عزيزى المشترك

عزيزى المشترك:
نهنئكم بالعيد السعيد
و نذكركم بموعد إستحمامكم السنوى
(">) (">) (">)
..............................
دى احلى تهنئه جاتلى من المتشرده اختى

كلها بكره!

هييييييييه التكبير ايتدى حالا و انا باكتب

الله اكبر الله اكبر الله اكبر
الله اكبر و لله الحمد

باقى كام يوم والخروف المسكين يدبح
و تملا الشوارع الدم
انا من كارهى اللى بيحصل فى الشوارع فى العيد

كل سنه و انت طيبين
و كل عرفه و انتو راضيين و مرضيين
و كل فته و لحمه و رز و انتو بخير

و شوفو السايت الجامد ده
كل واحد يشوفلوا خروف

عايزه أيه من بابا نويل؟؟

مكنتش مستعده للسؤال و انا باحكيلك عنى و عن كوكو

و ازاى لقتها مش فاكره يعنى ايه رأس السنه

و مش عارفه بابانويل

و ازاى قعدت جنبها احكيلها

و سألتها فى الآخر عايزه أيه من بابا نويل

إنتِ عايزه أيه من بابا نويل؟؟

انا مش عايزه حاجه

....

كالعاده تخرسنى الاسئله المفاجئه

كالعاده برد باى حاجه يسعفنى بيها لسانى

عشان ادى دماغى فرصه تفكر

افتكرت زمان

و احنا صغيرين لما بابا كان بيجيبلنا حاجات

و بيحطلنا جنب سرايرنا

شوكلاته و حاجات

و يسيبلنا ماسكات بابا نويل

و اد ايه كنت بافرح بيهم

حتى و انا عارفه ان مفيش بابا نويل

و ان بابا نويل بابا

............

عايزه عربيه بابا نويل

ايه الطمع ده انتى عايزه تاخدى كل حاجه ليكى

ضحكت

و مردتش مكنتش عايزه الهدايا و الحاجات

كنت عايزه اركب العربيه و اطير فى السما

وسط السحاب

لا باتكلم جد عايزه ايه من بابا نويل

ضحكت بعصبيه

مفكرتش عايزه ايه

خلاص حاسيبك تفكرى

شوفى عايزه ايه من بابا نويل؟

ايه الحاجات اللى عايزاها و تتمنيها للسنه الجديده

و ايه الحاجات اللى حصلت فى 2006

و مش عايزاها تحصلك تانى

و ايه الحاجات اللى حصلت و فرحتى بيها او عايزاها حتى فى السنه الجديده

هاتى ورقه و قلم و اقعدى مع نفسك و اكتبيهم

و اكتبى عايزه تعملى ايه

ضحكت تانى

ياسلام و لما اكتب الحاجات دى كده بقى حتتحقق

لا بس اول خطوه عشان تحققيهم انك تكتبيهم

و تعرفى انت عايزه ايه

لو مكنتيش عارفه فدى مشكله

خلاص اتفقنا

حاسيبك ساعه و لا اتنين و اكلمك

تكونى كتبتيهم

ضحكت تانى

ده جنان

انت بتتكلم جد

جربى بجد دى حاجه مفيده جدا

ان شاء الله

.............

.............

و قفلت

معرفش ليه مقلتلكش انى كل سنه و غالبا فى التوقيت ده بافكر فى حاجات كتير و بافتكر حاجات كتير

و فجاه كنت بلاقينى باشخبط

مش امنيات و ايه يحصل و ايه ميحصلش

حاجات افتكرتها

قعده مع ناس

كلمه حد قالهالى

حاجه مزعلانى

ناس ضايقتها

حاجات مخوفانى

معرفش

اى حاجه بيتيجى فى دماغى وقتها

غالبا كمان بافتكر اوى قعدات الكليه

انا و هوزا و شريف

و الاحداث اللى عدت علينا

معملتش كده المره دى لحد دلوقتى

افتكرت ساميه بس فجاه من كام يوم

و قعدت فاكراها اوى

خصوصا لما عديت على مكانها

اللى بافتكرها فيه مع ناس تانيه

معرفتش اروح امسك ورقه و قلم

بعد مكالمتنا من كام يوم

و معرفتش ابطل تفكير من ساعتها

ساعات بالاقينى باضحك

و ساعات بازعل

و ساعات بحس بخوف

امبارح مسكت كشكول و قلم

و كتبت شويه الرسائل دول

بالصدفه كان فى نفس الكشكول اللى كتبته زى عادتى قبل و بعد السنه الجديده

بلحظات

السنه اللى فاتت

صحيح عايزين ايه من بابا نويل؟

عايزه اعرف

مستنيااك

(1)

سانتا العزيز

صحيح أنت حدوته

صحيح كلهم بيقولوا انك مش موجود

حتى أنا نفسى

بس من زمااان و لحد دلوقتى و النونو اللى جوه

عندها استعداد للحواديت و الجنيات و سانتا كلوز

و حتى كونها ممكن تطير زى سوبر مان زى ما كانت بتعمل زمان

و تقف على أطراف بلكونتها بعبايتها الطايره...

كنت باقول ايه؟؟

كنت باقولك متنساش تعدى عليا انا مستنياك متتأخرش

و كل اللى عايزاه استلف عربيتك

و أطير فى رحله وسط النجوم

صحيح أنا مكنتش طفله مطيعه فى اى وقت

بس اتمنى تحققلى حلمى

مستنيااك

(2)

العزيزه 2006

أعذرينى أتهمتك أنك كئيبه و ممله و عايزاكى تعدى بقى و كفايه عليكى

بس لما رجعت افكر فيكى

لقيتك من السنين اللى مش حأقدر انساها

بحلوها و مرها

بناسها و أحداثها و ذكرياتها

و حتى الاماكن و الأوقات اللى قضيتها فيكى

و الأفراح اللى حضرتها و شفتها لأقرب الناس ليا

فيكى لقيت حاجات كتير و اتعرفت على حاجات كتير

حتى فيا

صحيح احداثك كانت مفاجئه و متلاحقه و سريعه

من خط واقف ميت لصعود لهبوط لضربات منتظمه و ثابته

بس بكل تقلباتك دى اثرت فيا كتير

فيكى رحت اسكندريه فى الشتا

و كانت من احلى زياراتى ليها

و احلى وقت حسيت بدفا العيله و جنون البحر

فيكى ارتبطت بشغلى و ناسه

و فيكى كان لازم اسيبه لما ملقتش نفسى فيه

وفيكى وقف جنبى ناس كتير اوى و سندونى

فيكى حصلى كتير اوى

عشان كده أعذرينى

انت مهمه عندى و مكنتيش ممله

ومع اخر انفاسك

انا راضيه عن كل لحظه فيكى

و عن احداثك بشكل كبير

زى ما انا مقتنعه انى مع رضايا ده

عايزه اقلب صفحتك ل 2007 جديده

و احداث جديده و ذكريات جديده

مستنياها ومستنيانى

(3)

2007

لسه متعرفتش عليكى

بس مستنياكى بترقب و حاطه عليكى

آماال كبيره لأول مره

أتمنى تكونى رحيمه بينا

(4)

ياترى اللى بيعيش الزمن احنا؟

ولا الزمن هو اللى بيعشنا؟؟

شتاء

شتاء*

لم أكن أبكي
لكنَّ الأصحابَ
كانوا يختفون َ في عينيّ
كأضواءِ السيّاراتِ
.تحتَ المطر

.................

فجأه ضاق بنا حضن هذا الوطن

ليحمل الكل رحاله ضاربا فى بلد اخر و ارض اخرى!

.....................

مقدرتش مزعلش و انا شايفه الوشوش اللى بحبها بتختفى كل يوم

و اصحابى بيتشتتوا فى بقاع الارض

على قد ما كنت فرحانه انها نقله ليهم

و حاجه ملحه عشان يقدروا يكونوا نفسهم فى الزمن الجميل بتاعنا

و يكونوا مع الناس اللى بيحبوهم

على قد ما بازعل

و بتضايقنى فكره عدم وجودهم

صحيح كده كده العجله بتلف و الاصحاب بيتفرقوا

و عشره كل يوم

مع التزامات و مشاغل الحياه

وحاجات كتير

بس كفايه تلاقى تليفون من حد منهم

كفايه تسمع خبر حلو من حد

كفايه تشوف فرحه فى عنين اى واحد منهم

كفايه مقابله كل مليون سنه

تحسسك و ترجعلك حاجات كتير

...............

كريم انت اللى الدور عليك المره دى

حافتقدك جدا يا كمبر

حاكلم مين لما ابقى متغاظه دلوقتى

و مكتئبه؟

مين حيرفع معناوياتى

و يقولى اخبار العيال؟

مين حيستحمل تهيسى و رغيى

عموما الامارات مش اخر الدنيا و كده كده فيه اجازات

مش كده

و كمان حتجيبلى العربيه الهديه

بما انى دعيتلك اد كده

و بما انك حتبقى غنى

و فى الصحرا على طول و مش فاضى تتفسح

عشان كده تجيبلى انا و مرمرينا العربيه

و اللذى منه و حنتفسحلك

.............................

بجد انا عارفه انك اكتر واحد زعلان و خايف

و حتفتقد كل حاجه

و مش سهل بس لازم عشان مستقبلك و حياتك

و بحب فيك حبك لشغلك و طموحك

عشان كده انا فرحانالك كمان

.....................

*شتاء "سوزان علوان

فلامنكو

دائما ما يأخذها صوت الناى

دائما ما يمس قلبها بسرعه

ليتسلل اليه و تتسلل الى عيونها الدموع

لا تدرى لماذا و لا تستطيع ردعها

و لا ردع الاحساس بأنينه و تردده داخلها

هذه المره كانت مختلفه

ما بين أنين الناى و صدى الجيتار و ضربات الطبله

يترددا فى عزف منتظم لم تستطع مقاومته و مقاومه ايقاعه الراقص

لتذهب بعيدا

تود لو انها ترقص وسط الرمال

تحت سماء مظلمه مطعمه بالنجوم..

النجوم وحدهم هم جماهيرها و متفرجيها

لتطلق لساقيها و تصفيقها و حتى لفات فستانها العنان

لتضرب الرمال بقدمين حافيتين

......................

يعود بها الكمان الى أرض الواقع

ليأخها بعد حين الى موجه أخرى

لم تتخيل ان نغمات الكمان قد تتحول من البرود الى الدفء

و من انغام موسيقيه كلاسيكيه لتطلق نغمات شرقيه بارعه

تجاوبها نغمات مماثله على الجيتار

لم تتخيل مدى روعه مزج أنغام الفلامنكو بنغمات شرقيه و أشعار فصحى

لتلك اللحظه!

............................

زوروا فلامنكا و اسمعوا التسجيل ده

أوعى تكب الزيت!

"المهم..فى حته من أشهر رواياته كان بيحكَى عن واد

راح يُلقط الحكمه من راجل(كوبًره) كان عايش لوحده فى قصر

الحكيم أداله معلقه فيها نقطه زيت و طلب منه يخش القصر برجله اليمين،

يتفرج و يطلع من غير ما يكب نقطه الزيت،

الواد دخل القصر و طلع و الزيت فى المعلقه زى ما هو و تمام التمام،

قام الحكيم سأله :

أنت شفت إيه جوا القصر؟

الواد قاله و لا حاجه لأنى كنت خايف اكب نقطه الزيت،

راح الحكيم مرجعه بنفس نقطه الزيت و طلب منه المرًه دى ياخد باله م الحاجات اللى جوا القصر.

فى تانى مره الواد راح مبحلق و مزبط و راح راجعله،

شوفت إيه؟

قاله دانا شفت إشى لوحات على إشى سجاد

و أبصر أفشخانات إيه،

راح الحكيم مشاورله على المعلقه و قام قايله:

آه..بس انت دلقت نقطه الزيت يا (كوتوموتو)"

و الدرس المستفاد؟

"لازم تتمتع بالدنيا من غير متكب نقطه الزيت اللى جواك"

................................

أحمد العايدى " أن تكون عباس العبد"

قبل ما كلنا نختفي

كلمه عن كل حاجة شفتها

لإن كل يوم

بيختفي جزء من المشهد

للأبد

..................
النشره
حابدأ بديوان محمود ابو خمس قروش
اللى يستاهل كتير
زوروا شغل كايرو و اقروا الديوان
...............
الباقى حيجى فى السكه

ما أشبهنى بذلك الجندى..

يقاتل الجندى أعداءه بضراوه، يتمنى لو يفنيهم جميعا..

لكنه إذا قدر له،مره واحده ، أن يعبر إلى الجانب الآخر

و يتجول بين صفوفهم سيجدهم بشرا طبيعيين مثله،

سيرى أحدهم يكتب خطابا لزوجته و آخر يتأمل صور أطفاله

و ثالثا يحلق ذقنه و يدندن..كيف يفكر الجندى حينئذ؟!..

ربما يعتقد أنه كان مخدوعا عندما حارب هؤلاء الناس الطيبيين

و عليه ان يغير موقفه منهم..أو ربما يفكر أن ما يراه مجرد مظهر خادع

و أن هؤلاء الوادعين ما إن يتخذوا مواقعهم و يشهروا أسلحتهم

حتى يتحولوا إلى مجرمين، يقتلوا أهله و يسعوا الى إذلال بلاده..

ما أشبهنى بذلك الجندى..
.........................
شيكاجو " علاء الأسوانى" - الدستور

زوروها

معتقدش حتفتكروها
الانسه زورونى عمللت شويه تجديدات بمساعده حضرتى
صحيح هى مختاره الصوره
بس مليش دعوه مش حقبل بأقل من عزومه
هيه كانت مختفيه عشان ال ايه ثانويه عامه و كل حياتها دروس
و عشان كومبيوتر حضرتها مش عارفه تكتب فيه عربى
و الاهم عشان ملقيتش حد عندها راحت بطلت الكتابه النتيه
زوروها و شوفه الأسد المرعب اللى عندها

ماعاد فيه حكى

حدوته

فنان فقير على باب الله
الجيب ما فيهشي ولا سحتوت
والعمر فايت بيقول آه
والقطر فايت بيقول توت
صحيتني ليه يا شاويش يا شاويش
أنا كنت سارح في الملكوت
لما بنام بحلم وباعيش
لما بفوق ما بفوقشي بموت
وتقول على كبير السن
وانا في قلبي ولد كتكوت
وتشوفني ببكي وبانعي وائن
والدنيا لسه بنت بنوت
اشمعنى قلبي ضناه الشيب
من الشقا مهري ومنكوت
قال اللي قال العيب في الجيب
والجيب ما فيهشي ولا سحتوت
والعمر فايت بيقول آه
والقطر فايت بيقول توت
علي المحطة يا ولداه
حتى المحطة كمان حتفوت

بصوت وجيه