والوحيدة اللى ولادها مش بيخدموها ، والوحيدة اللى بتندبح وبتتسرق وبتتحلب من غير ماتقول لا .. هى دى مصر ياهبلة!
من فوق من عند السد العالى والناس اللى زى الشيكولاتة لتحت عند المصب عند الناس بتوع الشبكة والصنارة ورزقنا عليك يارب ، والمصب فى مصر بالضبط عامل زى السرير مصر بتعشق نفسها عليه حالة حب وعلاقة شرعية تشاهدها بلا خجل وأنت واقف أمامه، أما الشيكولاته فحالة فرح وضحكة مستحيل متحركش القلب حالة تزاوج يمكن بين الأرض والإنسان ، حالة توحد يمكن بين البلج الأبريمى اللى مرمى على جسور الغيطان ومية النيل ..مش مهم المهم ان النتيجة كانت شيكولاته .
الناس أغرب مما تتخيل صعب تحليلهم ، تشريحهم، أو حتى دراستهم ، فى مصر "ياهبلة" صعب جدا تفرق بين الضحكة والتكشيرة بين الصراخ والصهللة بين الطيب والشرير .. هى كده ناسها عايشين بالبركة وراضيين بالبركة ممكن يلعنوا خوفهم وهم قاعدين على المصطبة وفى نفس الوقت يتكلموا بشويش علشان الحيطان ليها ودان !
ممكن يعيط الواحد فيهم علشان أبوه مات وفى نفس الوقت بيضحك من جواه علشان الورث ! ممكن تلاقى الواحد زعلان وهو بينضرب على قفاه من رئيسه فى الشغل وفى نفس الوقت فرحان علشان هياخد اخر الشهر كام ملطوش ... هى دى مصر ياهبلة .. الناس فيها تنام..و تنام على الظلم على أكل قوت عيالهم على زلهم وفجأة ممكن يثوروا على قزازة قازوزة أو غشاء بكارة هتكه مسطول فى ليل ضلمه مع أنه قبل كده هتك ياما أعراض فى النور ..
هى دى مصر يا"هبلة" .. الجوامع فيها مش لأهل الدين أبدا، الجوامع فيها للمنافقين يخرج منها بزبيبة الصلاة والسبحة فى إيده وإيده التانية فى جيب غيره بتقلب فى محفظته.. العمة فى مصر متبقاش أبدا على رأس الراجل الشيخ بتاع ربنا ، لا تلاقيها على رأس الرجل الشيخ بتاع الحكومة ..
هى دى مصر ياهبلة والله طيبة وحنينة و بنت ناس أوى تقدر تبقى زى اللليد ى أرسطقراطيك وبرضه تبقى فلاحة شايلة البلاص وبتتدلع تملاه ميه ،هى دى مصر ياهبلة تقدر تاكل فول وبصل وعدس وبرضه تقدر تتعامل مع الشوكة والسكينة والسيمون فيمييه والكافيار..
تقدر تعيش فى عشة على الترعة أو تنام على الرصيف وفى نفس الوقت ممكن تنام على سرير حرير فى قصر فيه 100 أوضة وطقم خدامين .. تقدر تبقى فرحانه وهى بتبلبط فى الترعة وبرضه فرحانه وهى بتسترخى فى البسين !
هى دى مصر ياهبلة تولد من نفس البطن سعد زغلول ومصطفى كامل وناس تحلب فى نفسها علشان خاطر هى تشرب، ومن نفس البطن برضه تجيب أشكال تلزق على الكراسى وتحلب فيها علشان يشربوا ..
هى دى مصر ياهبلة فيها ناس يموتوا على الجبهة وولادهم يتتموا ويتاجروا بيهم فى التلفزيونات وناس كانت قاعدة فى التكييف بتشاور بعصاية طويلة على خريطة يكتبوا إسمهم بمية الدهب ويغنوا لهم فى كل ساعة أغنية "واخترناه اخترناه علشان هبش وفلوسنا معاه"
هى دى مصر ياهبلة .. فيها ناس ركعت علشان يقصوا رؤسهم علشان هم فى الأصل رفضوا يركعوا وناس تانية ركعوا علشان يحفاظوا على روؤسهم وفوقها أثار الجزم ..
مصر ياهبلة حلوة بجد ووحشه أوى ، نفسك تهرب منها، وتبكى لو فكرت انك تبات بعيد عن حضنها ، حنينة وجميلة ، قاسية ، وصعبة ، كريمة أوى وبخيلة ، كبيرة أوى وصغيره فى بعض الأحيان ، عظيمه لدرجة تزهلك وقليلية أوى ساعات ، متحضرة جدا وفى نفس الوقت قمة فى التخلف .. هى دى مصر .. أجمل حاجة فيها إنها مش بتنكسف من نفسها وأوحش حاجة فيها إن ولادها "مش كل ولادها" بيتكسفوا منها ...هى دى مصر كل الحاجات الحلوة أصل أصيل فيها وكل الحاجات الوحشة عمرها ما كان ليها ذنب فيها .. عرفتى ياهبلة الذنب ذنب مين ولا لسه محتاج نرجع نعيد الرحلة من أول منابع النيل ؟

محمد الدسوقى رشدى"صحفى بالدستور"

اهانه سيادته!!

اهلا بيك فى بلد لا اسمع لا ارى و اياك تنطق!

لما الرئيس مش عاجبه اللى بيتقال
بيقول حريه صحافه ليه؟؟
ليه الرئيس مبيرفعش بنفسه قضايا سب و قذف؟؟ هو محتاج حد يرفعها بالنيابه عنه؟
و اشمعنى الناس دول اللى خديتهم الحماسه و اتحمقوا و قاموا يرفعوا قضايا؟؟
هو الريس مديلهم الحق يدافعوا عنه؟؟و لا محتاج مساعده!
اشمعنى فى اى حته فى الدنيا من حقك تنتقد حاجات كتيير
و عندنا لو عملتها رايح رايح فى سكه اللى بيروح ميرجعش
ليه النقد عندنا = قله ادب.. سب وقذف.. عماله.. اهانه حضره الرئيس

بمناسبه سكه اللى يروح ميرجعشى
و بعد رفع واحد من السنيده قضيه جديده
من ضمن القضايا المرفوعه
بتهمه اهانه سيادته
المجنى عليه المره دى فى العشرينات
يعنى لا حول ولا قوه
صحفى بالدستور و سكرتير تحريره
كل ذنبه انه حب بلده شويه زياده
و بما ان الكلمه حياته
قال كلمته و خد قضيه
ولسه متحكمش فيها

كلنا ليلى (1)..منكوشه الروح

متاخر شويه بس غصب عنى
كل حاجه متوقعه اليومين دول
كلنا ليلى
آه كلنا ليلى
آآآآآآآآآآآآآآآه
ده انا نفسى املا مجلدات

كلنا ليلى
لما تركب مع سواق تاكسى
و بلطجه يلهف الفلوس وال هو كده
و شبه تترمى من العربيه و يطلع يجرى
و المشكله انك طيب و مش بتاع شرشحه و بتدفع بزياده
بس مفيش حد للطمع
وقله الادب
و تحس بالعجزو ان حقك مهضوم عشنان ضعيف
متملكش غير حسبىَ الله
يبقى اه ياليلى

و مع سواقين التكسه و الميكروباصات
ليلى اتبهدلت و بتتبهدل
من مد ايدين
او محاوله خطف
او قله ادب و شتيمه
و مبتفرقش
ليلى واحده كبيره ولا صغيره
متجوزه و ممكن يكون النونو بتاعها راكب معاها كمان
ولا طفله حتى
و الناس طبعا رواد المسرح
محدش بيسمع و لابتكلم
خرس من جوه و م بره

لما تسمع عن ليلى خدها بتاع التاكسى البيت فى حلوان
و مره واحده اتخطفت
و يتقالها
صوتى اعملى اللى انت عايزاه
بس حتقلعى
و حاعمل اللى انا عايزه
متخفيش حاخليكى بنت
و تفضل ليلى بنت
مصابه بانهيار عصبى لحد دلوقتى
مس مفيش لوم
كتر خيره صاحب مبدا غيره معملهاش!!
وشوف كام ليلى بيتجنى عليها
سواء بتحرش او هتك عرض او اى حاجه
حتى من جوزها نفسه
و فى الاخر بتعامل كمريضه بالجذام من المجتمع و اهلها قبل اى حد
و بتموت كل يوم الف مره

كام ليلى بتتعامل زى الممسحه
مقابل الحيطه اللى بيقولوا عليها
و السكن و الماوى
بتعيش منتهكه
تخدم و تنضف و تربى و تكبر
و فى الاخر بتقالها
فين الشاى يامره

و كتير يتجوز عليها
و ممكن تتضَرب و تصرف هى على البيت
و تخدم حتى غصب فى البيوت
و لو ليها ابن
بتتكرر المأساه مرتين
معاها و مع ليلى اللى جايه

و كتير يتبقى كائن خواف مش قادر يقاوم
استغلاله باى شكل
حتى الاستغلال المعنوى

و ساعات بتبقى زى العصفور الدايخ
بيخبط فى كل حته لحد ما يقع


قبل ماحد يتحمق
و لا يقول انى مجنونه و معقده
او على رأى بلو باوقف سوقى!

انا مش باعمم
و مش متخصصه هجوم
انا باتكلم عن ناس
حواليا
حاجات بتشوفها فى يومياتك
لو بتحب تبص حواليك زى حالاتى

و ليلى مش ملاك
و ليلى ساعات كتير برضه بتكون جانيه

ليلى اتربت على الخوف
من و هى صغيره
متعمليش متكلميش متروحيش
لحد ما تكبر
و غالبا بتعامل كساعه مطلوبه

ليلى بتتظلم كتيير
لدرجه ان آدميتها بتضيع وسط السكه

ليلى بتكبر حاسه بكم غضب
و رفض و نفور مش طبيعى
و حتى و هى عارفه ان فيه بشر
وبنى آدمين
و مش كل قيس وحش
الا انه بيكون صعب عليها اوى
فكره انها تتوجع

عندى كلام كتير مش عارفه ارتبه بس
اتمنى اخرجه يوما ما

انا فرحانه اوى اوى
و انا باقرا كلنا ليلى
كلنا ليلى مست حاجات كتير جوه
كلنا ليلى مش هجوم
كلنا ليلى
ميكرسكوب حريمى

لسه عندى امل فيك..

مجتش
فضلت مستنيه مستنيه
و اقول حييجى اكيد
و ابص على الباب
بس انت مجتش و مسمعتنيش

ساعتها حسيت انى لوحدى وسط الزحمه دى كلها
و ساعتها دبت

"من ذا يشفى نفسى حين تختلط الرؤى او يحتوينى ذلك الحزن الصديق فلا اطيق؟

صالحتنى على نفسى حتى صرت اقرب ما كون اليه فينا

صالحتنى على ناسى وكنت اشك فى بله الجماعه يخُدعون لغير ما هم

صالحتنى على حريتى فجَزعت اكثر ان اضيع بظل غيرى

صالحتنى على ايامنا المره مهما كان منها

علمتنى بانا خلقنا للحلاوه و المراره نحمل الوعى الثقيل نكونه كدحا اليه

" "يحيى الرخاوى""تقريبا"

أنا وهى وقوس قزح!

كل حاجة موجودة فى السماء، كل حاجة بتنزل من السماء.. الغضب والحزن ،الفرح والرحمة ، الخوف والأمان ، الراحة والتعب ، المستقبل والماضى ، اللى جاى واللى رايح ، اللى كان واللى هيكون ، حتى هديتك موجودة فى السماء صحيح انت متعرفش هى إيه ومين وليه وعلشان ايه ؟ وصحيح ليس معروف فى أى عيد ميلاد ستحصل عليها ولكنك تعلم انها موجودة !
قد تلقى بها السماء فى طريقك فى أى يوم ليس بالشرط يوم عيد ميلادك ولكنه عيد رضاء السماء عنك .. عموما إسمح لى أيتها السماء ان انحنى تلك الإنحناء التى يطلقون عليها انحناءة الشكر واسمحى لى أن ازيد كثيرا فى الإنحناء لعلها تصبح أشهر وأخلص انحناءة شكر وامتنان على هديتك الكريمة ..
كنت اتخيل ان عطايا السماء تتوقف عند هذا الحد أن ترسل لك الهدية وتترك لك حرية التصرف واختيار الطريقة التى تفتحها وتشاهدها وتتعامل معها بها ... "ها هى هديتك فإفرح بها وانظر ماذا أنت بها فاعل " كنت أتخيل ان الكارت الى أرسلته السماء مع الهدية يحمل تلك الجملة فقط وكنت فى قمة الخوف على اعتبار أن دور السماء سيتوقف هنا وسأكمل أنا المسير منفردا وأنا الذى لايجيد التعامل مع الهدايا .. تقول ايه بقى مش وش نعمة ؟
كنت أتخيل ذلك ومرعوب منه بصراحة ،
فأى غلطة قادرة على أن تسحب الهدية منك وتتركك تلعب فى ايدك الفارغة وتلطم بها على خدك بعد فقدانك هديتك التى ربما تكون تعبت كثيرا من طول انتظارها والبحث عنها ؟
غير أن السماء لها الكثير من المفاجأت ورب السماء رحيم غفور .. ولم تتركنى السماء لحالى ولم تتركنى أعانى كنت أشعر أنها تسخر نفسها لخدمتى وإرشادى لكيفية التعامل مع الهدية تمتص غضبى تمنحنى مزيد من الهدوء والسكون لم اعتد عليه ، تهدينى قوة صبر لم يعلمها أحد عنى من قبل، وتزرع فى نفسى صفة جديدة لم أكن أؤمن بها من قبل وهى الرضا بالقليل .. تخيل أنا أرضى بنظرة خاطفة من عينها أو رسالة غامضة غير صريحة تحتاج لقاموس الشفرات لتستخلص منها أن هذه المرأة تريد ان تقول لى أنها تحبنى، شئ صعب لم أكن اتصور أن أرضى به بل و أسعد به كما لم اسعد من قبل ..تلك عطايا السماء السحرية ؟ .. الشكر للسماء !
تخيل أن تظهر لك السماء علاماتها خصيصا من أجل حبك ، تخيل أن تسخر السماء بعض جمالها من أجل أن تمنحك قوة للتعامل مع هديتها التى أرسلتها و تعلم انها صعبة .. قاسية .. حنانها مكتوم بداخلها لايخرج إلا بصعوبة فأرادت أن تساعدنى.. فجعلت غروب الشمس أروع ما كان من قبل وكأن السماء أدركت أنى فى تلك اللحظة أقف بجوارها لأتابع غروب قرص الشمس فجعلت منه لوحة جميلة كان يصعب رؤيتها من قبل، لعل السماء أرادت أن تقول لها أن ذلك الواقف بجوارك هو سر الجمال فى حياتك لعلها أرادت أن تمنحنى فرصة لأقول وأتكلم معها والكلام معها لو تدركون صعب ...
قرص الشمس يتغير ويلعب وكأنه يقول لى قول لها الأن أنك تحبها قل لها الأن انظرى الى قرص الشمس لتدركى أن خلفه بوابة العالم الثالث فهيا نخدل معا يدى بيدك ... كان يمكن أن أقول ذلك ولكن ماذا لو أغضبتها ... إذا صبرا أيها القلب لعل مابك قد وصل لقلبها دون إشارات اللسان!! ... وضاعت فرصة أخرى من مساعدة السماء لى .. ولكن ما أروعك أيتها السماء ؟؟؟!
لا أعلم لماذا دارت رأسى بعيد عن الشمس وبعيد عن الوجه الذى يقف أمامى .. لم يكن هناك سببا محددا ولكنها إرادة السماء التى أرادت لى ان اراه ...كان بألوانه كاملة و رغم الغيوم إلا أنه كان قويا ورغم انى رأيته فى مرات قبل ذلك أكثر صفاءا وقوة إلا انه فى تلك المرة كان اكثر تألقا ربما لانه ظهر خصيصا من أجلى ربما أدركت انه إحدى معونات السماء أرسلتها لى ، وهى تقف بجوارى وكأنها ملاك هبط على الارض فورا ..
لا أعرف ؟!
غير أنى بطفولية شديدة غمزت كتفها قائلا "بصى .. بصى" لم اشعر بفرحة كتلك من قبل عندما قالت " الله أنا اول مرة اشوف قوس قزح حقيقة " يااااااااه إنها إحدى علامات السماء بلاشك !!
لم أدرك مدى حيرتى وعجزى عن الكلام إلا عندما قلت لها "الحمد لله خلى بالك إنك أول مرة شفتى قوس قزح كنت معاى " نظرنا لألوانه ونظرت لعينها أريد أنطق بشئ ولكن ... تلك لعنتى " خوفى من أن أغضبها " إلا أن قلبى وصلته رساله لا أعلم كيف ولم أحللها واكتفيت فقط بإختلاس نظرة لعينها لكى أعود واتنفس وأنا مطمئن ... عدنا نستكمل رحلة الشمس فى الغروب نتابع جمالها وأحلم أنا بذلك اليوم الذى أقف بجوارها بعدما تشيب الشعور وأقول لها "فاكره ."..
تخيلت فى نفس اللحظة أنها تحلم بذلك قد يكون تخيل لإرضاء قلبى المسكين ولكن جاءنى احساس ليقول لى أنه تخيل يحمل بعض من الحقيقة .. رغم انها قالت انها لاتريد ان تعيش لمرحلة "الأسنان المخلعة " دون أن تدرك أن تلك رغبتى منذ كنت فى بطن امى !!
عدت لأرى قوس قزح كان قد قارب على التلاشى ولكنه كان يبتسم لا اعرف من أين ؟
ولكن لعله كان يبتسم ويقول لى "أنا عملت اللى على وظهرت فى وقت قد لا يتوقعه الناس عشان خاطرك وخاطرها "... رحل و أدركت وقتها أن السماء تبارك تلك اللحظة وتبارك وجودى بجوارها ووجودها بجوارى .. ولم أتكلم ولم تتكلم وكأننا أتفقنا على ما اتفقت عليه السماء!

فرح ابن خالى وبحبه!!

بحبه و باموت فيه كمان
فى 5/9/06
دخل القفص ابن خالى العزيز
بايديه و رجليه

كنت عامله زى مامت العريس فى الفرح
و انا باتفرج عليهم

بعد خمس سنين كليه سوا
و دنيا تانيه
من اول
كونه ابن خالى الرخم
اللى بيجلنا كام شهر الصيف
و لازم نستحمله
ضيوف بقى!
(بس على مين
يعمل كده على اخواته البنات )
لحد اليوم اللى بتكبر فيه
و تلاقيك بتتكلم معاه
و تكتشف انه طلع حاجه تانيه
و تتكلم معاه عن حاجات كتير
و تبدلوا شرايط
منير و ايمان البحر درويش
و يسمعنى امينه و ذكرى و معرفش مين
و اسمعه اجنبى و حاجات تانيه

و احصله فى هندسه
و يشرحنى رسم و يرسملى
بما انى باكره المكن
و بما انه بقى ميكانيكى محترم قد الدنيا
لحد
الخناق من اول يوم بقيت معاه فى كليه واحده
و تمر السنين بين افراح و احزان
و خلافات و احتفالات
واصحاب مشتركين
ويوميات مشتركه
و عمر بحاله يعدى
و يفضل
اخويا فى الرضاعه فى نظرى
و صاحبى جوه و بره العيله
و اللى بيسندنى و يسمعلى
و ادبسه ساعات و يدافع عنى
و ابن خالى العزيز جدا جدا
اللى باقول جزر الاقيه
و موجود من قبل ما اقولها

حاجات كتير اوى اوى اوى
حتخلينى اعيط وانا باكتب

و خليتنى زى مامت العريس
حاسه نفس احساسها
و انا شايفاه
اخيرا بيتجوز حبيبه عمره
اللى فضل يحبهاو يحلم بيها
بنت خالى و بنت عمه
و اتفرج على الصور بتاعتهم و هم اطفال على الشاشه
و احس اننا كبرنا بسرعه اوى

فى نفس الوقت اللى حاسه كانه امبارح!


سليف و مريون
مبرووووووووووك
انتوا تستاهلوا كل خير
و امرى لله حاحاول اربيلكم العيال!

و بما انها فره فى العيله
تانى يوم تتقرى فاتحه زاحمد فاكهه عيال العيله
و اطيب و اخف دم فى ولاد خالاتى
لاطيب مخلوقه فى الدنيا
و اللى متبانيانا على طول
روفان بنت خالى
احمدك يارب
جوزنا الاولاد و خطبنا و عملنا كل حاجه
بس مليش دعوه يا حوش
ليا عزومه
تخرجونى و تفسحونى و تعملولى كل حاجه

و رغم انى باكره المناسبات و الاحتفالات و الافراح الخ الخ الخ
الا ان مفيش احلى من لمه العيله
و اننا نتجمع فى فرح

عوده بعد غيبه
للاسف مفيش كمبيوتر متاح ب dsl عند تيتى
زى زمان
وللاسف فيه حظر بلوجاوى فى الشغل
و للاسف مفيش نت كافيه محترم فى المنيل
وللاسف وسط فركشه الحياه
وسخافه تفاصيلها ضعت

شكل البلوج بقى مش ولابد
عشان باستخدم photobucket
عشان اعمل بوست
انا مبشوفش شكل اللى باكتبه!!
حتى ده معرفش ايه اللى حصل و باظ هو كمانلو حد عنده حل يشكحنى ياجماعه